अध्याय 1
1
फिलिप्पी सहरोंन यीशु मसीहोह मानमारा पवित्र माणहोन कोरता एने मोंडलीन अगवाई कोरनारा पुडारया माणहोन कोरता एने मांडलीमा खास पावरोन करता बोगवानोन सेवक मी पोवलूस एने तीमुथी लेखला यी चिट्टी से !
2
आपणू बाह बोगवान एने पोरबू यीशु मसीह दोखी दया एने सुख सांती
तुम आखाह जुडती रोये
3
जेतार बी मी तुमुह और कोरतलु ते तुमरे कोरता बोगवानोह दोन्यवाद कोरतलु
4
मी होमेस्या तुमरे कोरता खुब खुश ओयीन प्रार्थना कोरतलु
5
काहाके बोगवानोन हाजी खोबरोन बारामा तुमु पेल्लीवार होंबोवला तेदिह दोखा आज लोगोण च्यी वात मी दीहराह देखाडनु जुवे कोरीन तुमू मेहे मोदत कोरतला!
6
एने मेहे ओहलु बुरहू से के बोगवान ज्यू तुमरामा ज्या हाजा कामे कोने
सुरुवात कोरलु च्या कामे यीशु मसीह फोसु आवहे ताहालोगोण च्यू पुरो कोरहे
7
काहाके जेतार मी जेलोमा कुंडायलु ओतु तेतार बी एने बोगवानोन कृपा दोखी मेहे जुड़ली सेवा बी विरुद्ध कोरनारान ओगोव बोगवानोन हाजी खबर खुल्ली देखाडणेमा बी तुमु बोटठा मारी मोदत कोरीन गोंवादया बोणला कोरीन तुमरा बारामा मी काय विचार कोरतलु च्यु बोराबर से कहाके तुमरे कोरता मार मोनोमा खूब मोंग से |
8
यीशु मसीह जेंहे तुमुह मोंग कोरतलू तेंहेज मी तुमुह कोरतलु एने तुमुह देखणे कोतरु इच्छा कोरतलू कोरीन बोगवानुज मार पुरावु से |
9
मी बोगवानोह प्रार्थना कोरतलु के तुमु एक दिहराह मोंग कोरनेमा वोडत जाणु जुवे एने बोगवानोह जाणनेन ओकलोमा एने काय हाजों एने काय खोराब से जाणनेन सोमझोमा तुमु वोडता जाणु जुवे |
10
तिनामा तुमु आखा दोखा काय कोरनु हाजों से , एने काय खोराब च्यों समझीन कर सकतला एने यीशु मसीह फोसु आवहे तांहालोगण तुमु पूरान पूरा पवित्र एने बिगुर गुनावा रोयू |
11
एने यीशु मसीह दोखा जुड़तलो दोरमीन फोवोन काम तुमरा जीवायमा पुरोन पुरो करता जावू तेतार माणहे तुमरो सोबाव देखीनं बोगवानोन नावन बोंडाय एने गुणे गावायता रोयहे |
12
ए बायह बोणहा मारी जीवायमा कोहली मुस्किल आवली च्यों तुमु जाणनु जुवे कोरीनं मी विचार कोरतलु तिनामा खूब माणहोह यीशु मसीहन बारामायली हाजी खबर होंबवणे सोंदी जुड़ली |
13
तिनामा यो ओतरोज नी केयसर राजा एने राखवावी कोरनारा सिपायडाह एने जेतार ओवाली मायला ओता तीनु आखा माणहोह बी मालूम ओय गोयलों के मी मसीहन कोरता जेलोमा कुंडाय रोयुह |
14
मेहे जेलोमा कुंड देल्ला तिनामा खूब विस्वाशी बायहे पोरबु यीशुापर पाक्कु बुरहु कोरीनं हिम्मोत हाते उंजु वोडीन यीशु मसीहन हाजी खोबर दिहरानुह कोयणे बेफीरयाा ओयीन होंबाडला |
15
थुडाक माणहे मेंहे कुयरायीन ठोटाये मेंहे सुडीन यीशु मसीहन हाजी वात पोरचार कोरतला पूण थुडाक माणहे सुखला माने दोखा वात देखाडतला |
16
