1 Nɛ amɛɖe be yasɔ nuɖuɖuvɔsa vanɛ Yehowa lɔ, ke elasɔ ewɔmɛmɛ lasɔ savɔ lɔ; elakɔ ami ɖodji, yi yilasɔ lĩnfĩn sɔkpee. 2 Elasɔɛ sɔva nɛ nunɔlawo, Aarɔn yo viwo; nunɔlalɔ lasɔ ewɔ alɔtogoi ɖeka, tsinɛ dji amia le, kudo lĩnfĩnlɔ, yi yifiɔnwo kpata le avɔsakpea dji sigbebe ŋkuɖodjinu nɛnɛ. Azizɔ vɔsa tsinɛ huinɔn lilili yinyi nɛ Yehowa. 3 Enu tsinɛ lakpɔtɔ lanyi Aarɔn kudo eviawo tɔ; enukɔkɔɛ yo nukɔkɔɛ yinyi le ezovɔsa domɛ le Yehowa yo ŋkumɛ. 4 Nɛ wodjibe yasɔ nutsinɛ womɛnɔn le dokpomɛ sɔwɔ numɛmɛvɔsa lɔ, wolawɔɛ kudo amawɔɛ tsinɛ ŋde ɖo yesio, elatɛnŋ nyi aman tsinɛ amanwɔɛ mahuan mahuan le, akakla mɛmɛwo tsi wolakɔ ami ɖodji. 5 Nɛ wosɔ akaklɛ tsinɛ wotɔnɔn le agbămɛ be yasɔwɔ numɛmɛvɔsa lɔ, elanyi ewɔmɛmɛ tsinɛ dji wodo ami, tsinɛ yesi ŋde lemɛɔn. 6 Wolafli wuiwli, yi wolakɔ ami ɖodji; ɖo nuɖuɖuvɔsa yɔ. 7 Nɛ wobe yasɔ nutsinɛ womɛnɔn le gadjanu sɔwɔ avɔsa lɔ, elanyi ewɔmɛmɛ tsinɛ wokɔ ami ɖodji. 8 Wolasɔ nuɖuɖuvɔsa tsinɛ wolaɖa lexa sɔva nɛ Yehowa; wolasɔɛ sɔna nunɔla, yi yilasɔɛ va avɔsakpea dji. 9 Nunɔnla laɖe ŋkuɖodji tɔa ɖo akpaɖeka, yi yilafĩɔn yɛ le avɔsakpea dji. Zomɛmɛ vɔsa tsinɛ huĩnɔn lilili yinyi ne Yehowa. 10 Enutsinɛ lakpɔtɔ lɔ lanyi Aarɔn kudo eviawo tɔ; eyɛ nyi ezovɔsa tsinɛ le kɔkɔɛ ŋtɔ le Yehowa yo ŋkumɛ. 11 Miŋgbesɔ amawɔɛ huanhuan ɖekpe sɔwɔ nuɖuɖuvɔsa ɖekpe O, ɖoŋtsi woŋda tɔzo amawɔɛ huanhuan alo anyisi nuɖekpe nɛ Yehowa Ɔ. 12 Wolatɛnŋ sɔ nunana sɔna Yehowa sigbebe nunana gbantɔwo nɛnɛ; vɔlɔ woŋda sɔɛ sɔva avɔsakpea dji sigbebe nunana huĩnhuĩn lilili nɛnɛɔn. 13 Wolado edje nuɖuɖuvɔsa tɔwo wo kpata mɛ; ŋdagbe edje dodo axo nuɖuɖuvɔsa mɛɔn, etsi lanyi djesi nɛ nublabla Mawu tɔ; edje nɛnɔn axo vɔsawo kpata mɛ. 14 Nɛ wodjibe yasɔ axo agblemɛ nukuwo sɔwɔ nuɖuɖuvɔsa nɛ Yehowa lɔ, ke wolasɔ blafotsi yeyewo, tsinɛ wolatɔ le zodji kudo tsinɛ wolamɛ, sigbebe axo nuɖuɖuvɔsa tutugbantɔ nɛnɛ. 15 Wolakɔ ami ɖodji, yi wolasɔ lĩnfĩn kpeɖo ŋtsi; ɖo nuɖuɖuvɔsa yɔ. 16 Yi nunɔnla latɔzo blafo tutugbantɔ lɔ, tsinɛ dji ami lea, kudo lĩnfĩn lɔ kpata sɔna ŋkuɖodjinu . Ɖo ezovɔsa yinyi le Yehowa yo ŋkumɛ.