¹ Da Paul, Iesu Keriso apostle vebe Dirava rone dainehe,renu Timothy ni ogonane, oti Dirava dubuve Corinth uhura, renu oti Dirava horu aena koitave ya Achaian mata uhugati uhurahe. ² Hairava ravara yaiera renu mai ni Mame Dirava renu Rohi Bauge Iesu Keriso auseni ogonane. ³ Dirava renu ni Mame Rohi Bauge Iesu Keriso yaukena mageve misa. Auka uhudau yau Mamera renu mage Dirava vara. ⁴ Dirava raki ni huhuve uhura no yahe geima, Edainehe noma huhu nagohare koitavaya yahe geisa. Nona mage gahigeisa guma kobuga ei Dirava no yahe gevene nagate. ⁵ Iesu Keriso ni dainehe huhu nagane nagate, Eige ni yaheyahe vera Keriso uhurahe gera. ⁶ Eduge nona huhu uhurahegenu, era yai mageve dainehegera; renu nona yaheyahe uhurahegena, era yai yaheyahe uhurahe gera. Yai yaheyahe vera yai uhu berebeve dainehe gera, huhu kobuga era noki mia. ⁷ No ya anagevare ra uhu ananavara berebera ra, no mageve tagera yaki mia. ⁸ Badivara noka ura veite yaka nune gahisa, ni ogo nanuheya, Asia uhura huhu e nagate. Isuke rahoherea vera ni herove tage avie goinu, eige noki ni sigo ragohanu maguri toto. ⁹ Riaga, ni ada tagera hoge ramu enu. Guma eige noki novahu no idigei vata no gosigevenu, eduge nokamu beta Dirava garehanu, maguri biava. ¹⁰ Aukaki hoge uhura no maguri gahigevenu, renu yaukenu no yahe geisa. Ausenige noki ni gabidadamave maema aukena no yahe geisa. ¹¹ Auka ena kikivara a no yahegevare nagate. Eige koita mudago ni dainehe ya mage gahigei gevara ni gaharagohi koita yau imimi uhura. ¹² No gahara ragohare aukamu onu: Ni uhuananava mage renu matau ruta dainehe, beta ahata maka uhuvakava uhura eduge Dirava haire uhura. ¹³ No torevare ra yaka beta dahare renu dibana gahisa, eduge da anavare yaka regunaki dibana gahigavara ¹⁴ yakamu tinabe dibana gahanu, yaka ni mageve rorovara Iesu Keriso vanivehe, renu noka yai mageve rorovara. ¹⁵ Badivara di uhure aubougi gera daka dibana ra, daka yai gasina urugoi orogisa, eige yaka ihie orogare mageva misa. ¹⁶ Dakamu anavege daka rogi ya erageisa da Macedonia otarei. Daka Macedonia seni orogare daka gaitana rogi ya erageisa, eige yana da besugi daka Judea otisa. ¹⁷ Da enaki anana viege uhurahe, ena besibevana da viege? Dana di meve ahata makavara da kime, eige da roma, " Dodihegera, dodihegera" renu "Veitera,veitera" nega kobuga ei? ¹⁸ Eduge gabidadama vara Dirava eira, edainehe ni gare yai gasina gera beta "Dodihegera" renu "Veitera." ¹⁹ Eige Dirava Moe, Iesu Keriso ra, Silvanus, Timothy renu da, nokamu yai roia, auka beta "Dodihegera" renu "Veitera." Eduge auka, vani aubougi "Dodihegera." ²⁰ Badivara Dirava ominue aubougi gera "Dodihegera." Renu nokamu au uhura roia "Amen" Dairava au haire uhura. ²¹ Negubutu gera Dirava raki riaga noruta gahima aka Keriso uhurahe gera, renu aukaki a riaga gahanu, ²² au hedokate auki ni ada maemanu renu ni sorukehe uhura Horu Aena maemanu riaga gahima ihie orogare. ²³ Eduge Dirava daki riaga gahima di horuve dainehe, badivara daka beta Corinth daki orogi eige daka a maguri gahisa. ²⁴ Beta edainehe gera eige noka yai gabidadamave biava ragohisa. Eduge, noka bada ga ihihi meva koitava yabera aka hegiri visa, so gabidadamave uhura.