¹ Mkuluyo kuyenda kuna wa kukondeka Gayo, omwe nimbamukonda bza chadidi. ² Wakukondeka, ndikupemphera kuti bzensene bzifambe bwino kuna iwe nakuti ukhale wakulimba, ninga ndimo mzimu wako ulirimbo bwino. ³ Nakuti ndidasekera maninge pomwe abale adabwera kudzaikhira umboni bza chadidi cha iwe. ⁴ Ndiribe chimwemwe chikulu kuposa ichi, kubva kuti wana wangu ankufamba mu chadidi. ⁵ Wakukondeka, ukuchita chakukhulupirika nacho chirichense, umbawacitira abale na alendo ⁶ omwe achitira umboni bza chikondi chako pamaso pa mpingo. Umdzachita bwino kuwaperekeza pa ulendo bwao pa kuthemera kwa Mulungu, nakuti ⁷ thangwera dzinali adabula seye nkutambira chinthu kuna wa chikunja. ⁸ Mthangwe lache ife tikuthemera kutambira wakuterepayu, kuti tikakhale wakuthandizana nacho chadidi. ⁹ Ndidanemba chinthu kuna mpingo, soma Dioterefe ule, wakukonda kukhala mkulu wa wense, alibe kutitambira. ¹⁰ Tsono ningabwera, nimdzakumbusa bzichito bzache ndibzo ankuchitabzi, kumbasewera bza pezi pezi k,una ife na mafala ya kuipa, apo popeza ibzi bzikumukwana lini akutambira lini abale iye yekha, apo wakufuna kuwatambira zjai awaletsa achiwataya kunja kuwachosa mu mpingo. ¹¹ Wakukondeka, nampodi kutewezera bzakuipa soma bza bwino. Ndiye ambachita bza bwino ngwa bwino; wakuchita chakuipa alibe kuona Mulungu. ¹² Demetriyo adatambira umboni bwa bwino kucoka kuna aliyense na chadidi pomwe chaicho. Tikumuchitira pomwe umboni bza iye, apo mukudziwadi kuti umboni bwathu m'bwa chadidi. ¹³ Ndikhanabzo bzizinjisa bzakuti ndinembe kuna imwe, soma nimfuna lini ndikunembereni na chakunembera na tinta. ¹⁴ Soma nimdziwa tsampanopa nimkuonani pomwe, apo tichidza lewalewa pa maso na maso. ¹⁵ Mtendere ukhale kuna imwe. Anzathu akupereka kulimba kuna imwe. Mupereke kulimba kuna anzathuwo muchite kuwaguma madzina yawo.