¹ Edji tɔnyɛ hunhun, yi djo le yo texue. ² Mise, mise Mawu yo gbeɖeɖe ɖa! mise letsi le blublu lɔ ɖa. ³ Etatsi le djikezo ŋtsi ɖonɔn ɖo djipo bliboa, yi yo kɔkɔ yi nɔn anyigban yo fiɖekpekpe. ⁴ Yoyome Mawu yo gbe djinɔn sɛsɛɖe. Eblunɔn ku yo fiɔgbe lɔ, yi ne yogbe ɖi lɔ, ŋgbetu mɔn nɛ djikezo o. ⁵ Mawu blunɔn nukunutɔ, Ewɔ nu gawo tsiwo gɔmɛ miŋdesenɔn o. ⁶ Eɖe gbe nɛ glasɔn be: "dja ɖo anyigban dji." Yi ɖe gbe nɛ sidjadja be: "dja yoo" ⁷ Eso tɔka ɖo alɔ dji nɛ amɛ sia amɛ, bena yo djisi yo nu wawa wo. ⁸ Gaxɔn mɛa la, gbemɛlan tsan yi yo beɖoxoe yi mlɔn anyi ɖo yo dɔnxue. ⁹ Baluwoe vanɔn nyidɔnmɛ ku fafa, so aya digbetɔ mɛ. ¹⁰ To Mawu yo gbɔngbɔn mɛ wa glasɔn, yi tɔ gawo trɔzɔ nɔn kpe. ¹¹ Mawu sɔ si donɔn agba nɛ lilikpo, yi yo djikezo wo mɛ. ¹² Etrɔnɔn do godoo le yo kplɔkplɔ ta, yi wa Mawu yo ɖoɖo dji le afi ɖe kpekpe le xixeamɛ. ¹³ Enanɔn be eyɛ va nɔn mɛ, nɛ woasɔ dɔn to nɛ anyigban dji nɔn tɔwo loo, alo nɛ woawa dɔmɛnyui nɛ woa. ¹⁴ Djɔb, se ɖa! bonu, nabu ta mɛle Mawu yo nukunuwo ŋtsi. ¹⁵ Enya letsi Mawu ɖe gbe nɛ yo lilikpowo, yi wonanɔn be djike zo so wo mɛa? ¹⁶ Ɖe wo nya le tsi lilikpowo wanɔn ɖinɔn sa le aya mɛ, tsi ɖe nunyatɔ lɔ yo nukunuwawa fiɔnɔn? ¹⁷ Wonyan ntsi ntsi awuwo xɔ zo, nɛ anyigban djiɖomɛ le gawoeve mɛ? ¹⁸ Ɖe nateŋ adɔn dji va dranyi, ya ɖi apupui tsi lolo lɔ sigbe Mawu nɛnɛa? ¹⁹ To nya tsi miato nɔn Mawu lonɔn mi! Miŋdenya nya ɖekpekpe la to o; miɔ susu mɛ do viviti. ²⁰ Ɖee woatoeni be ŋdi be maxo nuxoa? ne amɛɖe kanse xonuxo lɔ, ɖekpo woatsrɔn zeɖeka. ²¹ Nɛ aya xo lilikpo ɖa lɔ, klɛnklɛn tsi tonɔn lɔ sɛnɔnŋu be amɛ ŋdetɛŋ kpɔ ni o. ²² Sikachɔn so djigbemɛ gbonɔn; fiŋyinyi ɖo vɔnvɔn le Mawu ŋtsi. ²³ Ŋsekpatatɔ lɔ, midatɛŋ akpɔe o; yo ŋsɛn ku vɔnu djɔdjɔe drɔdrɔtri akɔ. Ŋdetrɔnɔn le nu djɔdjɔ wawa yomɛ gbeɖe o ŋdete amɛ ɖekpekpe ɖo to o. ²⁴ Yeŋtsia agbetɔwo, mivɔe! ŋkpɔe amɛ tsiwo bu nɔn wo ɖokui nunyalawoe lɔ ɖo ŋɖekpekpe mɛ o.