¹ U Yesu ahapyanizya ukuyanga ku kwavo muviholanyo, ahati, ² ''Uvumwene uvwakumwanya vuli ngati wu mwene wumo we asenginye ukuseshelela ukwi senda ilya mwana umulumendo. ³ Uwene ahavatuma avavomvi vakwe ukuvita vala ve avisite ku luseshelo ulwi senda, loli avene vatahinza. ⁴ Havili umwene ahatuma avavomvi avanji, ahati, 'Vavuzye vala ve visitwe, ''Yenya, Ine nsenginye ishakulya shane isha hamazuva.Ing'ombe zyane izyi Geleta na zye zyinile ngozile, pe ni vintu vyonti vilipo nzila. Nzaji ku luseshelo ulwi senda.''' ⁵ Loli avene vatahatejelezya pe vahepa, woka ku mugunda wakwe, uwamwavo ku vyakukazya vyakwe. ⁶ Avanji vahavalema avavomvi ava mwene, vahavizizya nu kuvasamula venevo, nu kuvagoga venevo. ⁷ Umwene aha halala pe ahavatuma avalwa vulugu vakwe pe vavagozile vonti avagozi havili vapemvile ni nkaya yavo. ⁸ Pe uwene ahavavuzya avavomvi vakwe, 'Uvwinga vupalamiye, loli vala ve vavisite vatahondeye. ⁹ Pe lelo muvale mu madala amalehana aga pamwanya pe muvitizye avantu avinji ku luseshelo ulwi senda inza mwe imwe mungavajila. ¹⁰ Avavomvi vahavala mu madala aga pamwanya nukuvunganiha avantu vonti ve avene vavazile, vonti avavivi navinza. Pe inyumba iya vwinga yizuye na vajeni. ¹¹ Nkandi lwe umwene ayinzile ahenyelezya pe vajeni, pala uwene ahenya umuntu we atazwaye amenda aga pa vwinga. ¹² Umwene ahati ku kwakwe, 'Mumanyani, iwe winjiye vulivuli umu lwe utali na menda aga pa vwinga?' Loli umuntu atayanzile nashimo. ¹³ Pe umwene ahati ku vavomvi, 'Mumupinye umuntu uno mu nyove na muvinama, pe mumusumbile uwene kunzi kushisi, kwe kuliva ukulila nu kusya amino.' ¹⁴ She avantu avinji vahitwa, loli avasevwa vansi.'' ¹⁵ Pe avafalisayi vahavala nukuyanjizanya avene mwe vangamulemela u Yesu muhayanjile hakwe. ¹⁶ Pe avene vahatuma ku kwakwe avasundikwa vavo, poka nu Helodiya. Avene vahati kwa Yesu, ''Mumanyisi, iswe tumanyile ukuti iwe we wanalyoli, nukuti ukumanyisya idala ilya Mulungu mu vwanalyoli. Iwe utakusajila insivo izya wumo, havili utakulanjizya ukugava pakasi pa vantu. ¹⁷ Pe tuvuzye iswe, iwe ukusiva shoni? Ulwene lungava lulajilo ukulipa umusonko kwa kesali pamo haa?'' ¹⁸ Loli u Yesu avumanyile uvuvivi vwavo pe ahati, ''Shoni she imwe mukundinga Ine, mwe valumilenga imwe? ¹⁹ Ndajizya Ine ikopala ilya musonko.'' Pe avene vahamuletela idinali. ²⁰ U Yesu ahati ku kwavo, ''Ishiholanyo ni zina vyawenu ivi?'' ²¹ Avene vahati ku kwakwe, ''Sha Kesali.'' Pe u Yesu ahati ku kwavo, ''Pe mumupe u Kesali ivintu vye vya Kesali, na kwa Mulungu ivintu vye vya Mulungu.'' ²² Lwe avene