¹ Ágàì, ənyɔnúɖɛ́tɔ́, Zàkárìcá, Iddo yə́ vi, ənyɔnúɖɛtɔ́ wó núnyɔnɖɛ́ nɛ́n yùuɖatɔwó kə lə yùudà kídə́ Yèrusalɛ́ɛ̀m, lə Israël Mawu yə́ ŋ́kɔ́ mɛn. ² Lə ŋúnaán Zorobabel, Scealthiel yə́ ví, Yòósuaé cá, Jotsadak yə́ ví, wó có í tɔ́ Mawu xɔa mɛnmɛn. Mawu yə́ nyɔnúɖɛ́tɔ́wó kə jí nɛ́nwókpɔ́á lɛ kídə́wó. ³ Lə gàŋunan men tútútúá, Thathnaï, Gouverner lə ə̀tɔa yə́ kpáiláxóá, Schethar Boznaï, kídə́ wó hádɔ́wɔtɔ́wó, wó vá wógbɔ́ í lə núnenwó bə́: Mɛɛ́n í ɖəgbə̀ nɛn mi bə́ mian tù xɔa í tɔ́ wó giriwó mɛnmen yì ji kóo? ⁴ Wó nú nɛ́nwó zə̀ɖə̀ká kə́ bə́: Amɛn kə lə tùxɔɔlá wó ŋ́kɔ́ ɖee? ⁵ Vɔ̀à Mawu yə́ ŋkúví lə nɔnŋun də́ yùuɖà tɔwó mɛncinciwó ŋún. Í wó gbə́wó ɖɛ́ í wó yi ə̀dɔ̀á wó jí gàkəmɛn wó cɔ́nànán nyányán yi nɛ́n Darius í kə́kə́ gàkəmɛn wó xɔ wéma càgbə ŋunantɔa. ⁶ Wéma yə́ cɔ́pì yi nén ə́fiɔ Darius tó Thathnaï ji, gouverneur lə́ ə̀tɔa yə́ kpáalə́xó. Schether Boznaï, kídə́ wó hadɔ́wɔtɔwó kə có Alpharsae, kə lə ə̀tɔa yé kpáalə́xóá. ⁷ Wó cɔ́ ənyɔn lə́də́ ə̀douáwó: nɛ́n ə̀fiɔ Darius sigbə, mí cíwo! ⁸ Ǝ̀fiɔ nán nyán bə́ mí yi yúdà nútoa mɛn, lə Mawu gángán yə́ xóá mɛn wó lə mɛɛn kídə́ ə̀kpə́ kpaka wó,í àtíá lə nɔn ə̀gìrìà wo mɛn; ə̀dɔ̀a lə zɔ́n kábákábá í lə jəjí lə wó lɔ mɛn. ⁹ Mí wɔ bìɔ̀bìɔ́ nɛn amɛn cincinwó, í mí xonu nɛ́n wó lə́: Mɛɛ́n ná mi mɔ́ ɖədə bə́ mian tù xɔa í mɛn yə́ giriwó yìji? ¹⁰ Mi bíɔ́ wó ŋ́kɔ́ cá nɛ́n nàn dəsiwó, í mí ŋɔrɔn ŋúncu kə lə̀ tanóóá wóɔ́kɔ́. ¹¹ Min kpɔ́ ɖòŋúntí kə wó wɔ nɛ́n míán kə́: Míán wó í nyín ə̀ji kídə́ anyíngbán yə́ Mawu sɛntɔ́wó, í mí trɔ́ lə tùxɔ kə wó mɛn váyi ə́wɔ ə̀xo sùgbɔwó váyi kə̀; Ísràɛ́lì fiɔ gánŋ́gan tui í vɔɛ váyi ɖécá. ¹² Vɔ̀à kə míán dadáwó dó xomɛnfíɛ́n nɛ́n jìŋkorí yə́ Mawu yə́ ŋgbə́á, ə́ tacíwó də́ alɔmɛn nɛ́n Nebucadnetsar, Babylone fiɔ, Chald tɔ́á, kə gban àhɔ́á í kpɔrɔ ə̀dùvìwó lə̀lə́xó lə Babylone. ¹³ Gàsíágàmɛ̀n an, Cyrus yə́ xo kélékéléá, Babylone fiɔ, ə̀fiɔ Cyrus nánɛ́ngbə̀ bə́ wóá trɔ́ mɛn Mawu xɔa. ¹⁴ Í cáá ə̀fiɔ Cyrus ɖə cicá kídə́ ə̀ho nú zánzánwó kə nyín Mawu xɔmɛn tɔa do lə Babylone yə́ dəxoxɔamɛn, kə Nebucadnetsar dədo lə Yèrúsalɛ́ɛ̀m yə́ ɖəxoxɔamɛn í dró sə́ yi Babylone yə́ ɖəxoxɔamɛ, í lɔ́wó sə́ jónɛ́n amɛn kə wó yɔ́nɛ́n bə́ Scheschbatsar, kə ì sə́ ɖó gouverneur à, ¹⁵ Í ì nùnɛ́ɛn bə́: cɔ́ ənúzánzán wó, yuìivɛ cɔ́wó də́ Yə̀rúsalɛ́ɛ̀m yə̀ ɖəxoxɔamɛn, í wóá gbə trɔ mɛn (tu) Mawu yə́ xɔa lə tohó kə ì nɔn ɖə́cá váyia. ¹⁶ Scheschbatsar ŋnan vá, í ì ɖo Mawu xɔa yə́ gɔ̀mɛ̀n dòkpə́á anyín lə Yə̀rúsalɛ́ɛ̀m; có kə́kə́ gàŋunamɛn vá nán ə́gbaá wó lə tui, í ŋ́ vɔ hàɖo o. ¹⁷ Ífia, nɛn Ǝ̀fiɔ kpɔ́ɛ nyɔŋ́gbián, míán wɔ ənumɛn kuku lə Ǝ̀fiɔ yə́ xómɛn lə Babylone, nɛn wóá kpɔ́ bə́ ə̀gbə̀ ɖəɖə ɖə́ có ə̀fiɔ Cyrus gbɔ nɛ́n Mawu xɔa tutu lə Yèrúsalɛ́ɛ̀m àn. Cá, nɛn ə̀fiɔ nán cɔ́ yə́ rɔnrɔn nɛ́n mi có ənyɔn ilá ŋún.