¹ Yuda, umuvomvi wa Yesu Chilisiti havili uwamwavo wa Yakobo, kuvala ve vahitwa, vankundwa mwa Mulungu uTata, havili ahatusengula mwa Yesu Chilisiti: ² Uvwila nu mutende nu lugano lunyamane palimwe. ³ Vankundwa, pe ine nkalwisyaga ukuvasimbila imwe ukuyana nuvuposhi vwatwevonti, Ine nkuvasimbila imwe ukuvagomya imwe ukulwisya ukwamahaku lwitiho lwe tuhapelwa lwoka kuvonti avantu vaMulungu avafinjile. ⁴ She vamo avantu vahatoloha ishimyamya pakasi pinyu. Avantu vanava vahasimbwa hali kwilonjelwi. Avene vantu ve tevanyila Mulungu ve vahasinta uvwila vwa Mulungu witu ukuva vuzelelusu, havili ve vahamuhana usongo witu weka havili uMwene, Yesu Chilisiti. ⁵ Ishi nkunyonywa ukuvakumbusya imwe _ nashe lumo mwashimanyile ahinza sana_ ukuti uMwene aposile avantu ukufuma munsi ya Iguputo, nkandi pisinda pakwe uwene ahinza avanangania vala ve vatahasuvila. ⁶ Havili avahavizya ve vatikutisiwe nuvuzilo vwa vulamulilo vwavo, nkandi avene vahaleha uvuzilo vwa vukato vwavo uvwinza_ uMulungu avasenguye venevo mumanyololo amasita kusila, mushisi ishipiti, paka pisiku lya vulonzi ipiti. ⁷ Inza vunuvwo uSodomu nu Gomola ninkaya zye zivazyunguliye vinzile vayiviha muluvembu nukuvomba imbombo zya vunyazu. Avene vakuvombela ngati shiholanio sha vala ve vakuyimba mulupaniho lwa moto washima. ⁸ She mwidala linili, iva ava vilota vope vakunyazya amavili gavo. Avene vakuhana uvulamulili havili vakuyivya vala avashindamu. ⁹ Nkandi nawe wu Mikayeli uhavizya umupiti, lwe uwene akudalinkana nu setano nukulimbana nawo izya muvili wa Mose, atahashela ukumulonga uwene ukuti amuyivya, nkandi uwene ahati, "UMwene akulonje iwe!" ¹⁰ Nkandi avantu iva vakuligana nashe avene vatakushagania; havili zye avene vakuvomba vumanyinsanyi uvupelwa, ngati vihanu vye vitakuyagania, ivi vye vintu vyevila vye vikuvananga venevo. ¹¹ Mahosi kuvavo! She avene vajezite mwidala lya Kayini havili vashimbilila muvupuva vwa Balamu. Vasiliye mumaluli ga Kola. ¹² Iva vantu vamu avalugu nkani muvyakulya vyinyu ivyaluseshelo ivinkundwa, vatali nilyoga nukulya nimwe_ vadimi vevakuyilisya vavo veka. Avene mavingo amasita mvula gegakujenda nimpepo; makwi agashisiku, amasita vihomwa_ gafuye havili honti, manyunkule. ¹³ Avene mayigha amahali aga mwasumbi, vakufumya itatafula lya vupezya nsoni vwavo; nzota zye zikujendajenda, pe avene vasengulilwe shima nashima mushisi ishipiti nkani. ¹⁴ Enoki, uwa 7 kufuma kwa Adamu, ahakuvwa izya vavo, ahati, "Yenya! UMwene akwinza poka namasawuzani na masawuzani ga vafinjile vakwe. ¹⁵ Umwene akwinza ukulonga aliwonti. Uwene akwinza ukuvasusya vonti vevatakunyila uMulungu mumbombo zyonti zye vavomvile mumadala gavusita kunyila uMulungu, havili nakumazwi amahali gonti ge avatala malandu vevatakunyila uMulungu vayanzile ukumuvushila uwene." ¹⁶ Avene vakuyilizania, vakudandaula, vakulandata ivinyonywa vya vutalamalandu vwavo. Amalomo gavo gakuyanga nkani amayibado, vakuvadeba avanji ukuyikavila ivintu. ¹⁷ Nkandi imwe, vankundwa, mukumbushe amazwi ge gahayangwa hali numupositili wa Mwene witu uYesu Chilisiti. ¹⁸ Avene vahati kulimwe, "Muhavalilizyo havumalilo kuliva avalovezyo ve valilandata ivinyonywa vya vusita kunyila uMulungu kwavo." ¹⁹ Ve vanava ve vakupela ulugavinkano; avene vali muvyamunsi havili avene vatali nuMupepo. ²⁰ Loli imwe, vankundwa, muyizenje mwemwe mweka mulwitiho lwinyu ulufinjile, havili mupute mumupepo umufinjile. ²¹ Muyisunjilile mwemwe mweka mushikunzi sha Mulungu, pe mulindilile uvwila vwa Mwene witu uYesu Chilisiti we akuvaletela imwe uvulanzi vwa shima. ²² Muve mwevavwila kuvala ve vakukayika. ²³ Muvaposhe avanji pa kuvasompola venevo kuvefya kumwoto; kuvanji mulanjizye uvwila nilyoga, muwupataje nawe mwenda we wuhombeye nu muvili. ²⁴ Ishi kuwumo we ahondeye kuvapoha imwe kufuma kumpunuzyo havili nukuvapela imwe ukwimilila pantanzi pavushindamu vwakwe vwe vukuvoneshela shisita vunanzi nuluseshelo ulupiti, ²⁵ kwa Mulungu witu weka umuposhi kujendela mwa Yesu Chilisiti uMwene witu, kuve uvushindamu, uvupiti, amaha, nu vulamulili, lye hashili ahavalilo honti, ishi, nashima nashima. Ameni.