¹ O Diedo den maadi yeni Moyiisi yeni Haarɔn, ki yedi, ² "Yin kua Lefi buolu yaaba siiga , ki cɔdi Kohati cugli nni yaaba bonjala, yuakuli yeni o cugli yeni o diegu. ³ Yin cɔdi ya bonjala n pia bina piilie (20), ki ban dagdi bina piimu (50). Li jaba n ba taani yeni yaaba n baa tuuni Li gbandieli kadkaanu kani tuona, ⁴ Kohati puolŋuani n baa nua, ki fiini li gbandieli kadkaanu kani, ya tiadi yeni ya bona n gagdi ki ŋani boncianla. ⁵ Li nitaanli ya bobni cenli, ki ba suagi liiga, Haarɔn yeni o bijaba ba kua li gbandieli nni, ki taa ya kpaldɔginkaabu n paadi u kaangagdiŋamu yeni u kaangagdiŋanmɔnu yeni, ki pini a ñɔmaatana kpagu. ⁶ Bi go ba taa ya gbangu n juagi, ki ŋagni a ñɔmaatana kpagu. Li buali ke ban la ya caba n mɔni ki tuudi, ki ladi kupo. Bi ba tuuni ti daabugkaadi ku kpagu kuni po, ki bugi gu. ⁷ Bi ba la ya cabli n mɔni, ki tuudi, ki ladi ya kpanu n gagdi ki ŋani O Diedo po yeni, taabli po. Bi ba maani taabli tuonsɔntiadi, mu tadmu, mu tadñukaamu, mu pulmu, a tadkuana yeni a cuana, li ñincabli po. Ya yognu kuli, kpanu wani baa tundi ki maam taabli po. ⁸ Bi ba ladi taabli po yeni ya cabli n mɔni, ki tuudi, ki go pugni ya gbangu n juagi. Bi ba tuuni taabli kuni po ti daabugkaadi, ki bugi li. ⁹ Ban la cabmɔnli, ki ŋagni u fidsantuankaanu po yeni li fidsanmu po, mu babmu, u fantanwodu tiadi, yeni mi kpama golindi kuli po. ¹⁰ Ban pɔbni u fidsantuankaanu yeni u tuonsɔntiadi kuli, ya gbangu n juagi nni, ki maani likuli ban yi maandi ya daadi po, ki bugi yeni. ¹¹ Ban taa ya cabli n mɔni, ki tuudi, ki ladi wula padbinbindli po. Ki taa ya gbangu n juagi, ki ŋagni, ki tuuni ti daabugkaadi. ¹² Ban taani u kaangagdiŋamu nni tuonsɔntiadi kuli, ki pɔbni ya cabli n mɔni ki tuudi nni. ban pɔbni li tiadi kuli ya gbangu n juagi nni, ki maani ban yi maandi ya daadi po, ki bugi yeni. ¹³ Ban ñani li padbinbindli po fantanpienma, ki taa ya cabli n mɔni, ki ladi lipo. ¹⁴ Ban taa li padbinbindli tuonsɔntiadi kuli, ki maani tin yi maa ya daadi po ke bi bugi yeni. Li tiadi n tie, i fani, u nancɔgtiagu, pelinba, mu tadmu yeni ya binbindli tiadi n sieni kuli. Ban taa ya gbangu n juagi, ki ŋagni li padbinbindli po, ki tuuni ti daabugkaadi. ¹⁵ Haarɔn yeni o bijaba ya ŋagni, ki pɔbni u kaangagdiŋamu nni tiadi kuli, ki gbeni, ke li nitaanli bua cuo li cenli, li buali ke Kohati puolŋuani n tugi u kaangagdiŋamu. Bi ya sii ya tiadi n gagdi ki ŋani, O Diedo po, bi ba kpe i. Kohati puolŋuani tuonli n tie ban tugi li gbandieli kadkaanu tiabobinkaadi. ¹⁶ Haarɔn bijua, Eleyasari, salga yidkaciamo n baa fiini mu fidsanmu kpama, tulaali yeni li ŋubŋanli, bu paabu jiema yeni mi kpaŋanma nni. Wani n baa guu li gbandieli yeni yaali n ye li niinni kuli yeni u kaangagdiŋamu yeni u tuonsɔntiadi kuli." ¹⁷ O Diedo den maadi yeni Moyiisi yeni Haarɔn, ki yedi, ¹⁸ "Yin da cedi Kohati cugli nni yaaba ń bodi, ki ña Lefi buolu yaaba siiga. ¹⁹ Yin ya guu, ki go gadi ba, ban da kpe, ki ya bii ki pia bi miali. Yin ba tieni yaali n ne, bi ya nagni ya tiadi n gagdi ki ŋani hali boncianla, ²⁰ ban da duandi ki diidi u kaangagdiŋamu nni, ki la ban pɔbni ya tiagagdikaadi bá waamu, lanyaaka bi ba kpe i. Haarɔn yeni o bijaba ba waani Kohati yua kuli o tuonli, yeni wan ba tugi ya tugli." ²¹ O Diedo den maadi yeni Moyiisi yeni Haarɔn, ki yedi, ²² " Yin cɔdi Gericoni puolŋuani mo ki cɔlni bi diegu yeni bi cugli. ²³ Yin cɔdi yaaba n pia bina piitaa ki ban tuoni bina piimu. Cɔdi mani yaaba n ba taani ya nicagli n baa tuuni li gbandieli kadkaanu nni. ²⁴ Gericɔni cugli nni yaaba tuona n ne, ban baa tuuni ya tuona yeni ban baa tugi ya tuga. ²⁵ Bani n baa tugi li gbandieli