¹ Yerusaleem yo fiɔ, Adoni-Zedek se le tsi Yoshua xɔ Aï, yi trɔn dua gbidii, yi wu wo fiɔ sigbe letsi wowɔ nɔn Yeriko du ku yo fiɔ lɔ nɛnɛ. Ese tsan be Gabaontɔwo wa ŋtsifafa ku Israelviwo, yi Israelviwo xɔ wo ɖo woa domɛ. ² Enyɔn yɛ sɛnŋ do vɔnvɔn nɛ fiɔlɔ ŋtɔntɔ, ɖoŋtsia Gabaon yi du lolo sigbe fiɔdu buwo nɛnɛ. Gbewu lɔ, elolo wu Aï, yi duamɛ ŋsuwo kpata nyi kalentɔwo. ³ Lexa Yerusalem fíɔ, Adoni-Zedek dɔ amɛ ɖo ɖa Xebron-fiɔ Hoham, Yarmut-fiɔ Piram, Laxis-fiɔ ku Eglon-fiɔ Debir be: ⁴ Miva kpe do ŋtsinyɛ nɛ miaho ahua ɖo Gabaontɔwo ŋtsi doa eyi wa ŋtsifafa ku Yosua kuɖo Israelviwo. ⁵ Nɛnɛ Yerusalem-fiɔ, Xebran-fiɔ, Yarmut-fiɔ, Laxis-fiɔ ku Eglon-fiɔ, tsiwo nyi Amoritɔwo yo fiɔ amatɔn awo lɔ, bɔ wo ahuakɔwo ɖeka, yi woho va ɖe to do Gabaon-du yo kpe ahua. ⁶ Gabaontɔwo dɔ amɛ do ɖa Yosua le lɔmɛ le Guilgal be: amegan, ŋdegbe mi axo subɔlawo dɛ o, nɛsɔ nava kpe do mia ŋtsi. Va xɔ nɔnmi! Amaritɔwo yo fiɔ tsiwo kpata le towo dji lɔ ho ahua ɖo mia ŋtsi. ⁷ Lexa Yosua ku yi ahuakɔn kudo kalantɔwo kpata ho so Guilgal. ⁸ Yehowa to nɛ Yosua be: ŋgbevɔn wo o, ɖoŋtsi mana míaɖo woa dji. Wo domɛtɔ ɖeka tete tsan ŋdanɔn te ɖo ŋkɔ nɔn wo o. ⁹ Yoshua ku yo ahuakɔ lɔ zɔn zan do Guilgal va Gabaon yi wova xo ɖo Amoritɔwo dji. ¹⁰ Nɛnɛ Yehowa na wotrɔ yi Israelviwo ŋkɔ. Israelviwo wu wo nyamanyama le Gabaon, yi wonyan wo ɖo nu so toawo dji ɖi abo ɖo Bet-Xoron. Wokplɔ wo do nu wo wuɔ va sɛ ɖo kaka Azeka ku Makeda. ¹¹ Tsi wonɔ sisiɔ le Israel nu so Bet-Xoron nɔ abo ɖiɔ yinɔ lɔ, Yehowa na kpe gawo nɔ djadja so djipo sigbe esi nɛnɛ nɔn wo xoɔ va sɛ ɖo kaka Azeka yi wuwo sugbɔ ŋtɔ. Amɛ tsiwo esi kpea lɔ wu lɔ sugbɔ wu amɛtiwoe tsi isarelviwo yo wuinu. ¹² Gbe tsi gbe Yehowa na Israelviwo ɖu Amoritɔwo dji lɔ, Yosua xo nuxo Yosua to le Israelviwo ŋmɛ be: "ewue, nɔ te ɖo Gabaon ta mɛ! wletri, tɔ te ɖo Ayalon-bali lɔ ta mɛ!" ¹³ Nɛnɛ ewue nɔ te daɖɛ, yi wuetri nɔ te daɖɛ, va sɛ do etsime dukɔa biɔ hlɔn yo kentɔwo. Ɖe woŋdeŋlɔn nya yɛ wo ɖo Ame