¹ Ndipo adalewa nawo, ''Chadidi ndikulewa na imwe, alipo winango pano adayimirira pano omwe anzalawidza lini imfa ate anzawona ufumu bwa Mulungu butabwera na ng'onga.'' ² Nsiku zi tanthatu zitamala, yesu adatenga Petulo na Yohani adakwira nawo pa phiri litali pambali pawokha, ndipo adasandulika pamaso pawo. ³ Bzakubvala bzache bzidaoneka bzakuyetimira, bzakuchena mbu ninga muwomba wakutsukira nguwo padziko lapansi angabzichenese lini okha. ⁴ Kinangoka Yeriya na Mose adawonekera kwa iwo, ndipo akhasewera na Yesu. ⁵ Petulo adatawira achilewalewa na Yesu, ''Rabbi, bzatidekera ife kukhala pano, tsono bwerani timange tumakhumbi tutatu, kabodzi kanu, kabodzi ka Mose, na kabodzi ka Yeriya.'' ⁶ (Pakuti iye akhadziwa lini chomwe amnzalewa.) ⁷ Mtambo udabwera ndipo udampsinkha iwo. Mumtambomo mudachoka mafala, ''Uyu ndiye mwana wangu nimbamfuna. Mtetekereni iye.'' ⁸ Mwadzidzidzi, pomwe adatembenuka, alibe kuwona munthu aliyense na iwo, adaona Yesu yekha. ⁹ Pomwe iwo akhabuluka m'phiri, iye adawalamula iwo kuti nampodi kawuza wanthu pabzomwe adabziwona kufikira pomwe mwana wa Payi akadzamuka kwa kufa. ¹⁰ Ndipo adakoya mafala mwa okha, ndipo adabvunzana bvunzana iwo okha, kuti, ''Kuti kumuka kwa kufa'' kukuthanthawuza chani. ¹¹ Iwo adamubvunza, ''Anyakunemba adalewa kuti chani anzayamba kubwera ni Yeriya?'' ¹² Ndipo iye adalewa nawo, ''Yeriya wayamba kubwera kudzakonza bzithu bzense. Tsono kwanembiwa chiyani kuti mwana wa payi akuthemera kubva bzakuwawa bzizinji na kuyeziwa bzautowa? ¹³ Koma ndakuwuzani kuti Yeriya wa bwera, ndipo adawachitira chilichense chomwe iye akhafuna, pakuti bzidanembewa bza iye.'' ¹⁴ Pomwe adabwera anyakupfunza, adawona chithimu chawanthu wakuzungulira iwo, ndipo anyakunemba akhabvunzana nawo. ¹⁵ Pomwe iwo adamuwona Yesu, thimu lense lidadabwa na kumuthamangira iye ndipo adamseweza. ¹⁶ Iye adawabvunza anyakupfunza, ''Mukubvunzana chiyani?'' ¹⁷ Ndipo winango wapa thimulo adamutawira, ''m'pfunzisi, ndabwera naye kwa imwe mwanangu,. Anamzimu wakusaya kusewera. ¹⁸ Ndipo pensene pomwe um'phata umugwesa, ndipo adachita thobvu pakamwa, achikukuta mano, na ofoka. Ndidawawuza anyakupfunzira wanu kuti amuchose iye, ndipo alibe.'' ¹⁹ Iye adawatawira iwo achilewa, mtundu wakusaya kukhulupilira, ninzakhala namwe kufikira ate liti? ninzakulekelerani nthawi yanyi? mubwere naye kwa ine. '' ²⁰ Ndipo adabwera nalo tswaka kwa iye. Ndipo pomwe chimzimu chire chidamuwona Yesu, popo udangwamba kwenekwene. Ndipo iye adagwa pansi achibvubvunyika nakuchita phobvu kukamwa. ²¹ Yesu adabvunza babache, kuti bzimwebzi bzidayamba liti kumuphata?'' Babache adalewa kuti, ''Bzidamuyamba alimwana. ²² Ndipo kawiri kawiri akhamtaya kumoto na mmadzi na kumudzomga. Penu munkwanisa chitani chilichense, tichitireni chifundo na kutithandiza.'' ²³ Yesu adalewa naye, ''Penu mungakwanise'? Bzinthu bzensene bzinkwanisika kwa iye amkhulupilira.'' ²⁴ Popale babache wa mwana ule adalira achiti, ''Ndakhulupilira! Thandiza kusaya kukhulupilira kwangu!'' ²⁵ Pomwe Yesu adawona thimu lawanthu likuthamangira iwo, adamugaza mzimu wa kuyipayo achiti, ''mzimu wakutazisa kulewalewa na kutazira kubva, Ine ndikutonga iwe, choka mwa umweyu, ndipo