kadkaanu, yeni u kaangagdiŋamu, kpaldɔginkaadi li cabladkaana, li gbanjuagdi yeni li gbandieli kadkaanu bulñɔbu kpaldɔginkaabu. ²⁶ Bani n go baa tugi ya kpaldi n kagni ki lindi u luolu, yeni li gbandieli luolu bulñɔjabu kpaldɔginkaabu yaabu n duagi a ñɔmaatana kpagu yeni li padbinbindli yeni, ki tugi li baabi yeni li bonbaanbidi kuli, bani n baa tuuni li niinni ń pia ya tuona kuli yeni li tiabidi. ²⁷ Haarɔn yeni o bijaba n baa nua, ki ŋmagdi Gericɔni puolŋuani ń tuuni ya tuona kuli yeni ban tugi yaali kuli, bani n baa wangi ba ban baa tuuni yaali yeni maama, yeni yuakuli o judandi yeni o tuonli. ²⁸ Lani n tie Gericɔni puolŋuani tuona li gbandieli kadkaanu nni. Salga yidkaciamo, Haarɔn bijua Itamari n baa ŋmagdi ba, bi tuona nni. ²⁹ Yin cɔdi Merari puolŋuani, ki cɔlni bi diegu yeni bi cugli, ki ŋɔdi tuagu tuagu, bi yaaja cugli nni, ³⁰ Yin cili yaaba n pia bina piitaa (30) ki ban tuoni yaaba n pia bina piimu (50), ki ba fidi ki sɔni u kadkaanu gbandieli nni tuona. ³¹ Ban baa tuuni ya tuona u kadkaanu gbandieli nni ne. Bani n baa tugi li gbadieli daadi, li daacaada yeni li daapanda, li kudidaadi, li bunbuna li kpakpaana, ³² Ban n g baa tugi li gbandieli luolu daadi, li kpaana, li bunbuna, li baabi, yeni li bonbaanbidi kuli. Yin diani ki waani b ban baa tugi ya tiadi. ³³ Merira puolŋuani ń baa tuuni ya tuona u kadkaanu gbandieli nni n yeni. Salga yidkaciamo, Haarɔn bijua, Itamari n baa ŋmagdi ba bi tuona nni." ³⁴ Moyiisi yeni Haarɔn yeni li nitaanli yudanba den cɔdi Kohati cugli nni yaaba, yukuli yeni o cugli yeni o diegu. ³⁵ Bi den cili yaaba n pia bina piitaa, ki ban pundi bina piimu. Bi den cɔdi yaaba n pia bina piitaa (30) ki ban dagdi bina piimu (50), ki sagni yaaba n baa tuuni u kadkaanu gbandieli nni. ³⁶ Bi den cɔdi, ki la niba tuda lie n kobilele n jaba piimu (2.750). ³⁷ Moyiisi yeni Haarɔn den cɔdi Kohati cugli nni yaaba, yaaba n baa tuuni u kadkaanu gbandieli nni. Ban den tieni yeni, bi den cɔlni O Diedo ń den bili Moyiisi ya ñɔbona, ke o waani ba i. ³⁸ Bi den cɔdi Gericɔni puolŋuani , ki cɔlni yua tua yua tua bi yaaja cugli nni, ³⁹ ki cili yaaba n pia bina piitaa, ki ban tuoni yaaba n pia bina piimu, yaaba n baa tuuni u kadkaanu gbandieli nni. ⁴⁰ Ban den cɔdi yaaba, ki ŋɔdi yua tua yua tua, bi yaaja cugli nni, bi den la jaba tuda lie n kobiluoba n jaba piitaa (2.630). ⁴¹ Moyisi yeni Haarɔn den cɔdi Gericɔni cugli puolŋuani, yaaba n baa tuuni u kadkaanu gbandieli nni tuona i. Bi den tieni yeni, ke ban cɔlni O Diedo ń den bili Moyiisi li ñɔbonli, ke ban tieni yaali i. ⁴² Bien cɔdi Merira puolŋuani , ki cɔlni yua tua yua tua bi yaaja cugli nni, ⁴³ ki cili yaaba n pia bina piitaa, ki ban tuoni yaaba n pia bina piimu, yaaba n baa tuuni u kadkaanu gbandieli nni. ⁴⁴ Ban den cɔdi yaaba, ki ŋɔdi yua tua yua tua, bi yaaja cugli nni, bi den la jaba tuda lie n kobiluoba n jaba piitaa (2.630). ⁴⁵ Moyisi yeni Haarɔn den cɔdi Merira cugli nni yaaba. Bi den tieni yeni, ke ban cɔlni O Diedo ń den bili Moyiisi li ñɔbonli, ke ban tieni yaali i. ⁴⁶ Lanwani ii, Moyiisi yeni Haarɔn yeni Israyeli cancannikpelba den cɔdi Lefi buolu yaaba, ki ŋɔdi diegu diegu yeni cugli cugli, ⁴⁷ ki cili yaaba bina piitaa, ki ban tuoni bina piimu. Bi den cɔdi yaaba n ba fidi ki sɔni u kadkaanu gbandieli tuona, ki go tugi li gbandieli nni tiadi, ki go ya fiini li tiadi nni. ⁴⁸ Bikuli den taani tuda niin n kobimu n jaba piiniin (8.580). ⁴⁹ Moyiisi den cɔlni O Diedo ñɔmaama i, ki cɔdi ja kuli yeni wan baa tuuni ya tonli, yeni wan pia ya yudandi. Bi den tieni yeni ke ban cɔlni O Diedo ń den bili Moyiisi ya ñɔmaama ki waani o ke ban sɔni maama i.