¹ Job, fifiɛ lo, se axu djeɖonyɔwo, ɖoto axu nyɔwo! ² Ŋkenu, axu aɖe le tɔtrɔ le axu numɛ. ³ Ŋda xo kudo djɔdjɔɛnyinyi yo dji, axu nugbɔviwo lanu nyɔtexoe simatɔe: ⁴ Mawu yo gbɔngbɔn yi waŋu, yi Nusɛn yo kpatatɔ yo agbegbongbɔn le zangaŋu. ⁵ Naŋu ɖoŋtsi, ne olate kpeŋtsia, Likɛn, ne nahlɛn ɖokuiwò ta. ⁶ Nye-kuwò misɔ le Mawu yo ŋkume, babakɔ yi wósɔ wa mi; ⁷ Yiŋtsi yi axu kpɛnkpɛn ŋdea tsɔn djiwò o. ⁸ Voa ŋse enyɔgbe tsiwo, òto do tomɛ nu woan wo lɔ: ⁹ Ŋle kɔkɔɛ, nuvoɛn ŋde le ntsi nye o, ŋkɔ nuvoɛn ŋde gbele axu lãmɛ o. ¹⁰ Yi măwu kpɔ amɛtsitsri le mɛnye, ésɔŋu sigbe ketɔ nɛnɛ; ¹¹ Esɔ axu afɔwo do, éle axu afɔɖeɖewo kpɔ. ¹² Mawu nɔ le texoe xɔn be ŋde le eme o, ɖoa Mawu ŋde le sigbe amɛgbetɔ nɛnɛ o. ¹³ Ódji la xlɛn nyɔ kuŋua, ɖoa ŋde nyanɔ enuyiwo waɔ enɔnɔ oa? ¹⁴ Mawu xonɔ nuxo le gowo vovovo yi mi ŋde nyanɔ tututu o. ¹⁵ Exonɔ nuxo to drɔn mɛ, to ŋtegan mɛ le gahimɛ amɛwo dɔn alon yi mɛ ɖaa a le wòɔ abadji. ¹⁶ Énanɔwo tofinyanwo yi tenɔn gbe ɖa yo nyɔgbɔngbɔnwo dji. ¹⁷ Be ne aɖe amɛgbetɔ tɔle nubaɖa mɛ. ¹⁸ Be na axɔ ne yoò luvɔn le kudonu mɛ ne yo agbe le. ¹⁹ Amɛgbetɔ gbe kpɔtɔ nɔno abadji ne éle vevesese me, ne avuwɔwɔ va gɛn do yo xuwo mɛ. ²⁰ Fifiɛ lo ŋɖuɖu la tole ŋkumɛ ni, akpɔnɔn, ŋɖuɖu vivu yitɔwo tsan; ²¹ Elangbaza yitɔ la vɔ keŋken, yo xuwo yiwo ŋdezenɔn san oa va tsianyi daɖe; ²² Yo luvɔn gogo kudonu, yi yo agbe le kudjesu yo nyɔwo wɔɔ. ²³ Voa Mawu-dɔla ɖeka le kotokua lɔ mɛ le nyɔ xo ɖe akɔ ni, yi le nyɔ nuɔ ne amɛgbetɔ lɔ be ne azɔn mɔ djɔdjɔɛ alo dji. ²⁴ Mawu kpɔ nublanyui nii yi tɔ ne Dɔla be ne ɖeé mɛ ngbe gɛn dje kudomɛ o: ŋku ŋzizi nii! ²⁵ Yi yo ŋtsilan kpɔ ŋtsifafa wu tutugban san, etrɔ gbova sɔkɛ mɛ yitɔ mɛ. ²⁶ Édo gbeɖa ne Mawu; yi Mawu tɔ nii. E&dasi ékpɔ yo ŋkumɛ kudo djidjiɛ yi éwɔe ɖemanyala. ²⁷ Éle ha djiɔ le amewo nkume be: ŋwa nuvoɛn, nyeɖe nɔ djɔdjɔɛ o, vɔ gake nye ŋde xo xuyiwawo yo tohɛn o; ²⁸ Mawu ɖe axu luvɔn he ne ŋgbe gen dje kudo me o, yi axu agbe kpɔ klɛnklen! ²⁹ Mikpɔ nuyi kpata Mawu wa ɖa, zeve, zetɔn kudo amegbetɔ, ³⁰ Be na akplɔ yo luvɔn le kudonu si, be ne aklɛn no amegbetɔ agboagbewa, ³¹ Se nu ne na ɖobo ŋu Job! Bɔnu ne maxɔ mixo! ³² Ne odo nyɔ ɖe lagblɔn lo, mi nu! Ɖoa ŋdji lanɔn mɔnukpokpɔ. ³³ Ne ŋde ɖo nyo ɖo ɖe lagblɔn o lɔ, ɖotoŋu! Bɔnu, ne mafiɔn nunyan.