¹ O Diedo den maadi yeni Moyiisi, ki yedi, ² "Sɔni bi jaba ban ban kpaagi, ki gɔndi Kanana diema, Min puni Israyeli nitaanli ya diema yeni. ŋan sɔni buolu nni kuli niyendo. Ya ja n ba gedi kuli baa tie o buolu yaaba yudaano i." ³ Moyiisi den sɔni Israyeli buoli yudanba, ke bi ñani Parani fanpienma nni, ki cɔlni O Diedo ñɔbonli ki gedi nani wan yedi maama. ⁴ Yaaba n den gedi li tondu yela n ne: Rubeni buolu nni, Sakuri bijua Camuwa; ⁵ Simeyɔn buolu nni, Hori bijua Cafati; ⁶ Juda buolu nni, Jefunehi bijua, Kalebi; ⁷ Isakari buolu nni, Josefi bijua, Igali; ⁸ Efrayimi buolu nni, Nuni bijua, Hoceya; ⁹ Benjamina buolu nni, Rafu bijua, Paliti; ¹⁰ Sebuloni buolu nni, Sodi bijua, Gadiyeli; ¹¹ Josefi bii Manase buolu nni, Susi bijua, Gadi; ¹² Daani buolu nni, Gemali bijua, Amiyeli; ¹³ Asiheri buolu nni, Mikayeli bijua, Seturi; ¹⁴ Nafitali buolu nni, Fofisi bijua, Nahibi; ¹⁵ Gaadi buolu nni, Maci bijua, Gewuyeli. ¹⁶ Moyiisi ń den sɔni yaaba ke ban ban kpaagi, ki gɔndi mi diema yela n yeni. Moyiisi den lebdi Nuni bijua, Hoceya, ki yini o Josuwe. ¹⁷ Moyiisi den sɔni ba ke ban ban kpaagi, ki gɔndi Kanana diema, ki yedi ba, "Yin tɔgni niganu po, ki kua mi diema nni, ki gedi, ki do hali a juana diema nni. ¹⁸ Yin kpaagi mi diema tinfanma ń tie maama, yin diidi mi niba yaaba n kua mi niinni ń tie maama, bi tie paatieba bii, talginba i, bi yabi bii bi waa i. ¹⁹ Yin kpaagi ki diidi li dogu ń tie maama, li diema ŋani bii maa ŋani i. Bi dogi tie ledi i? Li dogi tie jondi bii, i pia a bilinguona i? ²⁰ Yin diidi li diema tinga ya kpiagi bu kpaabu po, ki diidi i tiidi ye mi niinni bii yii ye i. Yin paani i pala ki guani ne yeni li diema bonluonkaali." Li yognu den tie a bonkpiala kpaangu taama i. ²¹ Lanwani ii, li jaba den gedi, ki ban kpaagi, ki gɔndi Kanana diema, ki cili Sini fanpienma nni, ki ban pundi hali Rehobi, kaa fagi yeni Lebo Hamati. ²² Bi den tɔgni niganu po, ki kua, ki ban pundi hali Hebrɔn. ki gedi Ahima, Cecayi yeni Talimayi buoli yaaba, Anaki buolu puolŋuani mo den kua mi niinni. Hebrɔn dociamu den maa, ke li tieni bina lele i, ke Ejipti diema nni, Suwani dociamu mo maa. ²³ Ban den pundi Ecikoli jualɔngu nni, bi den cua ku daamɔngu tiidi bena yeni i luana bonjɔna. Bi den tieni nani lianga yeni, ke niba lie tugi li bana yeni li bonjɔna. Bi go den cie Grenadi bonluana yeni a kankana mo ki ba guani yeni a. ²⁴ Bi den yini li kaanu Ecokoli, kelima Israyeli yaaba ń cua ya bena yeni a bonjɔna yeni yapo. ²⁵ Bi den tieni dana piina i ki kpaagi, ki gɔndi mi diema, ki guani bi jondi nni. ²⁶ Bi den guani Parani fanpienma nni, Kadici dogu nni, Moyiisi, Haarɔn yeni Israyeli nitaanli kuli kani. Bi den togdi ba ban kpaagi ki la yaali, yeni ban cie li diema nni, ya bonluonkaali ki guani bi jondi nni. ²⁷ Bi den yedi Moyiisi, "Ti den pundi ŋan den sɔni ti ya diema nni. Li tie mɔni ke mi naaŋanma yeni ti siadi n puubi li diema nni. Tin baa ya bonluonkaali li diema nni ki guani yeni li n yeni. ²⁸ Ama, ya niba n kua li diema nni tie paatieba i. Bi dogciami yabi, ki go pia a bilinguona. Ti go la Anaki puolŋuani lipo. ²⁹ Amaleki yaaba kua u niganu po, Hititi yaaba, Jibusi yaaba yeni Amori yaaba wani maa bi diena a juana nni i. Kanana yaaba wani kua ki balni mi ñincianma yeni Jurden kpenjaali po i." ³⁰ Lanwani ii, Kalebi den cedi ke yaaba n ye Moyiisi kani ki maadi yeni suoni, ke o yedi, "Tin gedi ki do ki kɔni ki paadi li diema, kelima, ti pia ya fidu n ba paadi, ki diedi li diema." ³¹ Ama, ya jaba n den yegi yeni o yeni, den yedi, "Ti ki pia ya fidu n ba tuogi ya diema ne niba, kelima, bi pia mi tuama ki cie ti." ³² Lanwani ii, bi den cili ki maadi, ki togdi Israyeli nitaanli ban den la ke mi diema tie maama. Bi de yedi, "Ti gedi ki kpaagi ya diema ne tie ya diema n di, ki bolindi ya canba n kua mi niini i. Tin la ya niba li diema nni kuli tie nicianbuolu niba i. ³³ Ti la li diema nni Anaki buolu puolŋuani, bi tie nicianbuolu i. Tinba mɔno den diidi ki sua ke ti tie nani ñancadmu i bi nintuali. Bani mɔno den nua ti ke ti tie nani ñancadmu i bi nintuali."