¹ Yehowa tonɛ Mɔse , be: ² Nɛ amɛɖe dapu yi ŋdewɔ nutexoe ɖoɖa yehowa gbɔ , le nutsinɛ yidaɖo nɔvia gbɔ, alo enuɖe tsinɛ yidaɖo gbɔ, enuɖe tsi wofĩn alo wobɛɛ , ³ vɔ yigbebe yeŋdekpɔ enububualɔ , alo tanu ɖadje le enuɖe tsinɛ lahin nuvuĩn ŋtsi valɔ; ⁴ nɛwɔ nuvuĩn lexa lɔ, yidje agɔ lɔ , elatrɔ enu tsinɛ yifĩn alo yiba amɛa na, enutsinɛ wosɔ daɖo gbɔ, enutsinɛ bu yi yitrɔkpɔ, ⁵ alo enutsinɛ ŋtsi yita enu ɖoa . Elatrɔɛ sɔna keŋkeŋ, yi yilasɔ enua yo akpa atɔnlia daɖodji, yi yilasɔna enutɔlɔ, le gbetsigbe ŋtɔ yilasɔ nuvuĩn vɔsa sɔva. ⁶ Elasɔ agbo tsinɛ ŋtsi kɔ sɔvanɛ nunɔnla ɖo yo nuvuĩn ta nɛ Yehowa, agbo tsinɛ yilasɔ le elankpoa mɛ , le axo nukpɔkpɔ nu. ⁷ Yi nunɔnla lawɔ nuvuĩnɖeɖeɖa yo avɔsa nii le Yehowa yo ŋkumɛ, yi wolasɔ yo nuvuĩn kii, ŋde kănɛ avodada tsinɛ yiwɔɔ. ⁸ Yehowa xonuxo kudo Mɔse yinu be: ⁹ Do ese nɛ Aarɔn kudo eviawo , yi nanu be: Eyɛ yinyi numɛmɛvɔsa ke. Numɛmɛlɔ lanɔn adokpoa dji le avɔsakpea dji le zămɛ kakavana enukeke, yi ezo lanɔn bibiɔ le avɔsakpea dji. ¹⁰ Nunɔnlalɔ lado yo awu vlaya ɣea lɔ, yi yilado agboŋtɛa ɖo ŋtsi, elaɖe afĩnfĩn tsinɛ ezoa sɔfiɔn numɛmɛa le avɔsakpea dji, yi yilasɔ daɖo axadamɛ nɛ avɔsakpea. ¹¹ Yi le yo ŋgbodomɛlɔ, elaɖe awuawo yi yilado ebuwo, tsinɛ yilasɔ sɔ afĩnfĩnlɔ sɔyi enuagodo le texoe kɔkɔɛ. ¹² Ezoa lakpɔtɔ nɔnbibiɔ le avɔsakpea dji, yi ŋde dja tsi O; ŋdekɛnyĩn sia ŋdekɛnyĩn lɔ, nunɔnla lado anake zo, eladjra numɛmɛa ɖo, yi yilatɔzo akpedavɔsa yo amia. ¹³ Ezoa lakpɔtɔ nɔnbibiɔ le avɔsakpea dji, yi ŋde dja tsi O. ¹⁴ Eyɛ yinyi nuɖuɖuvɔsa lɔ ke. Aarɔn yo viwo lavanɔnte ɖo avɔsakpea yo ŋkɔ , le Yehowa yo ŋkumɛ. ¹⁵ Nunɔnla laku ewɔ alɔto ɖeka kudo ami, yi yilasɔ afĩnfĩnlɔ kpata bɔɖo nunana ŋtsi, yi yilatɔzoe le avɔsakpea dji sigbebe ŋkuɖodjinu vɔsa tsinɛ huĩnɔn lilili nɛ yehowa. ¹⁶ Aarɔn kudo eviawo laɖu nunana kpɛtɛa ; wolaɖui mahuan mahuan, le texoe kɔkɔɛ, le Mawu yo agbadɔ yo kpamɛ. ¹⁷ Woŋda mɛŋ kudo yesi O. Woatɔ tsinɛ ŋsɔ nawo le nunanawo tsinɛ womɛ kudo ezoa nɛ. Enyi enukɔkɔɛ, sigbebe nuvuĩnɖeɖeɖa yo avɔsa kudo agɔdje vɔsa nɛnɛ. ¹⁸ Aarɔn yo vi nusuviwo kpata laɖuii. Eyɛnyi ese tɛgbɛtɛgbɛ, le nunana tsinɛ womɛŋ le Yehowa yo ŋkumɛ: Amɛɖekpekpe tsinɛ latɔ alɔɛ ɖolanɔn kɔkɔɛ. ¹⁹ Yehowa xonuxo nɛ Mɔse, yinu be: ²⁰ Eyɛ yinyi avɔsa tsinɛ Aarɔn kudo eviawo lawɔ nɛ Yehowa ke, le gbetsigbe yi wolaxɔ amisisi: Ewɔ mɛmɛŋ afan yo mamamɛ ewolia, sigbebe nuɖuɖuvɔsa, mamamɛ le ŋdekɛnyi yi mamamɛ le woetrɔ. ²¹ Wolaɖɛɛ le aklagbămɛ kudo amia, yi wolasɔɛdjo tɔtɔ; wolasɔɛ fian tɔtɔ gbɔxoe laflii sigbebe nuɖuɖuvɔsa tsinɛ lahuĩnɔn lilili le Yehowa yo ŋkumɛ. ²² Nunɔnla tsinɛ laso Aarɔn yo viwo domɛ lɔ, laxɔ amisisi gbɔxoe lanɔn yo texoea, tsan lawɔ lexa yo nunana. Eyɛnyi ese tɛgbɛtɛgbɛ le Yehowa yo ŋkumɛ: Wolatɔzoe keŋkeŋ . ²³ Wolatɔzo nunɔnla ɖekpekpe yo nunana keŋkɛŋ ; woŋda ɖuii O. ²⁴ Yehowa xonuxo nɛ Mɔse, yinu be: ²⁵ Tonɛ Aarɔɔn kudo yo viwo , be: Nuvuĩnɖeɖeɖa vɔsa yo se ke. Wolawu nuvuĩn yo vɔsa le afisti yi wolawu numɛmɛvɔsa le, le Yehowa yo ŋkumɛ; ɖo nukɔkɔɛ yo nukɔkɔɛ yinyi. ²⁶ Nunɔnla tsinɛ lawɔ nuvuĩnɖeɖeɖa yo avɔsa , kpɔmɔn be yaɖuii le texoe kɔkɔɛ, le Mawu yo agbadɔmɛ yo kpamɛ. ²⁷ Amɛsiamɛ tsinɛ latɔ alɔɛ ɖolanɔn kɔkɔɛ. Nɛ ehun kɔɖo yo awumɛ lɔ, texoe tsinɛ yi ehuan kɔɖo lɔ, wolanyɛŋ le texoe tsinɛ kɔ. ²⁸ Wolagban kɔgban tsinɛ mɛ wotɔ enuan le; nɛ gadjĩn yo agban lɔ, wolklɔɛ kudo esi. ²⁹ Nunɔnla nusu ɖekpekpe laɖuii: Enu kɔkɔɛ yinyi. ³⁰ Ganke woŋda ɖu nuvuĩnɖeɖeɖa yo avɔsa tsinɛ yo ehun wolasɔ yi Mawu yo agbadɔ mɛɔn, be woasɔ ale avun le agbadɔa mɛɔn: Wolatɔzoe bohuŋ.