ATCHAMADO_BEN-aug_ezr_text

Ǝta 4

¹ Yuda kídə́ Benjamin yə́ kətɔ́wó sə bə́ amɛn lə́lə́ víwó lə tu gbədóxɔ Àxótɔ́, Israël yə́ Mawu. ² Wóvá Zorobabel kídə́ pomɛn fiɔwó gbɔ́, í lə nú nɛ́n wó bə́: Míán tui kídə́ mi; ɖó, sigbə nɛ́n wó bə́: Míán tui kídə́ mi; ɖó sigbə mian wó ənɛn, mí lə yɔ́ mián Mawu, í lə wɔ vɔ̀sáwó nɛn có kə́kə́ Ésar Haddon yə́ gamɛn, Àsírìà fiɔ, kə ɖómi ɖíɖá ləláá. ³ Vɔ̀à Zorobabel, Yòósùà, kídə́ Israël yə́ pomɛn fiɔwó, ɖóŋún nɛ́n wó bə́: míán tui míán ŋ́tawó ɖə̀ɖə nɛ́n Àxótɔ́á, Israël yə́ Mawu, sigbə ə̀fiɔ Cyrus, Persia fiɔ ɖóe nɛ́n mí ənɛ́n án. ⁴ Gàhunan mɛn án ə̀dùà mə tɔ́wó lə kúranmɛn nɛ́n yùúɖà vìwó; wó lə dó vɔ̀nvɔ́n nə́wó nɛ́n xɔtutua, ⁵ Í wó náànho ə̀fiɔ yə́ ŋ́tíməwó bə́ wá sə́ dáànhɛn Mawu yə́ gbədóxɔ tutu dɔ́á mɛn. Wó wɛ ənɛ́n lə Cyrus yə́ gamɛn kə́ŋ́kə́ŋ́; Pɛ́rsìà fiɔ, í sə́ nán Darius, Pɛ́rsìà fiɔ yə́ gánɖuɖu gamɛn. ⁶ Ǝ̀fiɔ Assuérus gamɛn, kə ì jə ə̀ganɖuɖu gɔmɛn án, wó wrɔn fɔ́nbúbú də́ yùuda kídə́ yə̀rúsalɛm dumɛn víwó ŋún. ⁷ Í lə Artaxerxès, Bischlam, Mithredath, Thabeel, kídə́ wó hádɔ́wɔtɔ́ kpɛtíáwó gamɛn án, wówrɔnnú nə́ Artaxerxès, Pɛ́nsìà fiɔ. Wó trɔ́ lɛ́tàà də áràm gbəmə í ɖəgɔmə də́ áràm gbəmɛn. ⁸ Guvɛrnɛr, Rehum, wóéma wrɔntɔ́ schimschaï wrɔn lɛ́tà kə gbɔnɔn an nɛ́n ə̀fiɔ Artaxerxès kudə́ yə̀rúsalɛ́m ŋum: ⁹ Guvernɛr, Rehum, Schimschaï, ənúwrɔtɔ́, kídə́ wó hádɔ́wɔtɔ́ kpɛtíáwó, Din, Arphasathac, Tharpel, Apharas, Erec, Babilone, Suse, Déha, Elam tɔ́wó, ¹⁰ Kídə́ dùkɔ́ kpɛtíáwo kə amɛngan amɛnŋ kúta Osnappar kíkə́ va wo í cɔ́wó də́ Samaria kidə́ ə̀dù kpɛtíá wómɛn lə àkpáaláxó nɛ́n ə̀tɔa. ¹¹ Ilá í nyín fotò ɖəɖə nɛ́n lɛ́tàà kə wó cɔ́ ɖúɖá ə̀fiɔ Artaxerxès à: tɔɔ̀ kpə́ɖə́ŋ́títɔ́wó, amɛn kə lə àkpá ilá xó nɛ́n ə̀tɔa, ¹² Ǝ̀fiɔ nán nyán bə́ yùúɖà vi kə co ə̀ gbɔwo vá míán mɛn lə yə̀rúsalɛ́m an lə tu ə̀dù có də́ ə̀dùŋu kídə́ kə nyrànkúá, lə ɖó ə̀gìwo í lə jra gɔ̀mɛ̀n