¹ Elihu yi nylọ dji, nu be: ² Tɔte viɖe, ne mayi nyɔ dji, ɖoa ŋɖonu sugbo lafiɔnkuɖo Mawu ŋtsi. ³ Axu nyɔ-nunuwo daso djipo, yi naɖe axu wɔla yo nudjɔdjɔ wawa lɔ ɖo go. ⁴ Kan-ɖo-dji nyuiɖe be axu nyɔtotowo ŋde nyi adjeɖaɖa o, yi ŋle wo nuɔnɔn kudo kankan-ɖo-dji. ⁵ Ŋɛɛn le Mawu, vɔ ŋde gbenu le amɛɖekpe gbɔ o; éɖo ŋsɛn to yo sidjedje be ŋsɛn me. ⁶ Ŋde ɖanɔsi nubaɖawatɔ ɖo agbe o, yi sɔnɔ nyɔme nyui ne nuwadonɔwo. ⁷ Ŋde ɖenɔ yo ŋkuwo le nudjɔdjɔɛ watɔwo dji o, esɔnɔ wo nɔnɔ-anyi ɖo efiɔwo be azi dji, ŋde ɖewó djo kpɔ o be ne adowó ɖo dji boo. ⁸ Ne wóvɛ gɛn dje kɔsɔ-kɔsɔ me, ne futɔa vɛ le wó lɔ, ⁹ Eɖe nɔn wóɔ vodadawo, teteɖaga, ŋtasɛnsɛnwo wó nubaɖawo fiɔn wó. ¹⁰ Eɖana fɔ afɔ ta nɔwó to yo toɖoxonyawo dji edɔnɔ ŋsɛn wó be ne wóa ɖasi le nuvɔɛn ŋtsi. ¹¹ Ne wóɖoto yi wówa ɖo djiaa, Enanɔ djɔgbenyuɛn wóɔ agbe-ŋkekewo, djidjio wóɔ exoewo. ¹² Ne wóŋde dotoè oa, wola bu wóɔ agbe to ewui dji, wola wu wóɔ agbe kudo ŋkugbangban. ¹³ Djibibi kpoenyinɔ djimaxosetɔ lɔ tɔ, yi ŋde donɔ gbeɖa ne Mawu ne ele-edji yiɔ; ¹⁴ Wóbu wóɔ agbe le sɔxɛme, masi-masi sigbe numaɖinuwa nɛnɛ. ¹⁵ Voa Mawu nanɔ ɖeɖekpɔkpɔ nuwɔdonɔ le fukpekpe me, yi to fukpekpeme Mawu donɔ ese ne mi le. ¹⁶ Ela ɖewò to le nuxaxa tsan me yii lasɔ ɖo vovo-texoe nyui ɖe, yi Edana axo nuɖuɖukplɔn dji lado vivisesewo. ¹⁷ Vɔa ne ódjila hlɛn ɖokuió ta sigbe djimaxo seto nɛnɛ lɔ, toxɛn lava djió kpoe. ¹⁸ Amɛsrɔsrɔn ŋgbe klɔ do kokoedodo amɛŋtsi me yi nugan-djidji ŋgbe na be nadjo le mɔlɔ dji o. ¹⁹ Ɖeyi axo axua dodowo, ŋsɛn yiwo kpata ólaɖe to lɔ lana élato le nuxaxa mea? ²⁰ Ŋgbe do kenyifanfan yo gbeɖa ne ezan vayio ɔ yi laɖe djukua le yo texoe o. ²¹ Kpɔ-ɖokuió dji be ne ŋgbe vɛ gɛn dje nuvɔɛn me o ɖoa fukpekpe kpɔtɔ le anyi. ²² Mawu lolo to yo ŋsɛn dji, nufiɔntɔ ŋde late fiɔnu sigbe yé nɛnɛ? ²³ Mɛŋde laɖo emɔyi lasɔ lɔ nì? Meŋde lateŋ nu be:Nuyi waɔ òle ŋde nyɔɔ? ²⁴ Vɔ lɔ ɖoŋkui be na kafu yo dɔwawawo yi amɛsiamɛ la kakafuɔ. ²⁵ Amɛsiamɛ le ekpɔ, le djidjixoe ŋtɔtsan amɛ ɖeka-ɖeka le ekpɔ. ²⁶ Mawu lolo, voa yo ganyinyi lɔ le mia ŋtsi toɔ, amɛ ɖekpe ŋdea teŋ bu yo exuewo o. ²⁷ Egbɔnɔ esi, yi trɔni esidjadja yi djanɔ ɖo anyigban dji; ²⁸ Lilikpowo ɖanɔsi yi djanɔ ɖo amɛgbetɔ dji le anyigban lɔ dji. ²⁹ Yi mɛŋde lateŋ sè lilikpo yo fliwo kudo djikezo yo wawa gɔn me? ³⁰ Kpɔ leyiye klɛnklɛn trɔnɔ dui ɖaa, yi ke be ɖo aƒu yo tsitsinawa. ³¹ To mɔnu tsɛwo dji yi éda ɖo kodjo ne djuwo, yi edana nuɖuɖu wóle gbɔsusu me. ³² Ele ezo ɖo yo alɔxo me, sɔɛ kpankɔ yo ketɔwo, ³³ Edjikezo yi nanɔ gbe yo vava yi lanwo ŋtɔtsan ɖonɔ djesi yo vava lɔ.