¹ Pauli, umuvomvi wa Mulungu havili umupositili wa Yesu Chilisiti pa lwitiho ulwa vantu va Mulungu avasevwa havili nuvumanyi uvwa vwanalyoli vula vwe vukwitinkana nuvuMulungu,

² poka nulusuvilo ulwa vulanzi uvusita kusila vwe uMulungu, we atakuluma ilenga, ahalajizya pantanzi pankulo yonti iyahavalilo.

³ Pahavalilo ahenesho ahavumbula izwi lyakwe ukujendela muvulumbilili vwe poka ine nkava ne wakusuvila ukuyana kuvulamulili vwa Mulungu uMuposhi witu. ⁴ Kwa Titi, umwana nalyoli mu lwitiho lwe lutangaye. Uvwila nu mutende ukufuma kwa Mulungu uTata nu Chilisiti uYesu uMuposhi witu.

⁵ Pa fundo yinino ine nkakuleha iwe mu Kileti, ukuti iwe uvishe ivintu muluvatiho lwe nchili ukumalizya nu kuvalota avasongo mu nkaya yonti inza she nkakulingania iwe. ⁶ Usongo wa shivanza ahondeye ukuva wambula tufukwa, umulume wa mushi woka, poka navana avasuvaliwa vatave vambula nkalo navasita kwivwila.

⁷ Shili shete pavakwenyelezya, ukuva mupiti uwa nyumba ya Mulungu, ukuva we ate nishakumuyanga shimo . Atave namadali, atave wakuhalala luvilo, atave muzya wipele, atave muzuva, atave muntu umupafu. ⁸ Muvuyo vwakwe, ave wakuposhela avajeni, uwakugana uvwinza, uwakusivilila, umugolosu, umufinjile, havili uwakuyilesya weka.

⁹ Ahondeye ukulema nkani kunongwa zyanalyoli zye vahamanyisya, pe pakuti avanje wakuhondela ukuvagomya avanji nimanyisyo izya nalyoli havili nukuvagolosya vala ve vakumususya uwene. ¹⁰ Pakuti kuli avantu avinji avakuvushila, avakuyanga zyezili vulo havili avakuhopeha, nkaninkani kuvala ve vavubvolwa.

¹¹ Shintu ishinza ukuvalesya venevo. Vakupuvya inyumba inyinji zyonti pa kumanyisya imanyisyo izyakuvapindulila vavo veka kuzye vatahondeye ukumanyisya. ¹² Woka uwa vakuvwi vavo ahati, "Ava Keletani avene shima vilenga, vinyamana ivivivi, vapafu avahata."

¹³ Ulusimishizyo ulu lwanalyoli. Pelelo, muvalinganie ishete venevo, pe inga vavanje vanalyoli mulwitiho,

¹⁴ vatavanje vakuvatejelezya avaYuda ku miho gavo pamo kunkomelezyo zyavo izya vantu ve vakwepuha ukufuma kuvwanalyoli. ¹⁵ Kuvala ve vazelu, ivintu vyonti vizelu. Loli kuvala ve vahandamanu havili avasitakusuvila, nashimo ishizelu, nkandi vonti insivo zyavo ninyenyezyo zyavo zihandamine.

¹⁶ Vakuyanga ukuti vamumanyile uMulungu, loli vakumuhana wenewo ukujendela mumbombo zyavo. Ve vanyazu, avasitakwivwila, vevatahondeye kumbombo inyinza yonti