अध्याय 2
1
यीशु मसीह मा जोर तुमरा मा शांति मोंगोन हिम्मोत एने पवित्र आत्मान होंगोमा कवि एने दया से ते |
2
तुमु एकूज माने ओयिन एकूज मोग एने एकूज विचार एने एकूज बोजोटोन करता मिविन काम कोरीन मारी खुशी पूरी करू |
3
दिहरा माणहे मारी बोडायी कोरनू जुवे कोरीन ठोटाये काल्लो बी काम बी जुण करता नीचोव्वा बोणीन दिहराह तुमु दोखा खूब खास समझु
4
एकेक जोण सोतान बारामा ओतरीज फिकुर नी पूण दिहरान हाजान करता फीकुर बी कोरनू जुवे |
5
एने जोहलू यीशु मसीहन सोबाव से तोहलूज सोबाव तुमरा मा बी रोयणु जुवे |
6
यीशु मसीह बोगवान ओयिन बी च्यु सोताह बोगवानोन बराबर ओयणेन होक बी सूड देल्लु |
7
बाकीन च्यु सोताह आयतु सोमझीन बोगवानोन होस रोयणे सुडीन माणहोन रूपोमा फोयदा ओयिन गुलाम पावोर बोण गोयलु |
8
एने जेतार च्यु माणुह बोणीन आवलु ते च्यु क्रूस खांबा पर मोरे ताहलोगोण बोगवानोन हुकूम मानीन सोता नीचोव्वु बोणीन रोयलु |
9
इंनान कोरीन बोगवान बी तीनाह ओतरु मोटू बोणाव देण्यु एने तिनाक च्यों नाव आपयु ज्यों आखा नावों दोखो खूब हाजों एने ऊपर से |
10
के आखा होरगो मायला एने दोरती पोरला एने दोरतीन नेचला तिंदरा आखान गुटना यीशुन नावोंमा
टेकहे |
11
एने बाह बगवानोन महिमान करता हर एक जीब कबूल करहे के यीशु मसिहज परबू से |
12
कोरीन मार लाड़का बायहा बोणहा जोहला तुमु जोलोमका बोगवानोन हुकूम मानता आव रोयाहा तोहला एंवी बी मार हाजरीमा ओतरा नी पूण मारी वीण हाजरीमा बोगवान तुमुह वाचाडलु च्यों तुमु देखाडनेन करता बोगवानोन वात मानीन उंजु खूब बीता एने कापता जायीन तुमु खूब मेहनुत कोरु |
13
यो तुमु कोर सोकतला काहाके बोगवानुज तेर हाजी मोरजीन इसाबे यो काम पुरो कोरनेन करता तुमरा मोनोमा इच्छा एने काम कोरने बाज रोयूह |
14
आखा कामे कूडकुड कोरे बिगुर एने वातो वातोम जोखडी पोड़े बिगुर कोरु |
15
तेतार कुण बी तुमु पर गुनू नी लागाड सोकतला इनान कोरीन खोराब माणहोन विस्मा बोगवानोन पुरयान होस तुमु चूखला एने बिगुर पापोंन जीवाय जीवू जीवतला बोगवानोन जीवतली वात मानीन इनी कोविमा होलगतला दीवान उज्यावान होस उज्योड आपणेन जीवाय जीवू |
16
जोर तुमु तोहला रोयहोत ते जेतार यीशु मसीह फोसु आवहे तेदिह मी तुमरे करता ज्यी काठी मेहनुत कोरीन दोवडलु च्यों वाये नी जाय यो जाणीन मी खूब खुश ओयीह |
17
पूण तुमु यीशु पर बुरहु कोरीन ज्यी सेवा कोरला च्यी सेवा बोगवानोन ओगोव चोडावली बादान होस से कायथापे मेंहे तिनी सेवान बादा हाते तुमरे कोरता मार लुय बी वोयाडनु पोड़े ती बी तुमु आखा हाते मी खुश रोयिह |
18
तोहला तुमु बी मारहाते खुश होय जावू एने खुश रोयू |
19
जोर यी पोरबू यीशुन इच्छा ओहे ते मी जल्दी तीमुथियुसह तुमु पाह मूकोलने आशा कोरतलू तेतार मेंहे तुमरा बारामा खोबर होंबीन हिम्मोत जुड़ जाहे |
20
मार होस चुखला मन दोखु तीमुथियुस तुमरे कोरता खूब फिकर कोरतलु एने मारहाते एर होस कुणिज नींबे
21
दिहरा आखा सोतान बारामा फिकुर कोरतला एने च्या यीशु मसीहन फिकुर नी कोरतला |
22
पूण तिमुथी कोतरु खोरु से कोरीन तुमु जाणतला जोहलू एक पुरयु तेर बाबान सेवा कोरतलू तोहलूज च्यु मार हाते यीशु मसीहन हाजी खोबर देखाडणेन सेवा कोरलु |
23
यांहरी मारहाते काय ओयहे च्यों मालूम ओयणेन बादमा मी तिनाहा तुमुपाह मूकोंलने आशा कोरतलू |
24
एने जोर पोरबू यीशु मेंहे मोदत कोरे ते मीज तुमुपाह जल्दी आवणे आशा करतलू |
25
मी इपफ्रुदीतुसह तुमुपाह फोसु मुकोलने विचार कोरतलू च्यु मार बायहोन होस से सेनीकोन होस मारहाते रोयिन च्यु यीशुन सेवा कोरतलू एने च्यु मारी जरवूतोमा मोदत कोरनारु से |
26
च्यु मांदलु से यो होंबी लेदला कोरीन च्यु नाराजमा से च्यु तुमुह मिवायाणे खूब इच्छा कोर रोयूह तिनामा मी तीनाह तुमुपाह मूकोंलतलु |
27
खोराखर च्यु खूब मांदलू मोर जाय ओहलू ओय गोयलु ओतु पूण बोगवान तिनापर दया कोरीन तीनाह हाजू कोरलू बोगवान तिनापर ओतरुज दया नी कोरलु पूण मी पेलेन दुखोमा ओतु उंजु बी मी दुखोमा नी रोयणु कोरीन बोगवान मेंहेपर बी दया कोरलु |
28
कोरीन मी तीनाह तुमुपाह फोसु मूकोंलेन खूब इच्छा कोरलु तीनाह देखिन तुमु बी खूब खुश ओय जाहोत एने मार दुख बी कोम ओय जाहे |
29
पोरबू यीशु मसीहमा तीनाहाते तुमु खुशिमा मिवायीन आवबाव कोरजू एने ओहला आखा माणहोन खूब आसरू राखजू |
30
काहाके मसीहन सेवान कोरता मोरतू मोरतू वाच गोयलु ओतु एने तुमरामा च्यी सेवा कोरनन बाकी ओति च्यी सेवा पुरो कर देय कोरीन सेवान कोरता तेर जीव लोगोण आपणे तीयार ओय गोयलु |