¹ Li den tie o bado Asuelusi n den die yaa yogunu, wani Asuelusi den die ya diecianma n boagidi kobiga n piilie n diema lele, ki cili Indu diema ki yaa caa hali Etiopi ya diema. ² O den ye o diema diema kuli dociamu Suse nni, ki kaa o balikalikaanu po. ³ O bali bintaali binli o den tieni mi jaanma o badijaba leni o naacenba kuli po. Pedi leni Medi diema toatieba yudanba leni diema kuli yudanba leni mi paatieba den taani o bado kani. ⁴ O den wangi ba o diema halimani leni o bali n pia ya kpiagidi kuli. Li den waagi dana boncianla, li den pundi kobiga n dana piini. ⁵ Laa dana n pendi, o bado den tieni mi jaanjiema ya niba n den taani u dociamu suse nni kuli po, a nikpiaga leni taliginba kuli. Mi jaanjiema yeni den tieni o bado diegu sadinga ya fanma nni, ki waagi hali dana lele. ⁶ U kuanu yeni den pia a bunbuna, ban den taa ya tanhama n yi Mabile ki kpie ya. Ben den taa halinjifa ñoagidibima ki tabini a bunbuna yeni, ki go taa ban pali ya gaali leni ti kunkundi ke yi pieni leni i gaalimoani ki tuuni mi ñoagidibima nni ke yi luo a cabipiena leni ya caba n suudi. Bi den duani sadinga fanma yeni niinni ya tanbila n moani leni ya tanbila n pieni leni ya tanbila n boani leni ya tanbila ke bi wuli apo yaala n yen taabi u kunkunu tugu nni ki ñuliti. Bi den bili lankane ya bonkikaala n tie wula leni halinjifa. ⁷ Mu tadiñ̵okaamu buoli den yabi. Mu kuli den tie wula. Duven den yaba boncianla kelima o bado den puni ma leni ti bulicindi. ⁸ Baa den teni ke oba kuli ñuni ma leni u paalu kelima o bado den teni ya naacenba n ye o diegu nni kuli li ñoabonli ke ban hoadi yua kuli n bua maama. ⁹ O bado pua Fasiti moko den tieni mi jaanjiema bi puoba po o bado Asuelusi badidiegu nni. ¹⁰ Li danleleeli daali o bado den ñuni duven ke o pali mangi, o den yini Mehumani leni Bisita leni Halibona leni Bigita leni Abagita leni Setadi leni Kalikasi bani ya moagilileleedimu n den tuuni o bado po. ¹¹ O den soani ban ban yini Fasiti wan cua. Ke o ya kpendi wan ya ciidi ki badifogiliga bi paatieba leni taliginba kuli n la o hamu kelima o nunga den hani boncianla. ¹² Ama mu moagilimu n den ca o pobado Fasiti o bado tondu o den yie ke o kan gedi. Lanyaapo o bado pali n den beni hali boncianla. ¹³ Wani o bado ya den pia maama ba o den yen maadi ki kadi yaaba n bani li balimaama leni li bujaliali nintuali. Lanyaapo n den boe leni bani yaaba n tie o tundikaaba. ¹⁴ Pedisa leni Medi diema yudanleleediba den tie o tundikaaba yeni siiga tianba. Bani bi yudanleleediba yeni yela nne: Kadisema, Setala, Adimata, Talisisi, Melesi, Medisena leni Memukana. O bado den pia bipo ti dugidi ki teni ke bi tugi li yuli ki hoa o puoli. ¹⁵ O den yedi ba: n den soani mu moagilimu ban yini o pobado Fasiti ke o yie waa cua. Li balimaama bili tin tieni o be? ¹⁶ Bi yudanleleediba siiga yendo, Memukana den yedi o bado leni o yudanlieba: O pobado Fasiti ki tieni yaala n bia fini o bado bebe po ka, li bia tinba bi yudanba kuli yaapo. ¹⁷ Kelima bi puoba kuli baa gbadi o pobado Fasiti n tieni yaala ki fali bi ciaba. Bi baa yedi: O bado Asuelusi wani oba n den soani ban yini o pobado Fasiti, waa den yie waa den yie laa gedi? ¹⁸ Dinla liiga Medi leni Pedisa ya diema yudanba puoba baa gbadi o pobado n tieni yaala ki togidi la bi ciaba kani. Yeni mo bi puoba faliga baa fiini bi jaba pala. ¹⁹ Fin o bado, a ya sua ke li hani han ñani a ñoabonli ban kpaani ki go diani ki bili Pelisa diema leni Medi ya diema kuli yaa balimaaama nni, ke li kan lebidi hali abada, ke Fasiti kan go cua a kani. Han teni nitoa, yua n cie o li pobali. ²⁰ Ba a diema n yaba maama kuli, bi baa gbadi i kaani kuli han ñani ya ñoabonli. Lanwani pua kuli baa kpiagi o calo. A ya tie nuciamo bi a ya tie taliga. ²¹ Laa tundi den mangi o bado leni bi yudanba kuli, ke o bado den tieni Memukana n yedi maama. ²² O den soani a tila o diema kuli nni. Bi den diani ki soani diebiga kuli po nani kan dangi maama leni ya nibuolu n ye ki niinni n maadi ya mabuolu. Laa tila den bili ke joa kuli baa die o diegu ki ya go maadi o buolu maama o diegu nni. h