¹ O Diedo go den maadi yeni Moyiisi yeni Haarɔn. O den yedi, ² Li buali ke Israyeli yua kuli ń yi kpaa o jongu, ki lindi bi tɔcagli tuudcabli, yeni bi buolu (yaaja yeni bi baadiegu) maalma nannanli. Bi ba kpaa bi jondi, ki kagni ki lindi u kadkaanu gbandieli kaani kuli i. ³ Yaaba n ba kua u kadkaanu gbandieli puoli po, u yienu ń pudi naanpo, tie, Juda buolu ya jondi yeni bi buolu tuudicabli. Aminadabi bijua Nahiconi n tie Juda buolu yaaba yudaano. ⁴ Juda buolu yaaba tie, niba (74 .600) tuda piilele n tuda na n niba kobiluoba. ⁵ Isakari buolu n ba kua ki tuani Juda buolu po. Suwari bijua Nataneli n tie Isakari tɔcagli yudaano. ⁶ Bi buolu nni, bi tie niba tuda piimu n tuda nan n niba kobina. (54.400) ⁷ Sebuluni buolu n ba kua ki tuani Isakari buolu po. Heloni bijua Eliyabi n baa tie Sebuluni tɔcagli yudaano. ⁸ Bi tɔcagli cɔli tie niba tuda piimu n tuda lele n kobina (57.400). ⁹ Juda buolu tɔcagli kuli taani ki tie niba tuda kobga n tuda piiniin n tuda luoba n kobina (186.400). Bani n ba kpia ki kpaa bi jondi, ki kua. ¹⁰ Rubeni buolu yaaba ba caani bi jondi u niganu po bi buolu tuudcabli ń caa naani. Rubeni tɔcagli yudaano baa tie Cedihuri bijua Elisuri. ¹¹ Bi buolu tɔcagli pia niba tuda piina n tuda luoba n kobimu (46.500). ¹² Simeyɔn buolu n ba kua ki tuani Rubeni buolu po. Simeyɔn buolu yudaano baatie Suricadayi bijua Celumiyeli. ¹³ Bi cɔli tie niba tuda piimu n tuda yian n kobitaa (59.300). ¹⁴ Gaadi buolu n ba tuani. Gaadi buolu yudaano tie Dewuyeli bijua Eliyasafi. ¹⁵ Bi cɔli tie niba tuda piina n tuda mu n kobiluoba n piimu (45.650) ¹⁶ Ban cɔdi yaaba Rubeni buolu yeni ya tɔcaga n taa yeni ba, taani ki tie niba tuda kobga n tuda piimu n tudli n kobinan piimu (151.450). ¹⁷ Lani ya pendi, u kadkaanu gbandieli ba ba jɔndi waamu yeni Lefi yaaba jondi, ti jondi kuli siiga. Bi ya ña ti jondi nni, bi ba ŋɔdi ban den ku ti niinni maama i. Yuakuli baa ye o kaanu yeni o buolu tuudcabli. ¹⁸ Efrayima buolu tɔcagli yeni bi tuudcabli. Efilayima buolu yudaano baa tie Amihudi bijua Elicama. ¹⁹ Bi niba cɔli tie tuda piina n niba kpbimu (40.500). ²⁰ Ya buolu n ba tuani bipo tie Manase ya buolu i. Manase buolu yudaano tie Pedahisuri bijua Gamaliyeli. ²¹ Li tɔcagli niba cɔli tie tuda piitaa n tuda lie n kobi lie (32.200). ²² Ya buolu n ba tuani n tie Benjamina buolu. O yudaano Benjamina buolu nni tie Jideyɔ bijua Abidani. ²³ Bi tɔcagli niba cɔli tie tuda piitaa n tuda mu n kobina (35.400). ²⁴ Ban cɔdi yaaba Efrayima buolu tɔcagli nni tie tuda kobga n tuda niin n niba kobga (108.100). ²⁵ U nijienu po, Daani buolu yaaba n ba caani bi jondi. Daani buolu yaaba yudaano n tie Amicadayi bijua, Ahiyeseri. ²⁶ Bi tɔgoli niba cɔli tie tuda piiluoba n tuda lie n kobilele (62.700). ²⁷ Ya buolu n ba tuani Daani buolu po tie Asiheri buolu. Asiheri buolu yudaano tie Ocirami bijua Pagiyeli. ²⁸ Bi tɔgoli niba cɔli tie tuda piina n tudli n kobimu (41.500). ²⁹ Nafitali buolu yaaba n ba tuani. Nafitali buolu yudaano tie Enani bijua Ahira. ³⁰ Bi tɔgoli niba cɔli tie tuda piimu n tuda taa n kobina (53.400). ³¹ Ban cɔdi ya niba Daani buolu tɔcagli nni, tie tuda kobga n tuda piimu n tuda lele n kobiluoba (157.600). ³² Ban cɔdi Israyeli yaaba, buolu buolu, ki la ya niba n yeni. Bi cɔdi yukuli o tɔcagli nni i, bikuli taani tuda kobiluoba n tuda taa n kobimu n niba piimu (603.550). ³³ Ama, Moyiisi yeni Haarɔn ki cɔdi Lefi buolu yaaba ki taani Israyeli yaaba siiga. Li cɔlni O Diedo ń den bili o ñɔmaama maama, ki waani Moyiisi i. ³⁴ Israyeli yaaba den tieni O Diedo ń den puogi ba ke ban tieni yaali kuli. Bi den caandi bi jondi ki ŋua yuakuli yeni o tuudcabli i. Bi go den ña ti jondi nni, ki ŋua yuakuli yeni o cugli yeni diegu nni yaaba i.