थुडाक माणहे मेंहे मोंग कोरतला कोरीनं वात देखाडतला काहाके च्या जाणतला के यीशु मसीहन हाजी खबर इन जेलोमा दिहराह देखाडनेन कोरता बोगवान मेंहे निवाड़ रोयूह
17
ज्या माणहे यीशु मसीहन हाजी वातोह कुयराये देखाड़तला च्या तिंदरा सोतान फायदान करता एने कुंडवाडामा मारी उंजु वेला पोडनु जुवे कोरीन बोराबोर पोरचार नी कोरला |
18
इनामा काय से ? खोरा विचार दोखा नी ते गलत विचार दोखा केंहेक बी ओयों पूण यीशु मसीहन बारामा ते देखाड देतला ते तिनामा मी खुशिमा से एने उंजु बी खुशिमा रोयीह
19
काहाके मी जाणतलु के तुमरी प्रार्थना मा एने यीशु मसीहन आत्मा मोदत दोखू मी जल्दी जेलोमा दोखू सूट जायीह |
20
मारी इच्छा एने आया यी से के मी कोदी बी काल्ली वातोम लाजवायणु नी जुवे मी मोरो ते बी एने जीवों ते बी मी यीशु मसीहन हाजी खोबर हिम्मोत हाते दिहराह कोयीह एने तिनामा ज्यों काय मी कोरतलु तीनु आखामा मार डीलो दोखी तेरी बोड़ायी ओयहे |
21
काहाके जीवणू मोजे काय से ? यीशु मसीहन करता मोरने बी एने जीवणे बी तियार से |
22
पूण जोर मी डीलोम जीवतु रोयो ते मी यीशुन बारामायली हाजी वातोह खूब माणहोह कोय सोकतलु पूण मी जीवणू नी ते मोरणु इन दुयोम दोखू काल्लो नीवाडणु च्यों मेंहे नी मालूम |
23
मी दुयोन विस्मा फोस रोयूह काय कोरो काय नी मारी इच्छा यी से के मी मोर जाणु जुवे एने जायीन यीशु मसीह हाते रोयो काहाके योज मार करता खूब हाजों रोयहे
24
पूण मी डिलोमा जीवतु रोयणु ते तुमरे कोरता खूब जोरुडी से |
25
यो मेंहे पोक्का मालूम से के मी तुमरे हाते जीवतु रोयीन तुमु आखानु हाते रोयीह तिनामा तुमु तुमरा बुरहामा वोडता जाहोत एने तुमु खुश रोयहो
26
तुमु पाह मी फोसु आविह तेतार तुमु मी हाजू से च्यों देखीन मार करता यीशु मसीहन बोंडायी कोरहोत |
27
मेंहे काय बी ओये ती बी तुमु यीसु मसीहन हाजी खोबरोन बराबर जीवाय जीवू जोर मी तुमुह फोसु मीवायणे आविह नी ते सेटु रयीन तुमरा बारामा होंबो ती बी बुरहान हाजी खोबरोन कोरता ज्या तुमुह विरुद्ध कोरतला तिंदरे ओगोव तुमु आखा एकूज आत्मामा पोक्का ओयिन टिकीन रोयू एने होंबाहोम उबरोयतला कोरिन मी तुमरा बाराम होंबोवणु जुवे |
28
एने ज्या तुमुह विरुद्ध कोरतला तीनुह देखीन बीता जुण एंहे कोरनेमा तिंदरे ओगोव पूरावू ओय जातलु के बोगवान तीनुह
आखानुह नास कोर देहे एने खोराखोर बोगवान तुमुह वाचाडहे यो आखों बोगवानोखेर दोखू से |
29
काहके तुमु मसीहपर बुरहु करनेन करता ओतरुज बोगवान तुमुपर दोया नी कोरयू पूण तेर करता दुख वेठणेन करता बी से |
30
वित्या दिहोम हाजी वातोन करता मी दुख वेठलु च्यों तुमु देखला एने एंवी बी मी दुख वेठतलु च्यों तुमु बी जाणतला एंवि तुमु बी मारहाते दुख वेठ सोकतला |