dòkpə́à wódó. ¹³ Ǝ̀fiɔ nán nyán bə́, nɛ́n wó trɔ́ tu ə̀dùà í kɔ́ ə̀grìàwo yìjìá, wó nán gbə tú əhòɖə́, nɔ̀mí ə̀tahó, nɔ̀mí əmɔ́njí hóɖə́ ò, kə á wɛɛ bə́ ə̀dùhò nán rə́rə́ ò. ¹⁴ Vɔ̀à, kə ì nyìn bə́ ə̀fiɔ xomə í mí lə ɖunú ləá í kə ŋ́ jə bə́ bùbù nán có lə̀ ə̀fiɔ jí oá, mí lə cɔ́ nyànyàn nánánwó nɛ́n ə̀fiɔ. ¹⁵ Wá wɔ ənúməkuku lə tɔɔ́ dadáwó ŋunɖó yə́ wéma mə; í aàkpɔ́ í də́də̀sì lə ŋunɖó yə́ wéma mɛn bə́ ə̀dùulá nyín ə̀dù kə ŋ́ bunɛn amɛn ŋkútawó í, kə hɛn nɛn ə̀ta voɛ́n vá nɛ́n ə̀fiɔ wo kídə́ ə̀dù màmán kélékélé tɔwó, í kəcɔ́ ɖə̀əkia nán àglaán jəjə có kə́kə́ blə̀màmɛn. ¹⁶ Ǝnú kə nán í wó crɔ́n ə̀dùà vayi nɛ̀n. Mí nán ə̀fíɔ lə nyán bə́, nɛ́n wó tu ə̀dùà í trɔ́ ɖó ə̀grìàwo á, cóinan ŋún nàn gbə xɔ ə̀tɔa yə kpáalá xó ò. ¹⁷ Ǝ̀fiɔ yə́ ŋúnɖóɖó nɛ́n Rehum, Gouverneur, lə Schímschaï, wéma wrɔ̀ntɔ̀ kídə́ wó xɔ́rɔ kpɛtíáwó, kə lə sàmárìà kídə́ tohó kpɛtíáwó lə ə̀tɔa yə́ kpáŋnaxó: ŋcí mi. ¹⁸ Wéma (Lɛ́tà) kə mi wrɔn díɖá ŋ́ŋán wó hrɛn pɛ́pɛ́pɛ́ lə tiŋ́ŋkɔ. ¹⁹ Ŋɖəgbə̀ bə́ wóá wɔ ə́númɛn kukuwó; í wó kpɔɛ̀ bə́ ɖécá xóxó hoenuan ə̀dùulá có də́ ə̀fiɔ wó ŋún, í wó cɔ́ wóɖə́kiwó nɛ́n hùnyàhùnyà wɔwɔ kídó còcó də́ amɛn ŋún. ²⁰ Ǝ̀fiɔ sɛ́ɛnŋúnwó nɔn yə̀rúsalɛ́ɛ̀m vayi kpɔ́, kə də́ ə̀dùà ji lə ə̀tɔa yə́ kpáŋunuxó, kə wó túnɛ́n ə̀dùho, ə̀tahó, kídə́ vàváyi hó nɛ́n wóá. ²¹ Có ŋunaŋúán, mi ɖəgbə̀ bə́ wá nɔ̀ntə amɛn ŋunanwó dɔ́wɔwɔ, càgbə wóŋ́ ká gbə tu ə̀dùulá gbɔ̀xó mán ɖəgbə̀ ò. ²² Min ŋ́ káa dóòvɛ nɛn ənyɔn ŋnana ò, kídə́ vɔ̀nvɔ́n bə ə̀voɛn ŋ́ káa jə ə̀fiɔwó sə́ də́də́ ŋgbə́ ò. ²³ Zə̀ɖə̀ká-zə̀ɖə̀ká kə wó hɛnrɛn wéma nɛ́n əfiɔ Artaxerxès lə Rehum, scimschaï, wéma wrɔn tɔ́á, kídə́ wó xɔ́rɔ wó, wóyi yərusalɛ́m àfɔjí-àfɔjí lə yùɖà tɔ̀wó gbɔ́, í nán í wódɔ́wó nɔ̀ntə kídə́ àkpásɛnsɛn də́ ə̀gànŋún-ə̀gànŋún. ²⁴ Zə̀ɖə̀káá Mawu xɔ dɔ́á nɔ̀ntə lə Yèrúsalɛɛm, í ì nɔ̀ntə kə́kə́ nɛ́n ə̀xo vààtɔ̀ lə Darius yə́ fiɔɖugamɛn, Pɛrsìà fiɔ.