¹ Ŋle axĩn texoe, yi ŋle exɔgan yo tamɛ; ŋle ŋzɔn benɛ makpɔ enyɔn tsinɛ Yehowa lanun nuŋ, yi enyɔn tsinɛ nasɔ ɖoŋtsi le axĩn konyifanfan yo ŋgbodomɛ. ² Yi Yehowa ɖontsi nuŋ be: Ŋlɔn nyɔnuɖɛlɔ : Ŋlɔn nya ɖo ekpewo dji , benɛ wonɛ hlĩn fafaɖe. ³ Ɖo nyɔnunu tsinɛ gamɛ gogo nii yɔ, gamɛ suŋ vɔ yi ŋda dokpo emɛ vavaɔ; nɛ etsi ŋgbe lɔ, nɔte kpɔɛ, ɖo ela kpɔɛmɛ vava godo, yi ŋda tsi ŋgbodomɛɔn. ⁴ Kpɔɖa , yo luvɔn kɔyi dji glodjo, ŋde djɔ le yiɖekui mɛɔn ; vɔ amɛdjɔddjɔɛ yɛ lanɔn agbe le xɔse mɛ. ⁵ Pɛpɛpɛ sigbebe ahanumunɔn nɛnɛlɔ, dadatɔ ŋde nɔnon anyi kpoo O; ekenɔn numɛ hooo sigbebe tsiexoe nɛnɛ, ŋde ɖɔnɔn xodo sigbebe eku nɛnɛ; edɔnɔn dukɔnwo kpata sɔvanɔn yiɖokui gbɔ, ebɔnɔn dukɔnwo kpata ɖo yiŋtɔ gbɔ. ⁶ Vɔɖe nanyi hamɛlo , ŋkpĩn kudo ahăman niiɔn? wola be : Baba nɛ amɛtsinɛ bɔ enutsinɛ ŋde nyi yitɔ ! Kakana gaŋdemɛ?... Babaɖe nɛ amɛtsinɛ le yo efɛn gban djiɔ ɖodji ! ⁷ Efɛntɔnɔnwo navaso ɖo djiwo le avomɛɔn? Axo yomɛtsitɔwo nafɔn ? Yi wola trɔzun elan le numɛ nɔwo. ⁸ Ɖo wolɔ dukɔn gbogboɖewo, yi dukɔn kpɛtɛwo lalɔwo; ɖo wokɔ amɛwo hun ɖɛ, woyɔ ŋtasɛnsɛn le dua mɛ, ɖo edua ŋtsi kudo duamɛnɔtɔwo ŋtsi. ⁹ Babaɖe nɛ amɛtsi le amɛ tafuɔ ɖɛ nɛ yo axoedo, be yaɖo yo atɔn ɖo ekpetomɛ, bɔnɛ yasi le djɔgbevuĩn ŋtsi ! ¹⁰ Axoe tɔwo yo gbegble woɖo daɖɛ, tsimɛ wotsrɔn amɛgbogboɖewo, yi woŋtɔ ŋtsi wowɔ nuvuĩn ɖo. ¹¹ Ɖo ekpe le egbe ɖeɔ le glimɛ, yi xɔlitsi le ŋtsi ɖoɔ nii. ¹² Baba nɛ amɛ tsinɛ sɔ amɛhun tu edu, tsinɛ le edu tuɔ ɖo nuvuĩn mɛ ! ¹³ Kpɔ enu tsinɛ Yehowa Zebɔt ɖoɖɛ ke, dukɔnwo le edɔ yɔɔ daɖɛ nɛ ezo, dukɔnwo le agbagba djeɔ ɖo gblolo mɛ. ¹⁴ Ɖo anyigban laɖɔ kudo Yehowa yo ŋtsikɔkɔɛ nunyan, sigbe letsi esi ɖo axumɛ nɛnɛ. ¹⁵ Baba nɛ amɛtsinɛ lana enu amɛ lanu, eyo tsinɛ kɔ aha muamɛ ɖo etremɛ nii benɛ mu, benɛ nakpɔ amamɛ nii ! ¹⁶ Ŋkpĩn laɖɔ xodo nɔwo sɔwu ŋtsikɔkuɛ; woŋtɔ nuii nɛ nakpɔ axo amamɛ ! Yehowa yo ɖusimɛ kɔkpo latrɔ ɖoɖa gbɔwo, yi wola bu axo bubu. ¹⁷ Ɖo akpasɛnsɛn tsinɛ wowɔ ɖo Libano ŋtsi latrɔdje axo tadji, yi elan tsiwo wotsrɔn wo lado vɔnvɔn nɔwo, ɖo wowɔ nunyranyran ɖo edua kudo eduamɛnɔntɔwo ŋtsi. ¹⁸ Ŋde wolasɔ atsikpakpa wa, benɛ atsi kpatɔ nɛ kpɛɛ? Ŋde wolasɔ gadjinkpakpa wa tsinɛ le nusu fiaɔ, bɛnɛ amɛtsinɛ kpɛɛ kanɖo dji, tsinɛ yidjole atsikpɛkpɛ tsiwo ŋde xonɔn nuxo O? ¹⁹ Baba nɛ amɛtsinɛ tonɛ atsi be : Tsite ! Nɛ ekpe maxonuxo be: Fɔn! Ɖeyi yila fiɔn enua? Mikpɔ, wofɛn sika kudo gadjĩn ɖoŋtsi, vɔ gbɔngbɔn ŋdele mɛ nɛ yahuanɔn. ²⁰ Yehowa le yo gbedoxɔ kɔkɔɛ lɔ mɛ, anyigban kpata nɛbɔ nu !