nampodi kupita pomwe mwa umweyi. ²⁶ Ndipo pomwe adakuwa adachita ngati wakomoka ndipo udachoka. Tswakayo adakhala ngati wakufa, terepo wanthu azinji adalewa kuti, ''Iye wafa.'' ²⁷ Ndipo Yesu adamuphata boko lache achimudzusa, tsono tswakalo lidamuka. ²⁸ Pomwe Yesu adapita mnyumba, wakupfunzira wache adamubvunza mbvunzo, ''Thangwe ranyi tatazira kuchosa mzimuyo?'' ²⁹ Iye adalewa nawo, ''Mtundu umweyu unkwanisika lini kuchoka na chinthu chilichense koma nakupemphwera.'' ³⁰ Ndipo adachoka kumweko, adayenda ku Galileya. Ndipo iye alibe kufuna kuti aliyense adziwe komwe iwo akhali. ³¹ Pomwe iye akhapfunzisa wakupfunzira wache. Iye achiti kunaiwo, ''Mwana wa munthu anzaperekiwa kwa wanthu, ndipo anzamupha. Ndipo angadzamupha pakumala nsiku zitatu anzamuka pomwe kukhala na moyo,'' ³² Ndipo iwo alibe kumubvesesa mafala yamweyo, ndipo adachita mantha kumubvunza. ³³ Kenangoko adayenda ku kaperenao. Pomwe adapita mnyumba mule adawabvunza, "Mukhauzana chani munjira mule?'' ³⁴ Koma iwo alibe kumutawira. Iwo akhagazana munjira kuti mkulu mbani. ³⁵ Khalani pansi, iye adachemera wakupfunzira wache khumi na awiri achiwauza, ''Omwe iye akufuna kukhala wakuyamba akhale wakumalizira na wakutumikira wense.'' ³⁶ Adatenga kamwana kang'ono achikayikha pakati pawo. Adamutakula mmanja mwache adalewa nawo, ³⁷ ''Ule omwe amtambira mwanangu mudzina langu watambira ine; iye wakutambira ine sikuti akutambira ine koma akutambira omwe adandituma.'' ³⁸ Yohani adalewa kuna iye, ''mpfunzisi, tidawona winango akhachosa bziwanda mudzina lanu tsono tidamuletsa, thange akhalilini mwanzathu. ³⁹ Koma Yesu adalewa tere, ''Nampodi kuletsa, thangwe palibe omwe anzaphata basa langu mudzina langu omwe tsampanopa lache achindisewera kuna wanthu bzakuyipa kuna ine. ⁴⁰ Omwe akuipidwalini nafe ngwathu umweyo. ⁴¹ omwe ankupasani kaneka ya madzi yakumwa mudzina langu ndimwe wangu wa khilisitu, chadidi ndikukuzani imwe, anzaluzalini mpfupo. ⁴² Omwe amchitisa m'bodzi wa maswakaya omwe ambandi khulupilira mkuwakhumudwisa, nibwino munthu wakuterepo kumumangirira chimwala chikulu mkosi mwache achithusiwa mu nyanza. ⁴³ Penu boko lako limkuchoseresa, ligwate. Nibwino iwe kudzatambira moyo wa muyaya utapunduka thangwera ine kusiyana nakukhala na manja yense mawiri koma mkudzayenda kumoto, kumoto wakusaya kumala. ⁴⁴ Bzakunemba bzakalekale bzilibe kunemba bzobzi, komwe nyongolotsi zao zinzafa lini, ndipo moto wache unzathima lini. Mafala aya yambawoneka mu ndime 48. ⁴⁵ Penu nzayo yako ikambakuphonyesa, igwate. Ndiponi kudzatambira moyo wakusaya kumala utapunduka kusiyana nakukhala na nzayo zako ziwiri koma mkukathusiwa ku ng'anjo ya moto. ⁴⁶ Bzakunemba bza kalekale bzilibe mafala aya. Komwe nyongolotsi zao zinzafa lini, na moto wao unzathima lini . ⁴⁷ Penu diso lako likukusocheresa, lichosa. Ndiponi kukapita mu ufumu bwa Mulungu na diso libodzi kusiyana nakukhala na maso yense uchikathusiwa ku ng'anjo ya moto, ⁴⁸ Komwe nyongolosi zawo zinzafa lini na moto wao unzathima lini. ⁴⁹ Pakuti aliyense anzayenda kumoto. ⁵⁰ Munyu ngwabwino, koma mphabvu yache ikamala, mungayibwezerese pomwe tani? Mukhale na munyu pa mwekha, nakuti pomwe mukhale na mtendere na anzanu wense