¹ Israyeli buolu ń ñani Ejipti diema nni, li binlieli, o ŋmaalielo daacincinli, O Diedo den maadi yeni Moyiisi, Sinaayi fanpienma nni, li gbandieli nni kadikaanu. O Diedo den yedi, ² "Yin bobni Israyeli niba cɔdma, buolu buolu yeni cugli cugli, yeni diegu diegu. Yin cɔdi, ki taa bi yela. Yin gagdi bi jaba yeni bi puoba, ki cɔdi bi jaba, ³ Ya jaba n pia bina piilie, bii ki cie. Yin cɔdi ya jaba n ba fidi ki pua bu tɔbu, Israyeli yaaba po. Fini yeni Haarɔn ń bobni a tɔcaga, ki cɔdi ja kuli o tɔcagli nni. ⁴ Buolu nni kuli, niyendo, yeni cugli kuli yudaano, ba tua bi buoli yudanba, ki ya todi yi a tuona. Yudaano kuli baa gobdi yaaba n ba pua bu tɔbu, bi buolu po. ⁵ Ya jaba n baa todi yi, yela n ne: Rubeni buolu nni, Cedewuri bijua, Elisuri; ⁶ Simeyɔn buolu nni, Suricadayi bijua, Celumiyeli; ⁷ Juda buolu nni, Aminadabi bijua Nahiconi; ⁸ Isakari buolu nni, Suwari bijua, Nataneli; ⁹ Sebuluni buolu nni, Heloni bijua, Eliyabi; ¹⁰ Josefi bijua Efrayima buolu nni, Ammihudi bijua, Elicama; Manase buolu nni, Pedahisuri bijua Gamalieli; ¹¹ Benjamina buolu nni, Jideyɔn bijua, Abidani; ¹² Dani buolu nni, Ammicadayi bijua, Ahieseri; ¹³ Asiheri buolu nni, Ocirani bijua, Pagiyeli; ¹⁴ Gadi buolu nni, Dewuyeli bijua, Eliyasafi; ¹⁵ yeni Nafitali buolu nni, Enani bijua, Ahira." ¹⁶ Ban den gandi ya jaba, li nitaanli nni n yeni. Bani n baa tie yudanba, bi yaaja buolu nni po, Israyeli yaaba siiga. ¹⁷ Moyiisi yeni Haarɔn den taani ban den gandi ya jaba, ki diani bi yela yeni, ¹⁸ ki taani Israyeli yaaba kuli yeni li jaba, o ŋmaalielo, daacincinli daali. Lanwani ii, bi den cɔdi buolu nni kuli ya jaba n pia bina piilie, bii, ki maani, yuakuli o buolu yeni o cugli nni. Bi den yini buolu yeni cugli kuli, o yaaja yeli. ¹⁹ Moyiisi den yuandi ki cɔdi ban dɔa maama Sinaayi fanpienma nni, nani O Diedo ń den bili o o ñɔmaama, ke wan tieni maama yeni. ²⁰ Rubeni yua n tie Israyeli bijakpelo buolu nni, bi den cɔdi ya jaba n pia bina piilie, bii ki cie, ki ba fidi ki pua bu tɔbu kuli, yeni bi yela, ki gagdi yuakuli o cugli, yeni o diegu. ²¹ Bi den cɔdi Rubeni buolu nni, jaba tuda piina n tuda luoba n kobimu (46.500) ²² Simeyɔn puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ²³ Bi den cɔdi Simeyɔn buolu siiga, jaba tuda piimu n tuda yian n kobitaa (59.300). ²⁴ Gaadi puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ²⁵ Bi den cɔdi Gaadi buolu nni, jaba tuda piina n tuda mu n kobi luoba n jaba piimu (45.650). ²⁶ Juda puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ²⁷ Bi den cɔdi Juda buolu nni, jaba tuda piilele n tuda na n kobiluoba (74.600) ²⁸ Isakari puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ²⁹ Bi den cɔdi Isakari buolu nni, jaba tuda piimu n tuda na n jaba kobina (54.400). ³⁰ Sebuluni puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ³¹ Bi den cɔdi Sebuluni buolu nni, jaba tuda piimu n tuda lele n jaba piina (57.400). ³² Josefi bijua, Efrayima puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ³³ Bi den cɔdi Efrayima buolu nni, jaba tuda piina n jaba kobimu (40.500). ³⁴ Josefi bijua, Manase puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ³⁵ Bi den cɔdi Manase buolu nni, jaba tuda piitaa n tuda lie n kobilie (32.200). ³⁶ Benjamina puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ³⁷ Bi den cɔdi Benjamina buolu nni, jaba tuda piitaa n tuda mu n jaba kibina (35.400). ³⁸ Daani puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ³⁹ Bi den cɔdi Daani buolu nni, jaba tuda piiluoba n tuda lie n jaba kobilele (62.700). ⁴⁰ Asiheri puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ⁴¹ Bi den cɔdi Asiheri buolu nni, jaba tuda piina n tudyenli n jaba kobimu (41.500). ⁴² Nafitali puolŋuani siiga, bi den cɔdi ya jaba n pia bina piilie, bii, ki maani, ki ba fidi ki gedi tɔbu kuli, yeni bi yaaja cugli yeni o diegu. ⁴³ Bi den cɔdi Nafitali buolu nni, jaba tuda piimu n tuda taa n jaba kobina (53.400). ⁴⁴ Moyiisi yeni Haarɔn den cɔdi li niba kuli, ki taani yeni ya piiga n jaliedba yaaba n tie bi buli yudanba yeni Israyeli yaaba siiga. ⁴⁵ Lanwani ii, Israyeli jaba yaaba n den pia bina piilie, bii ki cie, yaaba n ba fidi ki gedi tɔbu kuli, bi den cɔdi ba bi buolu yeni bi cuga yeni bi diedi nni i. ⁴⁶ Bi den cɔdi bikuli, ki la jabatuda kobiluoba n tuda taa n kobimu n jaba piimu (603.550). ⁴⁷ Ama, bi den ki cɔdi Lefi buolu puolŋuani jaba, ⁴⁸ Kelima O Diedo den yedi Moyiisi, ⁴⁹ "Yin da cɔdi Lefi buolu ya niba, ki da taani ba Israyeli nitaanli kuli cɔli nni. ⁵⁰ Ama, yin puogi Lefi buolu yaaba a ñɔmaatana kpagu gbandieli yeni li tuonsɔntiadi yeni yaali n sieni kuli kubma yeni li niinni tuona. Lefi yaaba n baa tugu li gbandieli, bani n baa tugi li gbandieli tiabobinkaadi. Bani n baa kubi, ki fiini li gbandieli nni. Lefi buolu yaaba ń yi kpaa bi diedanjondi, ki lindi li gbandieli. ⁵¹ I ya bua fii, ki gedi kaantianu, Lefi yaaba n ba tugi li gbandieli. I ya pundi yin caa naani, Lefi yaaba n ba kpaa li gbandieli. Nibuoltɔa yua ya nagni li gbandieli kani, o ba kpe i. ⁵² Israyeli yaaba ya ba kpaa bi diedanjondi, yuakuli ń kpaa, ki kua ki nagni o buolu yaaba tɔcagli tuudcabli ń caani naani i. ⁵³ Ama, Lefi buolu yaaba wani ń kpaa bi diedanjondi ki nagni, ki lindi a ñɔmaatana kpagu gbandieli, lani n tie, N pabienli ń da fii, ki do Israyeli yaaba yuli po. Lefi buolu yaaba n baa kubi, ki fiini a ñɔmaatana kpagu gbandieli, li bonbaanbidi yeni li tuona nni kuli." ⁵⁴ Israyeli buolu yaaba den tieni O Diedo ń den puogi ba, ki waani Moyiisi ke ban tieni yaali kuli.