djɔdjɔewo yo xoma lɔ me oa? Etsi ewue do ta lɔ, etɔ te yi ŋdezɔn yi ɖo to o. Enɔ xɔn sigbe ŋkeke blibo nenɛ. ¹⁴ Lexa Yehowa wa do amegbetɔ yo gbe dji gbe xɔn gbe. Ŋkeke ɖekpekpe ŋdenɔ nenɛ kpɔo, yi ɖekpekpe tsan ŋdagbenɔn nɛnɛ kpɔ o, ɖoŋtsia yehowa nɔ Israelviwo dji wa ahua nɔnwo. ¹⁵ Le eyɛ ŋgbedomɛlɔ, Yosua ku yo ahuakɔwo kpata trɔva gbea lɔmɛ le Gilgal. ¹⁶ Ke efiɔ atɔn awo ye si yi be do dɔnxoe me le Makeda. ¹⁷ Amɛ ɖe yi vato ne Yosua be wokpɔefiɔ atɔn awo, wobe do dɔnxoe me le Makeda. ¹⁸ Yosua to be: "Mimli kpe gawo tu dɔnxoe nu, yi míɖo amɛwo do xɔn nɛ woanɔn etsi djɔ. ¹⁹ Ke miawo ŋtɔ migbenɔn xɔn o. Miawo mi&ti kɛntɔwo yome, yi minɔn wo wuɔ to ŋgbedome. Migbena woa ɖo wo du me o, ne Yehowa, mia Mawu lɔ sɔ wo ɖo asi nɛ mi. ²⁰ Yosua ku Israel kuakɔwo wu kentɔwo nyamanyama yitrɔn wo kpata klui ke wo dome ame viɖewo si va be ɖo wo bebexue sɛŋ womɛ. ²¹ Ahuawatɔwo kpata trɔva Yosua gbɔ le gbea lɔ mɛ Makeda dɛdi. Exɔn yo ŋgbedomɛ lɔ, amɛ ɖekpekpe ŋdedo dji kenu to nyan ɖekpekpe do Israelviwo ŋtsi kpɔ o. ²² Fifiɛ Yosua to be: "miɖe nu le yo dɔnxoe nu nɛ miakplɔ efiɔ atɔn xɔnwo to va nuŋ." ²³ Wokplɔ efiɔ atɔn wo, tdiwo nyi Yerusalem, Xebron, Yarmut, Laxis ku Eglon efiɔwo lɔ, va gbɔe ²⁴ Etsi wokplɔ wo va Yosua gbɔ lɔ, eyɔ Israel ŋsuwo kpata va, yi to nɛ ahuakpɔtɔwo tsiwo kpɔ wo yi ahuagbedji lɔ be: "mite va. Miɖo afɔ hlo dji ne efiɔ yɛwo!" lexa wodɔn va do afɔ hlo dji ne wo. ²⁵ Yosua to nɔn wo be: "migbevɔn o, yi djika ŋgbeso mi tsan o. Mile dji do xo yi misɛŋ, ɖoŋtsia lexa yi Yehowa awa miɔn kentɔ tsiwo awa ahua ku mi lɔe. ²⁶ Yoŋgbedomɛa Yosua wu efiɔwo. Edoka ve nɔn wo ɖo atsi atɔn ŋtsi, yi wonɔ atsiawo ŋtsi va sɛ ɖo wetrɔ mɛ. ²⁷ Etsi ewue yinɔn to ɖo gbe lɔ, egbe gbe be woaɖe wo ame kukuawo le atsiawo ŋtsi. Woɖe wo, yi wosɔ wo yi danŋgbe do yo dɔnxoe tsiwo mɛ wobe ɖo va yi lɔ mɛ. Nɛnɛ amɛwo mli kpe gawo so tu nu. Wogbele xɔn va sɛ ɖo egbɛ. ²⁸ Yosua xɔ Makada-du gbe xɔn gbe, yi wu dufiɔ lɔ ku amɛ sia amɛ le dua me; amɛ ɖekpekpe ŋdekpɔ mɔ sio. Nu tsi wa nɛ Yerixo fiɔ lɔ, yi ke wa nɔn Makeda-fiɔ tsan. ²⁹ Yosua ku yo ahuakɔn lɔ kpata ha so Makeda yi dibna, yi wokpe ahua ku xɔntɔ wo. ³⁰ Yehowa so dua ku yo fiɔ do asi nɛ Israelviwo, yi wowu amɛ sia amɛ le dua mɛ; ɖekpekpeŋde kpotɔ o. Nu tsi Yosua wa Yerixo-fiɔ lɔ, yi ke wa ku Libna-fiɔ lɔ tsan. ³¹ Yosua ku yo ahuakɔn lɔ kpata ho so Libna yi Lasiɔ. Wotrɔ do dua, yi wowa ahua. ³² Yehowa na Israɛlviwo ɖu Laxistɔwo dji le ŋkeke ve gbe. Wowu dua mɛ kpata sigbe letsi wowɔ le Libna nɛnɛ, woŋdegbe ɖekpe kpe daɖɛ o. ³³ Gezer-fiɔ Horam ho ahua be yeava xɔ nɛ Laxistɔwo. Ke Yosua ɖu yetsan ku yo ahuakɔwo tsan dji keŋkeŋ lexa be wa domɛtɔ ɖekpekpe ŋdetsi agbe o. ³⁴ Yosua ho ku yo ahuakɔn lɔ so Laxis yi Eglon. Wotrɔ do dua, yi wowa ahua. ³⁵ Woɖu dua me tɔwo dji gbe xon gbe, yi wowu wo kpata. Wotrɔn wo sigbe letsi wowɔ le Laxis nɛnɛ. ³⁶ Yoŋgbedomɛ lɔ, Yosua ho ku yo ahuakɔn lɔ so Eglon yi Xebron, yi wowa ahua ku wo. ³⁷ Woɖu Xebrontɔwo dji wowu yo fiɔ ku amɛ sia amɛ le wo dua mɛ. Yosua gban dua gbidigbidi sigbe le tsi wowa Eglon-du lɔ nɛnɛ. Amɛ ɖekpekpe ŋtɔ tsan ŋde tsi agbe le eme o. ³⁸ Yoŋgbedomɛ eye tsan ku yo ahuakɔ lɔ trɔ ɖo Debir du ŋtsi, yi wowa ahua. ³⁹ Woɖu Debirtɔwo dji. Alɔ sun wo fiɔ dji yi woxɔ wo duwo. Wowu amɛ sia amɛ ku wui le dua mɛ. Amɛ ɖekpekpe ŋdetsi agbe le emɛ o. Le tsi Yosua wɔ Xebron ku Libna kudo Lina-fiɔa lɔ, nɛ nɛ yi wowa Debir ku yo fiɔ tsan. ⁴⁰ La xa Yosua ɖu anyigban lɔ kpata dji. Eɖu fiɔ tsiwo kpata le tonyigbawo dji etsiwo le djogbenyigban tsi le gɔmɛgbedji etsiwole le gbadjadji tsiwo le toawo gɔmɛle wetoɖoxue ku etsiwo le toawo yo (abuɖifiwo) lɔ tsan dji. Ŋdekpɔtɔ amɛ ɖekpekpe dadɛ o; ewu wo kpata keŋkeŋ sigbe le tsi Yehowa to ni nɛnɛ. ⁴¹ Lexa Yosua ɖu wo dji so Kades-Barnea va seɛ ɖo Gabaon. ⁴² Yosua ɖu fiɔ yɛ wo kpata dji le ahuahoho ze ɖeka kpo mɛ, bena Yhowa Israɛl Mawu lɔ wa ahua nɛ Israɛl. ⁴³ Le nu yɛ wo ŋgbedomɛ lɔ, Yosua ku yo ahuakɔ trɔgbɔ va wo gbe me le Gilgal.