¹ Philisitɔwo sɔ Mawu yo nubablaɖaka yi wósɔe so Ebɛn Ezer sɔyi Asdod. ² Le Mawu nubablaɖaka yo xɔxɔ ŋgbodomea, Philisitɔwo sɔɛ vɛdo Dagon yo axome yi sɔdaɖo Dagon yo akpaɖeka. ³ Le yo nukɔdjebea, Asdodianitɔwo fɔn ŋdekanyɛn me boo yi wolakpɔɖa kpoa, Dagon mu ke sɔ ŋkume dogu le Yehowa ye nubablaɖaka ŋkɔ, Dagon dotagu ne Mawu yo nubablaɖaka lɔ yi wófuen nɔanyi ɖo yo texoea lɔ. ⁴ Enuyi latrɔ ke ken, wógbefon fɔnfɔme yi Dagon kpetata gbemu dotagu ne Mawu-nubablaɖaka yo eta kudo abɔwo fli le lankpotsia nu vɛdjɛ agbo lɔ nu. ⁵ Yiŋtsi kaka vaɖo egbea, Dagon yo akametsiwo kudo amɛyiwo yiinɔ Dagon-kpamewo le Asdod, wóŋdegbe danɔ afɔ alo azɔn xɔmɔnu glikpo dji o. ⁶ Yehowa yo alɔ sɛnsɛn ɖiɖi hentɔ ne Asdodovi wo ŋtsi yi na vonvon gɛndo wódome, éna kokodɔlele va Asdodviwo kudo yo edju yiwo trɔdoewo dji. ⁷ Eyi wókpɔ enuyidjɔa, Asdod yo amɛwo nu be: Izraɛl-Mawu yo nubablaɖaka ŋdea gbe nɔ mìagbɔ ɖoa éɖiɖi yo alo-sɛnsɛn ɖo mia kudo miɔ Mawu dagon dji. ⁸ Yi wótsite kpatakpata vɛdjii, bɔ Filisi yo fiɔviwo kpata dɔɖo ŋkume nɔwó be: Lede milawa ne Izraɛl-Mawu yo nubablaɖaka? Efiɔviwo ɖoŋtsi be: wonesɔ Izraɛl Mawu yo nubablaɖaka yi vɛdaɖo Gathi.Yi wókɔkɔ Mawu nubablaɖaka lɔ. ⁹ Vɔ le gahime wóva xonlɔ, Mawu sɔ yo asixo edjua lɔ kpata yi so ɖevi yi amɛganxoxowo dji yi koko dɔlele djewó dji. ¹⁰ Yi wósɔ Mawu yo nublaɖaka sɔɖoɖa Erɔnidjume yi wosɔ Mawu yo nubablaɖaka ɖo edjuamea, Ekrɔnitɔwo kpabobo, nu be: wosɔ Izraɛl-Mawu yo nubablaɖaka va benɛ woavawu mi le djuame! ¹¹ Wógbetrɔbɔ kudo Filisi yo fiɔviwo nu be:Mina miatrɔ sɔ Izraɛl-Mawu yo nubablaɖaka vedaɖo yo texoe kpooo ɖoa eku yo vɔnvɔngan ɖe le edjuwo kpata me yi Mawu sɔ yo asi le miaxɔɔ veveɖe. ¹² Amɛyiwo ŋdeku ao, wóle kokodɔ leɔ yi woɔ axuadodowo le ɖiɖi kakale ayame yiɔ ŋtɔ.