2 Uvwila vuvanje kwimwe nu mutende kufuma kwa Mulungu uTata witu havili uMwene uYesu Chilisiti. 3 Ine nkumusalifya uMulungu wane ahavalilo honti he nkuvakumbuha imwe,
4 shima, muluputo lwane ulwakuvaputila imwe mwenti, lukuphelela iphuto zyane ukuva nishimwemwe
5 shifukwa sha vulilani vwinyu ni vangeli kufuma pe pisiku ilya kwanda paka nishi.
6 Ine ndi namaha ku shintu shinishi, ukuti wula we ayanzite imbombo inyinza kwimwe alijendelela ukuyimalizya paka pisiku lya Chilisiti uYesu. 7 Zigolosile kwine ukuyivwa vunuvu ukuyana nimwe mwenti mulandu ine ndinimwe mumwoyo wane. Imwe mwenti mwe valilani vane muvwila mwonti mu vukungwa vwane havili numwakuyizijilila kwane nukusimishizya ukwipangwi ilyinza.
8 Pakuti uMulungu wu home wane, she ine nkuvasamba imwe mwenti poka nishikunzi sha Chilisiti uYesu. 9 Pe ulu lwe luputo lwane: ukuti ishikunzi shinyu shonjezyaje ukukula muvumanyinsanyi na konti ukuyagania
10 ukuti imwe mushimanye shinza nkani, havili ukuti muve ahinza nukusita kulongwa nazimo paka pisiku lya Chilisiti,
11 mwizuye nishihomwa sha vugolosu vwer vukwinza kujendela mwa Yesu Chilisiti kuvushindamu ni ntimo zya Mulungu. 12 Ishi nkwanza ukuti imwe mumanye, vamwitu, ukuti she shivomvilwe kukwane shivomvilwe nkani ukukuzya ipangwi ilyinza.
13 She shihalandata, amanyololo gane mwa Chilisiti gahavoneshela apazelu mwonti munyumba zya vasilikali na kuwonti wula.
14 Avantu avinji vali namaha aminji mwa Mwene mulandu wa manyololo gane, havili vajimvile ukuyanga izwi vusita ilyoga. 15 Vamu mwemumwo vamulumbiliye uChilisiti umwa nkwini nu kudalinkana, havili na vanji umwa kwanza ukwinza.
16 Avanji vakuvomba izi kushikunzi shavo, vamanyile ukuti ine ndi umu ukuliyanjila ipangwi ilyinza.
17 Nkandi avatanzi vahamulumbilila uChilisiti umwa kuyigana, mutali umwa kufuma pansi pamoyo. Vahasivaga ukuti zingaphelela intamyo ine pe nchili ndi mumanyololo. 18 Shoni lelo? Pe mwidala lyonti - kali kufuma muvuvivi pamu kufuma muvwinza - uChilisiti akulumbililwa, havili mwishi ine nkuseshela. Mwemumwo, havili ine ndiseshela,
19 she ine manyile ukuti ishi shilipela ukusatulwa kwane ukujendela muphuto zyinyu nu vwavwilizi vwa Mupepo wa YesuChilisiti. 20 Ukunyonywa kwane nulusuvilo ukuti ine ntalisamulwa mwidala lyolyonti, loli nukujimba kwane konti, ishi ngati shima, uChilisiti aliyinulwa mumuvili wane, kali kujendela kuvulanzi pamu ku vufwe.
21 She kukwane kuva ne mulanzi wu Chilisiti havili kufwa kulonka. 22 Nkandi inga ine nkuva nemulanzi ku muvili, isho shikung'anamula ukuva mbombo ya pindu kukwane. Pe shilikwiyi ishakusala? Ine ntakumanya.
23 Pakuti ine nafinyiliziwa nkani nivintu vivili. Ine ukwanza kwane kwa kwepa nukuva poka nu Chilisiti, she sheshinza kweneko,
24 havili ukusyala kumuvili kwinza nkani pamulandu winyu. 25 Pakuti mwasimishizya ishi, ine manyile ukuti ndisyala nukujendelela poka nimwe mwenti, nukupitilizya kwinyu nuluseshelo mulwitiho,
26 ukuti mumwane imwe muve nivifukwa vyakonjela ukuyibadila mwa Chilisiti uYesu lwe ine nkwinza kwimwe havili.
27 Kwe kuyivatiha mwemwe mweka muhavele he hakuhondela kwi pangwi ilyinza ilya Chilisiti, ukuti pope inga ine nkwinza ukuvenya imwe pamu ntanginza, ine nivwaje nizyakuyana nimwe, ukuti muyisimfile mumupepo woka, poka ninsivo yoka ukulwisya poka pa lwitiho lwi pangwi ilyinza. 28 Mutahanyile mumushinzi aliwonti na vala ve vakuvasusya imwe. Ishi she shimanyilo kuvavo kuzya lunanjiho lwavo, loli ukuva vuposhi vwinyu - havili ishi kufuma kwa Mulungu.
29 Pakuti ishene shipelilwe pavulo kukwinyu pa shifukwa sha Chilisiti te kweka ukusuvila muwuyo, loli nukuyimba havili pa shifukwa shakwe,
30 ukuva mumayimba amaholanu nage muhenya mumwane, havili nishi mukugivwa kukwane.