¹ Ine nkuyanga uvwanalyoli mwa Chilisiti. Ine ntakuluma ilenga, havili ninyenyezyo zyane zikumbishila uvwahome ine muMupepo umufinjile ² ukuti muline muli ishitima ishipiti nu vuvavu uvusita kusila mumwoyo wane. ³ She ine nkunyonywa ukuti ione nemwenesho ningatipwa nukupagulwa kwa Chilisiti pa mulandu wa vamwitu, ava muluho lwane ukuyanana na kumuvili. ⁴ Avene vina Isilayeli. Vasezitwe ukuva vana, uvushindamu, ulwitinkano, ishavwila sha lulajilo, uvuvombezi mukasi mwitepheli, ni fingwi. ⁵ Avo vevatata vitu ukufuma kuwuyo uChilisiti ayinzile numushinzi kumuvili-wuyo we wuMulungu pavonti. Uwene atimwaje shima nashima. Ameni. ⁶ Nkandi tekuti izwi lya Mulungu lipositwe. She te wonti we ali mu Isilayeli we naloli wa ku Isilayeli. ⁷ Pamu vonti avizikulu va Abulahamu nalyoli vana vakwe. Nkandi, "Ukujendela mwa Isikaka mwe muliyitwa vizikulu." ⁸ Ivo ve, avana vakumuvili te vana va Mulungu. Nkandi avana va lufingwi ve vakwitwa vizikulu. ⁹ She ili lye lizwi lya lufingwi: "Pahavalilizyo iha Ine nkwinza, havili umwana alipelwa kwa Sala." ¹⁰ Te sheka shinishi, nkandi lye uRabeka wope ava nishifuva sha mwanavuli woka, utata witu u Isikaka- ¹¹ she avana vashili vatapafilwe havili vashili vatavomvile nashimo ishinza pamu ishivivi, ingape imbombo ya Mulungu ukuyanana nukusala ukuti kupitilile, ¹² te pamulandu wa mbombo, nkandi pamulandu wa wula we akutwita-izyene zyayanzilwe kuwuyo, "Usongo alimuvombela umunsi." ¹³ Izyene zili inza she zyasimvilwe: "UYakobo ine namukunzite, nkandi u Esavu ine namupasite." ¹⁴ Shoni lelo she iswe tuliyanga? Kuli vumo uvusita vugolosu nu Mulungu? Ishi shitahinze shive nalumo. ¹⁵ She uwene ahati kwa Mose, "Ine ndiva nuvwila pa wula we ine ndiva nuvwila, havili ine ndiva numwoyo umwinza pa wula we ine ndiva numwoyo umwinza." ¹⁶ Ishi lelo, te mulandu wa wula we akasime, pamu mulandu wa wula we akushimbila, nkandi mulandu wa Mulungu, we akulanjizya uvwila. ¹⁷ She amasimbo gakuyanga kwa Falawo, " She kumbombo yinino ine nkakwinula iwe mumwanya, ukuti ine ndanjizye amaha gane mwiwe, havili ukuti izina lyane lilumbililwe munsi yonti." ¹⁸ Ishi lelo, uMulungu ali nuvwila pa wula we uwene akwanza, havili wula we uwene akwanza, uwene akumugomya umwoyo. ¹⁹ Imwe muliti lelo kuline, "Shoni she uwene ashili akuvwaga uvuvivi? Pe wunanu we ahapotana nukwanza kwakwe?" ²⁰ Apakupambania, muntu, we wenu we ukwamula ukuvushila uMulungu? Ishi she vashimasite shingayanga kuwula we ashimataga shenesho, "Shoni she umasite ine vunuvu?" ²¹ Ishi umumata nsonta atali namaha kwitope ukumata kufuma kwitope lyelila insonta yakuvombela ivyamushinzi, ni nsonta iyamwavo kuvombela ivya mwalwe? ²² Vuli inga uMulungu, we akwanza ukulanjizya uvuhalazu vwakwe nukuviha kuti amaha gakwe gamanyikwe, ahajimbilila nuvutehamu uvwinji uvwa vuhalazu vwe asenginie kulunanjiho? ²³ Vuli inga uwene ahavomba zinizi ukuti umwene amanyikwe uvudumbwe vwa vushindamu vwakwe pa nsonta ya vwila, ye uwene asenginie hali kuvushindamu? ²⁴ Vuli inga uwene ahavomba ishi havili kuliswe, vavo ve uwene ahavita, te kweka kufuma pakasi pa va Yuda, nkandi havili kufuma pakasi pa vakunzi? ²⁵ Inza she uwene akuyanga havili mwa Hoseya: "Ine ndivita avantu vane ve vatamile vantu vane, na vankundwa vakwe ve vatamile vankundwa. ²⁶ Pe liliva sheshila kula kwe vayanzile kuvavo, 'Imwe temwevantu vane,' kula avene valiyitwa 'Vana va Mulungu umupuma."' ²⁷ UYesaya akukuta ukuyanana nu Isilayeli, "Nangavuli imbazyo ya vana va Isilayeli yamile ngati lusenga lwa mwa Sumbi, shiliva kuvevasyala ve vali pokwa, ²⁸ she uMwene alimalilizya izwi lyakwe lyonti munsi umu kumalilizya havili shisita kuhava." ²⁹ Inza she uYesaya ahayanga hali, "Inga uMwene wa va mwene atahatuleshela iswe avizikulu, iswe ngetuli ngati wu Sodomu, havili nge twinza twava ngati uGomola." ³⁰ Pe iswe tuliyanga shoni lelo? Ukuti avakunzi, ve vatahayikungulaga ku vugolosu, vavulemeleye uvugolosu, uvugolosu mu lwitiho. ³¹ Nkandi u Isilayeli, we ahayikungulaga mundajilo zya vugolosu, atafisile pa lulajilo lwelula. ³² Shoni she vahapotwa? Mulandu avene vatahayikungulaga mulwitiho, nkandi inza mumbombo. Avene vapunuye pivwe lya lupunulo, ³³ inza she lyasimvilwe, "Yenya, ine nkwala muZiyoni ivwe lya kupunula havili nilyalavwe lya vuvivi. Uwene we akusuvila mulilyo atalipeziwa insoni."