¹ U yesu ahepa pavuzilo vula nukuvala kushigavo sha mu-Yudayi nakuvuzilo vwa kwisyilalyi jenje u Yoiodani. Pe impuga yihinza kukwakwe havili. pe ahavamanyisya havili, ngati she amata gavo gahanzaga pakuvomba. ² Pe ava Falisayi vahinza kukwakwe pa kumulinga nu kuvuzya, ''Ka shinza munkomelezyo umwanavuli akumuleha umushi wakwe?'' ³ Pe ahamula ahati, ''ka uMose ahavahomeshezya shoni?'' ⁴ Pe vahati, ''Umose ahitishizya umwanavuli ukumusimbila ukalata wakumusoka nukumuvwezya.'' ⁵ "Shifukwa sha moyo ginyu amagomu she ahavasimbila imwe uluhomelezyo ulu,'' U Yesu she ahayanga kuvavo. ⁶ ''Loli ukwanda kwe kuvwandilo vwa vipelekwa, 'U Mulungu ahapela umwanavuli nu mwantanda.' ⁷ ''Pashifukwa ishi umwanavuli alimuleha uyise nu nyina nukusyelematila kumushi, ⁸ Pe vavili valiva muvili wsoka.'' Pe vatali vavili, loli muvili woka. ⁹ Pisho she uMulungu ashipantinkania poka kutahave umuntu wakushilehania.'' ¹⁰ Lwe avene vali munyumba, avasundikwa vahamuvuzilizya havili ukuyana nishi. ¹¹ Pe ahati ku vavo, ''Wonti we akumusosya umushi wakwe nukusenda umwantanda uwunji akuvembuha nukumunanjila uwene. ¹² Inga uwene akusoka ku mulume wakwe nukusendwa ku mwanavuli uwunji, akuvembuha.'' ¹³ Pe vahaleta avana avansi kukwakwe ukuti avapalamansye, loli ava sundikwa vahavahalipila. ¹⁴ Lwe uYesu azimanya izi, atahahovoha ahati kuvavo, ''Leha avana vinze kukwane, mutahavahanizye, she ishinamwene sha Mulungu sha ve vali ngati vavo. ¹⁵ Nalyoli nkuyanga kwimwe, wonti we atalishiposhela ishinamwene sha Mulungu ngati mwana umunsi we nalyoli ataliyinjila mumo.'' ¹⁶ Pe ahavanyamula avana pa nyove zyakwe ahavalota pe avisile inyove pa vavo. ¹⁷ Lwe ayanzite uvu lendo vwakwe, umuntu ahamushimbilira nu kusugamila pantanzi papakwe nu kuvuzya, ''Manyisi umwinza, ka ibombe shoni pakuti mpyane uvulanji vwashima?'' ¹⁸ Uyesu ahati, ''Shoni she ujkunita ine mwinza? Nawumo umwinza wu Mulungu weka. ¹⁹ Uzimanyile inkomelezyo; 'utahagogaje, utahavembuhaje, utahivaje, utahahomeshezyaje izyilenga, utahafyulaje ivya wamwinyu, ushindishe utata nu mama waho.''' ²⁰ Umuntu ahayanga ahati, ''Manyisi, izi zyoti nkazyivwila ukufuma kuvunsi.'' ²¹ Pe uYesu ahamwenya nukumugana. ahati kuwuyo, ''Pali ishintu shoka she ukusobelwa. Uhondeye ukazye vyonti vwe uli navyo nukuvapa avapina, pe uliva nishuma kumwanya. Pe winze, undandate ine.'' ²² Nkandi shifukwa sha mazyi iga isgeni shakwe shihasungama ahajendas apunuye, shifukwa amali ni shuma ishinji. ²³ Pe uYesu ahenyelezya nu kuyanga kuva sundikwa vakwe, ''Vugomu vuli avadumbwe ukwinjila ku shinamwene sha Mulungu!'' ²⁴ Pe ava sundikwa vahasukumila ku mazwi gakwe pe uYesuahayanga kuvavo havili, ''vana, vugomu vuli ukwinjila ku shinamwene sha Mulungu.'' ²⁵ Shipepusu ingamila ukwinjila pilyinso lya nsindano ukulusya udumbe ukwinjila mushinamwene sha Mulungu.'' ²⁶ Pe vahasukumila nkani nukuyanga kwa woka nuwamwavo, ''Pe wunanu alipona?'' ²⁷ Pe uYesu ahavenyelezya ahati, ''Ku vantu shitazu, lelo tekwekwa Mulungu. Ivyene ivintu vyonti vikuvombwa nu Mulungu.'' ²⁸ Upeteli ahanda kuyanga kuli wuyo, ''Yenya isye tulesile vyonti nu kukulandata iwe.'' ²⁹ Uyesu