¹ Moyiisi den taa pua, ke o tie Kucihi ya pua. Lanwani ii, Miriyama yeni Haarɔn den bulini, ki gagi yeni Moyiisi, wan kuani Kucihi pua yeni po. ² Bi den tua, "O Diedo maadi yeni Moyiisi baba yo oo? O ki maadi yeni tinba wani ii?" O Diedo den gbadi ban yedi ya maama. ³ Moyiisi den tie ya nilo n pia li yumiinli, ki cie nilo kuli ki tinga po ne. ⁴ O Diedo den yini Moyiisi, Haarɔn yeni Miriyama: "Cua mani u kadkaanu gbandieli kani na." ⁵ Lanwani ii, O Diedo den jiidi ku muñiigu yeni ti talwadi nni. O den sedi li gbandieli bulñɔbu kani, ki yini Haarɔn yeni Miriyama. Ke bani bilie kuli nagni. ⁶ O Diedo den yedi, "Mɔlane, yin cengi n maama. Sawalpualo ya ye i siiga, n yi dɔgdi ti dangidi nni i, ki maadi yeni o. ⁷ N naaciemo Moyiisi wani ki tie yeni ka. O tie min dugi yua yapo, ku diegu nni. ⁸ N maadi yeni o yeni n nialu i, ama dangidi nni ka, bonlakaali nni ka. O yi nua n nannanli. Be yapo i ke i fali, ki bulni ki gagi yeni n naaciemo, Moyiisi?" ⁹ O Diedo pali den biidi bipo, ke o den fuadi ki gedi ki ŋa ba. ¹⁰ Ti talwadi den kagdi li gbandieli po, ke bi diidi ki sua ke Miriyama wani ji pia mi gbaadma i. O gbanu po den fii bonlegpiena i. Haarɔn den gbagi ki sua ke Miriyama wani ji ti gbaado i. ¹¹ Haarɔn den yedi Moyiisi, "Hain, n canbaa, n mia ŋa ke ŋan da taa ya tuonbiadi ne tagli ki tugni ti yula po. Ti maadi yanluomaama i, ki tieni ti tuonbiadi. ¹² N mia ŋa ke ŋan da cedi Miriyama gbanu ń wudi nani ban mali ya bikpienga ke ki gbanu bɔgdi ki bedi kan ñani ki naá tugu nni ya yognu yeni." ¹³ Lanwani ii, Moyiisi den jaandi ki mia O Diedo, ki yedi, "N mia ŋa sugli, O Diedo, ke ŋan tebi o, n Diedo U Tienu." ¹⁴ O Diedo den yedi Moyiisi, "Miriyama báa ya bi cidi o nunga nni, o kan bi ya ye yeni i fee yeni ti jɔgindi hali dana lele ka aa? Deli ki ñani o mani ti jondi nni, wan tieni dana lele. Lani ya pendi, yin cabi o wan guani ki kua." ¹⁵ Lanwani ii, bi den deli Miriyama, ki ñani o ti jondi nni, ke o tieni dana lele niinpo. Li nitaanli den guudi ke o guani ki kua ti jondi nni yo, ke bi fidi ki fii, ki paani li cenli. ¹⁶ Li nitaanli den yuadi ki fii Hseroti diema nni, ki gedi ki ban caani bi jondi Parani fanpienma nni.