¹ Yehowa ɖo enyɔ ŋtsi nɛ jɔb le huzuhuzu mɛ yi nu be: ² Pɔla ego dji abe nusu nɛnɛ; yi nabiɔ enya nɛ na fiɔŋ enu. ³ Ɖe yi wolakpɔ axin nudjɔdjɔɛwawa nugbaloa? Ɖe yi natrɔzuŋ enumadjɔmadjɔ watɔ yi woyɛ wolanyi amɛdjɔdjɔɛa? ⁴ Abɔ tsinɛ le asio, le sigbebe tɔnyɛa? ⁵ Ke sɔ bubu kudo ŋsɛn ɖo atsɔ, yi ɖo atsɔ kudo eglo le ŋtsikɔkɔɛ mɛ! ⁶ Na nɛ axo dɔmɛzoe nɛ ze, yi trɔ ŋku ɖo amɛdadawo dji, yi nabɔbɔ wo ɖo anyi! ⁷ Axo nukpɔkpɔ nɛbɔbɔ dadatɔwo, ziŋ amɛbaɖawo ɖo anyi. ⁸ Ɖi wo kpata ɖo ekɔ mɛ, ziŋ wo ŋgo ɖo vivitsi mɛ! ⁹ Yi nyɛlɔ nakafu wo, be axo alɔ ɖusi xɔ nɔŋ. ¹⁰ Kpɔ ɖɛgbo, tsinɛ ŋna agbe kudo wo lɔ, eɖunɔn egbe sigbebe enyi nɛnɛ! ¹¹ Kpɔ! yo ŋsɛn le alimɛn nii, yi yo hɔnhlɔn le xodomɛ nii; ¹² Exanɔn yo asike dɛ sigbebe sedɛl tsi nɛnɛ; ata yitɔwo yo kanwo bla le emɛ; ¹³ Yo exuwo le sigbebe gadjin nɛnɛ, yo lamɛ le sigbebe gakpo nɛnɛ. ¹⁴ Yi nyi nuwɔwɔ tutugbantɔ nɛ Mawu; yi amɛtsi wɔɛ sɔ ewui ɖo alɔmɛ nii. ¹⁵ Ekpɔnɔn nuɖuɖu le etowo tamɛ, afitsi gbemɛlanwo nɔnɔn gbegbeɔ le. ¹⁶ Eɖinɔnɖo mɛ le atsiwo gɔmɛ, le axluatsiwo kudo étangbawo mɛ. ¹⁷ Atsiwo nanii fafa, yi aŋuntsiwo xonɔnxla doii. ¹⁸ Nɛ etɔlɔ tɔnɔ ɖɔɖɔ tsan lɔ, vɔnvɔn ŋde ɖoniɔn; nɛ yɔrdan ɖɔ va numɛ nii tsan lɔ, enɔnɔn anyi kpoo. ¹⁹ Mɛŋde latɛŋ lii nɛ ehun ŋkuviwo? Mɛŋde laŋɔn ŋɔntsi nii kudo atsi? ²⁰ Ɖeyi wolale elo kudo akpoŋ a? Ɖeyi wolasɔ eka abla aɖe nii a? ²¹ Ɖeyi wolatɛnŋ sɔ ketsi do ŋɔntsimɛ nii a? Alo asɔ tɔkaɖega ku aglan nii a? ²² Ɖeyi yilanɔn kuku ɖeɔ nɔnwoa? Ɖeyi yilaxo nuxo nɔwo kudo egbe blɛwua? ²³ Ɖeyi yilawɔ nublabla kudo wo, benɛ yanyi axo gamɛnɔtɔ tɛgbɛa? ²⁴ Ɖeyi wolagble kudoi sigbe xevi nɛnɛ? Alo ɖeyi wola tɔkɛɛ sigbebe avuvi nɛnɛ be eviwo nyɔnuviwo woagble kudoia?