¹ Lan den waagi waamu, o bado pali den jiidi, o den tiadi Fasiti po leni wan den tieni yaala, ban den jagi ke bi baa tieni yaala kuli. ² Lanwani o bado naacenba den yedi o: Ban lingi fini o bado ya jafanba n daa bani jaba, ki go pia ti jafandi. ³ Han gandi a diema nni kuli bi niba ki dini ba li bali ban lingi ya jafanba n pia ti jafandi, ki soani ba u dociamu Suse nni, ki kuani ba bo puoba diegu nni. A moagiliga Ege, yua n guu bi puoba baa ya kubi ba likani. Ki ya tendi ba yaala n baa pugini ba ti jafandi. ⁴ Lanwani ya jafanba n dagidi apo baa ga Fasiti kaanu ki tua o pobado. Laa tundi den mangi o bado pali ke o tieni yeni. ⁵ Li den pia u dociamu Suse nni jayendo ke o tie Jufi buolu yua ki yi Malidoke. O den tie Jayili bijua, Jayili mo den tie Simeyi bijua Simeyi mo kisi ya bijua Benjamina buolu yua. ⁶ Babilona bado Nebukanesa n den []ani Jude bado Jekonia leni o diema yaaba Jelusalema nni ki gedini ba ti yonbidi, Malidoke yeni den tie bi siiga yua. ⁷ O den wubi o baa naataanjaga bisalo Adasa, ban go yi yua Esita kelima o baa leni o naa kuli den kpe . Ojafaano yeni bugima leni o nunga kuli den hani. O baa leni o naa n den kpe, Malidoke den taa o ki wubi o. ⁸ Ban den kpaani o bado ñoabonli, bi den taani bi jafanba boncianla ki gedini ba u dociamu Suse ki teni ba bi puoba guudo Ege. Bi den taa Esita moko ki taani ki gedini o leni o jafanlieba, o bado diegu nni. ⁹ Esita den dagidi Ege po ki baa okani ki nunmanga. O den jaligi ki teni yaala n tie opo tiladi ki baa pugini o ti jafandi leni yaala n tie tiladi o miali yema po kuli. O go den gandi o bado diegu nni jafanba leleke ban ya tuuni o po, ki kuani o wani leni o jafanleleediba bi puoba diegu nni ya dieli n hali yaa niinni. ¹⁰ Esita ki den doagidi ki waani ke o tie Jufi buolu yua, kelima Malidoke den tuodi ki waani o ke wan da waani. ¹¹ Daali kuli Malidoke den lindi ki poandi bi puoba diegu cancanli nni ki baa le Esita n ye maama leni ban tiendi o yaala. ¹² Bi den bili ke bi jafanba yeni kuli baa ya hanbidi biba hali piiga n hmaali lie. Bi baa ya sogidi ya kpama n yi Mli hali hmaali luoba, ya hmaluobidi n sieni mo ban ya sogidi bi puoba n maani ki sogidi ya tulale. Lanwani yua ya yogunu n pundi bi baa gedini o o bado kani. ¹³ Lani n tie jafaano kuli n yen tieni maama ki nan gedi o bado kani. Jafaano ya baa []a bi puoba diegu nni ki kua o bado diegu nni, bi yen cedi wan taa wan bua yaala kuli. ¹⁴ O yen gedi ku ñiagu, li ya fii ki fa wan kua bi puoba diegu nni, O bado moagiliga Sagayi yua n gu ti ponanbandi n ya kubi o. O kan go guani o bado po, wani yaa ka bua ki ta o yeli ki yini o. ¹⁵ Malidoke baa naataanjaga Abisayi bisalo Asita Malidoke n den wubi yua, ya gedima yogunu o bado po den pundi. Waa mia liba kali o bado moagiliga Ege yua n den guu bi puoba n den yedi wan taa yaala. Esita den baa ki nunmanga yaadi n laadi o kuli kani. ¹⁶ Bi den kuani o o bado diegu nni, Asuelusi kani o bali binleleeli. Li den tie cipiiga ya hmaalo ban yi yua Tabeti. ¹⁷ O bado den bua Esita ki cie bi puoba kuli. Wani Esita den baa ki nunmanga boncianla ki cie ya jafanba n sieni. O den cibini o ki badifogiliga ki dini o li bali ke o gaa Fasiti kaanu. ¹⁸ O den tieni mi jaanjiema o diema yudanba leni o naacenba kuli po. O den tieni yeni ki kpiagi Esita, o den puni o diema niba kuli mi fuodima, ki go puni bu paabu leni ti bulicindi. ¹⁹ Bi go den taani bi jafanba mi liema. Laa yogunu Malidoke den tie bi cancannikpeliba siiga nni yendo ki ²⁰ kaa o bado diegu buliñoabu kani. Danyenli Malidoke n den kubi o tuonli o bado diegu nni, ²¹ o bado moagilimu bonba lie, Bigitani leni Telisi yaaba n den guu o bado diegu buliñoabu pala den beni o bado po. Bi den jagi ke bi baa kpe o. ²² Malidoke den bandi, ki waani o pobado Esita, ke o mo waani o bado. Ki doagidi opo ke Malidoke n waani o. ²³ Ban den diidi ki sua ke li tie moamoani, bi den cuo mu moagilimu yeni ki joani ba ti daadi po ke bi kpe. O bado wani oba den teni ke bi diani laa bonla kuli bi badiba jama tili nni.