ahayanga, ''Nalyoli nkuvavuzya imwe, pataliko nawumo we alesile inyumba pamo avakulu vakwe pamo avana vakwe pamo umama pamo ubaba wakwe pamo avana vakwe pamo amagunda shifukwa shane nishivangeli ³⁰ we ataliposhela ivigavo 100 pe kushili shinishi munsi ino iya pansi inyumba na vakulu na mayemba na vamama na vana na magunda, nukuyinvilwa, na munsi ye yikwinza, uvulanzi vwa shima nashima. ³¹ Nkandi avatanji valiva visinda, avkisinda valiva vatanzi.'' ³² Vamile mwidala ukuvala ku Yerusalemu, uwene uYesu ali muntanzi mwavo. Ava sundukwa vahasukumila nkani, nave vahalandataga mwisinda vahanyila. Pe uYesu ahavasenda 12 kuluvazu havili pe ahanda ukuvavuzya she shandi shivombwe shinishi kukwakwe. ³³ "Yenya, ukuvala mpaka ku Jerusalemu, pe umwana wa muntu vavala ukumulemeha ku vashiputo avapiti na vasimbi. Inti vahamususye mpaka kuvufwe nukumulemeha ku vakunzi. ³⁴ Valimovela, nukumusyilila, nukumusyempa, nukumugoga. Loli lwe amasiku gasila gatatu alizyuha.'' ³⁵ Yakovo nu Ylohani, avana va Zebedayi, vahinza kukwakwe vahati, ''Manyisi, tukwanja utuvombele iswe shonti she tukukulava Iwe.'' ³⁶ Pe ahayanga kuvavo, ''Shoni she mukwanza imbavombele imwe?'' ³⁷ Vahayanga, ''utwitishizye iswe ukwihala poka niwe muvushindamu vwaho, woka kunyove yaho iyamalyelo uwamwavo kunyove yaho iyamongo.'' ³⁸ Nkandi uYesu ahavamula vavo, ''Mutamanyile she mukulava. Vuzye mungang'wela ishikombe shending'wela pamo ukujimbilila ulozyo lwe ndiyozyelwa?'' ³⁹ Vahayanga kuli wuyo, ''Tungashivomba.'' Uyesu ahayanga kuvavo, ''Ishikombe she nding'wela, nimwe muling'wela,pe nu lozyo lwe nozelilwe, nimwe vulo muli yozelwa. ⁴⁰ Loli we angihala kunyobe yane iya malyelo pamo kuyamongo teshane pakumupa, Nkandi sha vala veva vasenganizizye.'' ⁴¹ Lwe avamwavo ava sundikwa vivuye izi, pe vahanda ukuvahalalila uyakovo nu Yohani. ⁴² Uyesu ahavitizya kukwakwe nukuyanga, ''Mumanyile vala vevahavaviha ukuva valamulili vavakunzi vakuvalamulila venevo, pe navapiti vakuvomva uvulamulilo mumwavo. ⁴³ Loli shitaliva vunuvu papinyu. Wonti we akwanza ukuva mupiti papinyu wahondeye ave muvomvi, ⁴⁴ uno we ankwanza ukuva wakwanda papinyu wahondeye ukava muzya wa vonti. ⁴⁵ Nkandi uMwana wa muntu atahinza ukuti vamuvombelaje, loli nukuvomba, nukuyipa uvulanzi vwakwe ukuva sha kuvapoha avinji.'' ⁴⁶ Vahinza ku Yeliko. Lwe ayepa mu-Yeliko poka nava sundikwa vakwe poka nimpuga, umwana wa Timoteyo, uBaritimeyo, utonko we ahalavaga ivyakulava, amihaye pidala paluvazu. ⁴⁷ Lwe ayivuye ukuti wu Yesu Wanazareti, pe ahanda ukwitizya nu kuti, ''Yesu, Mwana Davide, umpelelaje uvwila!'' ⁴⁸ Avinji vahamuhalipila untonko, nukumuvwezya ukuti fuma. Loli pe ahalila nkani ukulusya, ''Mwana wa Davide, mpelelaga uvwila ine!'' ⁴⁹ Uyesu ahimilila nukumulamulila wuyo ukuti vamwitizye. Vahamwita untonko, vahati, ''Jimbaga! Nyamuha! Akukwitizya iwe.'' ⁵⁰ Ahasumba paluvazu ishizyalo, pe ahanyamuha, nukubala kwa Yesu. ⁵¹ Uyesu ahamwamula ahati, ''Ukwanza ine nkuvombele shoni?'' Pe untonko ahati, ''Manyisi nkwanza ukwenya.'' ⁵² Pe uYesu ahayanga kuli wuyo, ''Jendaga. Ulwitiho lwaho lwakupozya.'' Mwaluvilo ahenya havili, pe ahamulandata mwidala.