¹ Ŋsuɖeka so Ramathaïm Tsophim le Ephraïm yo to dji, yo nyikɔ tɔ Elkana, Jerohan viɛ, Elihum viɛ, Tohu viɛ, Tsuph viɛ, yi nyi Epraïm tɔwo. ² Eɖe nyɔnu amɛve, ɖeka nyikɔ nyi Anne yi vegɔn a tɔbe Peninna; Peninna dji viwo; vɔa Anne ŋde dji vi kekpekpe o. ³ Exoe sia xoe a, ŋsu yɛ yi nɔn yo dumɛ Silo, vɛ don ɔngbe ɖa nɔn Yehowa ŋsɛnwokpatatɔ, yi wanɔn avɔsawo tsan ni. Xɔn yi Eli viɛ ŋsuvi amɛve tsiwo woyɔnɔn be Ophni kuɖo phinées tsiwo nyi nunɔla nɔn ye yehowa. ⁴ Elkan manɔn lan nɔn viɛ ŋsuvi ku viɛ nyɔnuvi tsiwo le gbɔ kuɖo wanɔn Peninna. ⁵ Vɔa enan lan Anne ɖo ame amevenu; ɖoŋtsia elɔn anne tsi Mawu sɔɖo konɔ a, ⁶ Asuɔsi sɔnɔn dɔmezi nan wo donɔn dɔmezi nyi, ɖo letsi yehowa ɖui konɔn ŋtsi. ⁷ Lexa yi wanɔn xoe sia xoe, gasiagamɛ nɛ Anne va Yehowa yo gbeɖoxome, penna donɔn dɔmezi nyi yinɔnɔn avi fanwɔ ɖonɔkpo nuɖuɖu. ⁸ Asuɔlɔ Elka tonɔn nyi be: Anne, ŋdewa wo le avi fanwɔ, nyi ŋde le nuɖuwɔ? Ŋdewa edji tɔwo le ŋsisime? Nyɛn ŋsun ŋsuvi amewo xɔnwo nu nɔn wo? ⁹ Etsi Anna dunu nu aha le Silo vɔa, esite yi Yehowa yo ŋme. Nunɔla Eli nanyi ɖo zikpi dji le tsɔtsixɔ lɔ gahɔntsi ŋtsi. ¹⁰ Yi, yi le nuxaxame veveɖe, yi dogbe ɖa nɔn Yehowa ku avi hɛhɛkɛ. ¹¹ Efian djiɔgbe tobe: Yehowa Zebaot, nɛ wo kpɔ dɔla nyɔnu tɔwo yo hian, yi wo ɖo ŋkuvi dɔlanyɔnu tɔwo dji yi ŋde ŋlɔn be oa, yi wo nɛn evi ŋsuvi dɔla nyɔnu tɔwo lɔ, kexɔn nansɔ nan Yehowa le yo agbe ŋkekeɛ kpatame yi sizo ŋda dje ta nyi o. ¹² Etsile gbedoɔɖa djidjiɖe le Yehowa yo ŋme a, Eli le ŋkuvi ɖo enu ŋtsi nyi. ¹³ Anne le nuxoxowɔ ɖo djime, yonuwo kpoe le huanhuan wɔ butubutu yi yo gbe ŋdele dji yiwɔ; yiŋtsi Elibui ɖo ahanumunɔn dji ɖo. ¹⁴ Yi Eli tonyi be: Vasɛnɖo gaŋdeme yi wolava tasi aha nunu? Nan nɛ aha nɛkɔ le ŋme nɔn. ¹⁵ Anne ɖoŋtsi to be: OO, axoetɔnyɛn, nyɔnu tsile ayanuwɔ le djime yi ŋnyi, nyɛn ŋde nu vɛn alo aha muame ɖekpekpe o. Keboŋ djime nyan tsinyɛnwo towɔ ŋle le Yehowa yo ŋme. ¹⁶ Ŋgbe kpɔ dɔlanyɔnu tɔwo ɖo ameɖigbɔ dji o, ɖonutsiŋtsia ehian tsinyɛn kuɖo nuxaxa tsinyɛn ŋtsi ŋle nuxoxoxwɔ so kaka vaan fifiɛ. ¹⁷ Eli ɖoŋtsi be: djoyi le ŋtsi fafame, Israël Mawa laɖo gbedoɖa tɔwo ŋtsinɔn. ¹⁸ Eɖoŋtsi be: Nɛ wove dɔlanyɔnu tɔwo nu yi djo a, ela ɖunu, yi yo ŋme ŋda gbe nɔn hlɔn hlɔn o. ¹⁹ Yiwo fɔn ŋdekanyime dogbeɖa le Yehowa yo ŋme, yo ŋgbedeme a, wo trɔ yi wo xome le Rama yi Elkana dɔn asia Anne gbɔ, yi Yehowa ɖo ŋkuvi Anne dji. ²⁰ Le exoeme a, Anne fɔfu, yi djivi ŋsuvi, yi bo nyikɔ nyi be Samuel, ɖoŋtsia eto be: Yehowa yi ŋbɔ. ²¹ Asuɔlɔ Elkana yi kuɖo yo xoedo ɔ kpata be yavɛwa xoetarɔtrɔ vɔva nɔn Yehowa asɔtu beɖo nyi. ²² Vɔa Anna ŋdeyio; eto nɔn asɔ be; nɛ ɖeviɛ sii a, nana kplɔ vɛtɔte ɖo Yehowa yo ŋme, yi la tsi xɔn keŋkeŋ. ²³ Elkana asuɔlɔ tonyi be wa nutsi nyɔn nɔn, tsixɔn vasɛɖo gatsime ɖeviɛ ɖe le enɔn ŋtsi, Yehowa nɛna enyɔn tɔwo nɛ vame, nyɔnu a tsi axoe, yi nanɔ viɛ vasɛnɖo gatsime ɖeviɛ ɖele anɔnu. ²⁴ Etsi yi ɖe anɔnulɔ ekplɔɛ ɖo asi, yi le enyi ametɔn kpeɖo ewɔ yagban ɖeka kuɖo viɛn ɖaka ɖeka, esɔyi Mawu yo xome le Silo. ²⁵ Wo wu eni jiɛlɔ, yi wo kplɔ ɖeviɛlɔ vɛna Eli. ²⁶ Anna to be: Axoetɔ nyɛ ŋɖekuku! Enyɔn be wole agbe, axoetɔ nyɛn, enyɛn nyi nyɔnu tsi tɔte ɖo gbɔwo fiɛ yi dogbeɖa nɔn Yehowa. ²⁷ Ɖevi yɛ ŋtsi dogbeɖa ɖo ke, yi Mawu ɖo gbedoɖa tsinyɛn ŋtsi. ²⁸ Nansɔna Yehowa, ela subɔ Yehowa le yo agbeŋkekewo kpatame. Lexɔn zeɖeka, Samuel dotagu nɛ Yehowa.