¹ Nyɔnuɖɛtɔ Habakuk, yo gbedodoɖa. (Le konyifanfanwo yo nɔnɔmɛ) ² Yehowa tsinɛ ŋse enyɔn tsinɛ wonu lɔ, vɔnvɔn ɖoŋ. Wɔɖo enyɔn tsiwo wonuwo dji le exoe tsiwo gbɔnɔn mɛ Oo Yehowa! Le exoe tsiwo lava lɔ, na nɛ woakpɔ emɛ vava ! Ganke ɖoŋku axo ŋzizikuku dji le axo dɔmɛzoe mɛ ! ³ Mawu so Tema, Kɔkɔɛtɔa so Paran yo towo dji ... Ɖiɖomɛ. Yo ganyɛnyɛ tsɔn xixeɛ kpata dji, yi kafukafuwo ɖɔ anyigban . ⁴ Ele sigbebe kɛnklɛn yo zo nɛnɛ; kɛnklɛn yo alɔzuĩnwo tole yo alɔwo mɛ ; xɔn yi yo ŋsɛn le nɛ. ⁵ Edɔbaɖa le ŋkɔ nii, yi edɔbaɖa le yo afɔtoxoewo. ⁶ Nɛ enɔnte lɔ, anyigban hunhunɔn; Nɛkpɔ dukɔnwo lɔ, wovɔn nii; gbeɖegbe yo towo gbanɔn, etoviwo hlĩnɔn; yi yizɔnɔn bleman mɔnwo dji. ⁷ Ŋkpɔ Etiopia yo agbadɔwo wo ŋdegbele boɖe nuŋ O, yi Madian du yo agbadɔyo le hunhunhunkɔ. ⁸ Yehowa, etɔwo ŋtsi yi wodo adɔmɛzoe ɖoa? Ɖeyi axo djibibi trɔɖo etɔwo ŋtsia, ɖo axuwo ŋtsi axo dɔmɛzoe lea, yibe woɖo axo sɔwo djia, le axo djiɖuɖu sɔ djia? ⁹ Wodjra axo tsanŋka tsiɛ daɖɛ; yi tsanŋkawo woenyi axo nyɔnwo fĩnpodewo ... Ɖiɖiɖomɛ. Wofɛnɔn anyigban lɔ, yi nanɔn mɔn etɔwo sranɔn. ¹⁰ Nɛ etowo kpɔwo lɔ, wohunhunɔn ; etɔwo tonɔn gblogblogblo; axumɛtɔwo nanɔn wosenɔn axo ŋkɔ, yi wokɔkɔnɔn alɔ ɖo dji. ¹¹ Ewoe kudo woetri nɔnɔnte ɖo wotexoe, le axo kĩnklĩn yo ahuŋwo djodjomɛ, le axo ehuan tsinɛ klĩnɔn yo dadamɛ. ¹² Wotonɔn anyigban dji le axo dɔmɛzoe mɛ, wogbanɔn dukɔnwo le axo djibibi mɛ. ¹³ Woto benɛ yaɖe axo dukɔn , benɛ yaɖe axo amɛsiamina; wogbanɔn amɛvuĩnɖi yo axoe, wokankan nii gudugudu. Ɖiɖomɛ. ¹⁴ Wosɔnɔn axo tsaŋka trɔnɔn eta nɛ efiɔwo, tsiwo lunɔn sigbebe huzuhuzu benɛ yewoa kankan mi nɛnɛ, yi wodonɔn djidjɔ xuawo sigbebe wovuŋvuŋ woamɛnɔn xoxo le fitsinɛ yibeɖo nɛnɛ. ¹⁵ Wosɔ axo sɔwo to axu dji, le shifiɔ ganganwo domɛ. ¹⁶ Ŋse neyɔn tsɛ... Yi ŋtsaka. Axĩn nuwo le xoxoɔ, axĩn xutomɛwo tɔzo, yi axĩn klowo le xoxoɔ kplaklpaklpa: Nanɔn anyi kpoo akpɔ axĩn djɔgbevuĩn yo ŋkekeɛ, le gbetsigbe yi fuŋtɔ lazɔn ɖo dukɔnlɔ dji. ¹⁷ Ɖo figuetsi ŋde dja xo eseo, vingble ŋde djawɔ nuɖekpeo, amitsi lagbe aminana, agblewo ŋda nan nuɖuɖuo; alĩnwo lavɔ le alĩnkpowo mɛ, yi enyiwo ŋde gba nɔn ekpowo mɛɔn. ¹⁸ Ganke, ŋdjibe makpɔ djijdɔ le Yehowa mɛ, ŋdjibe makpɔ djidjɔ le axĩn xɔnamɛ Mawua ŋtsi. ¹⁹ Axoetɔ, Yehowa yinyi axĩn ŋsɛn ; elawɔ axĩn fɔwo yilanɔn sigbebe ezĩnviwo yo fɔwo nɛnɛ, yi yilana nato texoe yidjiwo. Nɛ hasinɔn ganwo. Kudo ekawo yo hadjinu xoxowo.