¹ Yehowa yɔ Mɔse; le Mawu yo agbadɔa mɛ, yinu nii be: ² Tonɛ Izraɛlviwo, yi nanu nɔnwo be: Nɛ amɛɖe le miadomɛ lawɔ nunana nɛ Yehowa lɔ, nɛsɔ enyiŋ alo alĩn vasa avɔa. ³ Nɛ enyi yi yisɔ be yasɔwɔ numɛmɛ vɔsa lɔ, ke elanyi asu tsinɛ afiɖe ŋde kănɔn; yi yilasɔɛ sɔva Mawu yo agbadɔa nu, le Yehowa yo ŋkumɛ, benɛ yaku ŋzizi nii. ⁴ Elasɔ alɔ daɖo numɛmɛ yo vɔsa tamɛ, ke eladjɔdji nɛ Yehowa yi yilaklɔ yo nuvɔn tsile ŋtsi ɖoɖa. ⁵ Elado ewui vemɛ nɛ enyia le Yehowa yo ŋkumɛ; yi nunɔlawo, Aarɔn yo viwo lasɔ ehunlɔ hlĩn trɔdo avɔsakpe tsinɛ le Mawu yo agbadɔa yo ŋkɔ. ⁶ Elako numɛmɛvɔsalɔ, yi yiladjɛɛ ekɔn ekɔn. ⁷ Nunɔnla Aarɔn yo viwo lado ezo ɖo avɔsakpea dji, yi wolafɔ anake daɖo ezoa dji. ⁸ Aarɔn yo viwo tsinɛ nyi nunɔnlawo, lafɔ elan tsiwo dja, eta kudo amia, ɖo ezo nakea dji le vɔsakpea dji. ⁹ Elaklɔ adɔmɛnuawo ku atawo le esimɛ; yi nunɔnla lafiɔn ekpata le vɔsakpea dji. Ɖo numɛmɛvɔsa yɔ, ezo vɔsa , tsnɛ huĩnɔn nɛ Yehowa yɔ. ¹⁰ Nɛ yo numɛmɛvɔsa nyi alĩn alo egbɔ , alo agbowo lɔ elasɔ asu tsinɛ ŋtsi kɔ sɔva. ¹¹ Elawui ɖo gɔmɛgbedji nɛ avɔsakpea , le Yehowa yo ŋkumɛ; yi Aarɔn yo vi nunɔnlawo, lahlĩn ehuan trɔdo avɔsakpea. ¹² Eladjaɛ kpolivi kpolivi; yi nunɔla lasɔɛ ku eta kudo amia daɖo ezo nake tsile avɔsakpea dji. ¹³ Elasɔ esi kpasa yo adɔmɛnuawo kudo atawo; yi nunɔnla lasɔ ekpata sɔsa avɔ , yi yilafiɔn elan le avɔsakpea dji. Numɛmɛvɔsa, tsinyi ezovɔsa , tsinɛ huĩnɔn lilili nɛ Yehowa yɔ. ¹⁴ Nɛnyi xevi yibe yasɔ savɔ nɛ Yehowa lɔ, elasɔ plepleluwo alo ahɔnɛviwo sɔva. ¹⁵ Nunɔnla lasɔ xevia savɔ ɖo avɔsakpea dji; elahun kudo efɛn nii, yi yilatɔzoe ɖo avɔsakpea dji, yi yilaɖuɖu yo hun ɖo avɔsakpea yo akpaɖeka dji . ¹⁶ Elaɖe yo adɔgbovi kudo efʊnwo ɖoɖa, yi yilasɔɛ daɖo avɔsakpea yo akpaɖeka, le woezexoe godji, le texoe tsinɛ wosɔnɔn afĩnfĩnwo kɔnɔnɖo le. ¹⁷ Elafɛn yo awuadawo, tsinɛ ŋda ɖele ŋtsio; yi nunɔla lafĩɔn xevia le avɔsakpea dji, le ezo tsikpoa dji. Numɛmɛvɔsa tsinɛ nyi ezovɔsa , tsi djɔnɔndji nɛ yehowa yɔ.