vivuye ishi, vahasukumila, pe avene vahamuleha uwene pe vahepa. ²³ Pisiku lila avasadukayi vamo, ve vakutinji ukuzyuha nakumo, vahinza ku kwakwe. vahamuvuzilizya uwene, ²⁴ vahati, ''Mumanyisi, u Mose ahati, 'Inga umuntu afwa, atali na vana, uwamwavo umusende umushi wakwe nukumupapila avana umukulu wakwe.' ²⁵ Kwamile avanavuli 7. Uwavwandilo asenzite pe ahafwa. Atavalesile avana, uwene ahamuleha umushi wakwe kwa wamwavo. ²⁶ Pe uwamwavo uwa vuvili avomvile ishintu shalishoka, nuwa vutatu vwelele, na vonti ukufiha avavuli 7. ²⁷ Lwe vasila vonti vala, umwantanda ahafwa. ²⁸ Ilelo pa kuzyuha, aliva mushi wawenu pa vanavuli 7? She avene vonti vamusenzite.'' ²⁹ Pe u Yesu ahamula nukuti ku kwavo, ''Imwe mupuvile shifukwa mutagamanyile amasimbo pamo amaha aga Mulungu. ³⁰ She pa kuzyuha avene vatalisendaga nakwe kusendwa. Muvuzilo vwakwe, avene vali ngati ve vahavizya ava kumwanya. ³¹ Loli ukuyana nizya kuzyuha ukwa vafwe, kwe kuti imwe mutavazizye zye zyayanzilwe nu Mulungu, ahati, ³² 'Ine ne Mulungu uwa Abulahamu, uMulungu uwa Yisaki, nu Mulungu uwa Yakovo'? U Mulungu te wu Mulungu uwa vafwe, loli wu Mulungu uwa valanzi.'' ³³ Lwe impuga zyivwa ishi, izyene zyasukumiye ku vimanyisyo vyakwe. ³⁴ Loli lwe avafalisayi vivuye ukuti u Yesu avapumilizizye avasadakayi, avene vahavungana vavo veka poka. ³⁵ Woka muli vavo, we amanyile nkani indajilo, ahamuvuzilizya uwene ivuzyo, ukumulinga - ³⁶ ''Mumanyisi, luhomelezyo vuli lwe lupiti nkani mundajizyo?'' ³⁷ U Yesu ahati ku kwavo, '''Umugane uMwene u Mulungu waho nu moyo waho wonti, nu vulanzi vwaho vonti, pe ni nsivo zyaho zyonti.' ³⁸ Ulu lwe luhomelezyo ulupiti nkani havili lwavwandilo. ³⁹ Pe nu luhomelezyo ulwa vuvili luli ngati lwelulo - 'umugane umupalamane waho ngati wewe wemwesho.' ⁴⁰ Pa nkomelezyo zivili izi pegamiye indajizyo zyonti pe na vakuvwi.'' ⁴¹ Ishi lwe avafalisayi vashili vavungine poka, u Yesu ahavavuzilizya avene ivuzyo. ⁴² Uwene ahati, Imwe mukusiva shoni nizya Chilisiti? Mwana wawenu?'' Avene vahati ku kwakwe, ''mwana uwa Davidi.'' ⁴³ U Yesu ahati ku kwavo, ''Pe u Davidi mu mupepo ahamwitaga vulivuli uwene ukuti Mwene, ahati, ⁴⁴ 'U Mwene ahayanga kwa Mwene wane, ''Tendama ku nyove yane iyandilo, ukufishila pe Ine navapela avalugu vaho vya kutendamishila papo ivinama vyaho'''? ⁴⁵ Inga u Davidi lelo akumwita u Chilisiti 'Mwne,' pe uwene angava mwana wa Davidi vulivuli?'' ⁴⁶ Nawumo we ahondeleye ukumwamula uwene izwi, havili nawumo umuntu we ahanzaga ukupitilizya ukumuvuzilizya uwene amavuzyo ukufuma pisiku lila nukupitilila.