¹ O Diedo den maadi yeni Moyiisi, ki yedi, ² "ŋan waani Israyeli nitaanli, ke yua pia gbaadma, fada, bii gbannanyianu bii yianpuodkou kuli, lanyaaka yua n jɔgni o yuli kelima o sii kpiemo, li buali ke ban deli ki ñani o ti jondi nni nitaanli siiga. ³ Lan tie ja bii pua aa, li buali ke lan ñani ba ti jondi siiga, ban da ti jɔgni li nagli, Mini O Diedo ń ye naani yeni yi." ⁴ Israyeli nitaanli den cɔlni o ñɔmaama, ki tieni nani wan yedi maama, ki deli ki ñani yaaba n pia yianpuodkou kuli li nagli nni, ki ŋɔdi O Diedo ñɔbonli. ⁵ O Diedo go den maadi yeni Moyiisi, ki yedi, ⁶ "Maadi yeni Israyeli nitaanli, ki waani ba. Ja bii pua ya sɔni tuonbiadi, nani bi niba ń tiendi bi lieba maama, ki miidi O Diedo kuali, Lanya nilo ba tugi i tagli. ⁷ Li nilo ba mia wan tieni ya tuonbiadi po sugli. O ba pa o tuonbiadi po pani, ki go maani li pani po, ligdibala mu kuli, dibayenli. Wan biidi yua yapo yeni n ba ga li tuonbiadi pani yeni li maadi kuli. ⁸ Wan biidi yua yapo ya ki pia o kpiilo yua n ba ga ti tuonbiadi po pani, i tagli daano ba pa mini O Diedo i li pani, salga yidkaciamo kani, o go ba pugni i pani po patonli, ki mia o tuonbiadi po sugli. ⁹ Israyeli nitaanli ya puni paabu, yaabu gagdi ki dagdi O Diedo po, ke salga yidkaciamo ga li tie wani salga yidka ya biinu i. ¹⁰ Yua n puni paabu kuli, li paabu ba kua salga yidkaciamo nui nni. Yua n puni salga yidkaciamo paabu mo, li paabu tie o yaabu i. ¹¹ O Diedo go den maadi yeni Moyiisi, ki yedi, ¹² "Maadi yeni Israyeli nitaanli, ki yedi ba, 'Li ya tie ke pua lindi o calo puoli, ki tieni opo tuonbiadi, ki biidi o calo pali. ¹³ Li ya tie ke jatiano n dua o. Li tie ke li pua jɔgni o yuli n yeni. Bá li ya tie ke o calo ki la o ki cuo o, bii, ke niloba kuli ki la ba, ke obakuli ki bani wan tieni yaali, ki ba tieni kasiedi, o li jɔgni o yuli n yeni. ¹⁴ Ama, li ponponli yantiali ba kua o yuli nni,wan cili ki ya ponbi yeni o denpua, ki bandi ke o lindi o puoli po, ki jɔgni o yuli. Ti bani ke ja ba fidi baa li ponponli yantiali, ki ya ponbi yeni o denpua, bá ke waa lindi o puoli po. ¹⁵ Li ya tieni yeni, o ja ba gedi yeni o denpua salga yidkaciamo kani. O baa kubi mi daama yeni mi yoma, cilo bona taa (Kg 3). O kan tieni li yoma po kpama bii ŋubŋanli, kelima, li tie nunponli ya padli i, bii tuonbiadi kpaagma ya salga i. ¹⁶ Salga yidkaciamo ba cedi o pua yeni ń nagni O Diedo nintuali. ¹⁷ Salga yidkaciamo ba taa tiagu, ki kabi mi ñingagdiŋanma, ki jobi li gbandieli nni tingbanu po tama, ki tieni mi ñima nni. ¹⁸ Salga yidkaciamo ba nagni o pua yeni, O Diedo nintuali, ki yidi o yucabli o pua yuli po. o ba mubni o pua nuu nni mi tidma yeni li nunponli padli. Salga yidkaciamo baa kubi mi ñintonma yaama n kpendi yeni ti solindi, o nuu nni. ¹⁹ Salga yidka ba cedi o pua ń poli, ki yedi o ya maama ne, 'Li ya tie, ke ŋan ye yeni a calo ya yognu, jatiano ki dua, ki taani yeni a, a ya ki lindi a calo puoli po, ki tieni tuonbiadi, ki jɔgni a yuli, lanwani ii, ya ñintonma n kpendi yeni ti solindi ne, ń da nandi a. ²⁰ Ama, fini o pua yua ye yeni o calo ne, ya lindi a calo puoli po, ki jɔgni a yuli, li ya tie ke jatiano duani ki taani yeni a, ²¹ lanwani ii, salga yidka ba cedi o pua ń poli ti solindi ñɔpoli, wan ya maadi yeni o pua ki tua, 'O Diedo ń soli a, ki cedi bi niba ń ya taagi a yeli ki polgi. O Diedo ba cedi a kali ń kuodi, a tugu ń piebi, a nuani ń bedi. ²² ya ñintontondi ne ba kua a tugu nni, ki wuli ti solindi a tugu nni, ki cedi a tugu ń piebi, a nuadi ń bedi.' O pua ba jiini, 'Nn, li ya tie ke i tagli tugi n yuli po, lan tieni npo nani ŋan yedi maama yeni. Ami.' ²³ Salga yidkaciamo ba diani ti solindi yeni ki walga po, ki yuandi ki ŋuudi yeni ti ñintontondi. ²⁴ Salga yidkaciamo ba cedi o pua yeni ń ñu ti solindi ñintontondi yeni. Ti solindi ñintontondi ba kua o pua gbanu nni, ki ya to boncianla. ²⁵ Salga yidkaciamo ba ga o pua nuu nni, li nunponli yeni mi tiadma paabu, ki duoni ki waani O Diedo nintuali, ki gedi yeni bu li padbinbindli kani. ²⁶ Salga yidka ba yidi mi yoma nuukuli, ki yidi salga, ki juu lipadbinbindli po, ki ji teni o pua yeni ti solindi ñima, wan ñu. ²⁷ O ya teni o pua ti solindi ñima, ke o ñuni, o ya tugi i tagli, ki lindi o calo puoli po, ki jɔgni o yuli, mi ñima yeni ba tongi o pua gbanu nni hali boncianla o tugu ba piebi, o nuadi ń bedi, o kali ń kuodi. Li pua ba tua li nitaanli siiga, ban baa taagi yua ya yeli, ki polgi. ²⁸ Ama, o pua yeni yaa jɔgni o yuli, tagliba kuli ki tugi li pua yuli po, o ba mli o bila lan buali maama. ²⁹ Li nunponli ñɔmaama n yeni. ya ñɔmaama n nua ya pua n lindi o calo puoli po, ki jɔgni o yuli. ³⁰ Ne tie ya ja n pia li nunponli yantiali, ki ponbi yeni o denpua ya ñɔbonli i. O ba gedi yeni o denpua O Diedo nintuali, salga yidkaciamo ba tieni o pua yeni po li nunponli ñɔbonli ń bili ke ban tieni maama i. ³¹ O ja ki pia tagliba kuli, kelima o gedi yeni o denpua li nunponli ñɔmaama po. Ama, o pua ya jɔgni o yuli, i tagli ba tugi o yuli po, wan pa o tagli pani."