¹ Vufumile kwiyi ukulwana nukupokota pakasi palimwe? Vutafumile muvinyonywa vyinyu vye vikulwa pakasi pa tuntu twa mumavili ginyu?

² Imwe mukunyonywa, loli mutalinavyo. Mukugoga nukunyonywa,loli imwe mutahondeye ukuvyaga. Mukulwa nukunyamusya uvulugu. Imwe mutakuva navyo mulandu imwe mutakulava.

³ Imwe mukulava loli mutakuposhela mulandu imwe mukulava havivi, ukuti muvale muvombele ivinyonywa vyinyu. ⁴ Mwe va vembu imwe! Imwe mutamanyile ukuti ukuva nuvumanyani ninsi kuvengana nu Mulungu? Pe we akunyonywa ukuva pavumanyani ninsi akuyigombela weka ukuva mulugu wa Mulungu.

⁵ Pamo mukusiva ukuti amasimbo gakuyanga mwalwe, "Umupepo we ahawupela ukwihala muliswe muzuva nkani?" ⁶ Loli uMulungu akutupa uvwila uvwinji, pe amasimbo gakuti, "UMulungu akususania nukuyikwezya, loli akupa uvwila kuve vakuyisya."

⁷ Pe muyisye kwa Mulungu. Muhane usetano, pe uwene alivashimbila imwe. ⁸ Mupalamile kwa Mulungu, pe wope alipalamila kwimwe. Muzyelufye inyove zyinyu, mwe vatalamalandu imwe, havili muzelufye amoyo ginyu, mwe vantu va nsivo inyinji nyinji.

⁹ Muyilumbusye, muswilimane, havili mukute! Leha ukuseha kwinyu kugalunkane ukuva shitima havili nukuhovoha kwinyu kuve vusulumanie.

¹⁰ Muyisye mwemwe mweka pantanzi pa Mwene, pe uwene alivakwezya imwe. ¹¹ Mutahayangaje uvuvivi uvwa wamwinyu, vamwitu. Umuntu we akuyanga uvuvivi ukuyana nuwamwavo pamu akumulonga uwamwavo akuyanga uvuvivi ukuyana nululajilo havili akulonga ululajilo. Inga ukulonga ululajilo, iwe utakuvomba izya lulajilo, loli we mulonzi.

¹² Aliwoka vulo we akupa ululajilo nukulonga. We weyuyo we ahondeye ukupoha nu kunangania. We wewenu iwe, iwe we ukulonga umupalamani waho? ¹³ Ishi tejelezyi, imwe mwemukuti, "Ilelo pamu indavi iswe tulivala kunkaya ino, tukumala umwaha mumwo, tulikazya, nukuyikavila."

¹⁴ Wuwenu we akumanya sheshilivombwa indavi, havili uvulanzi vwinyu shoni? She imwe mwesusuvwe lwe lukuvoneshela pahavalilo hansi havili lukusovela. ¹⁵ Mumalo mwakwe, imwe mutinji, "Inga uMwene akwanza, iswe tulitendama nukuvomba ishi na shila."

¹⁶ Nkandi ishi imwe mukuyibada ukuyana nimbatiho zyinyu imbivi. Konti ukuyibada uko vutalamalandu.

¹⁷ Pe wula we amanyile ukuvomba inyinza loli atakuzivomba zyenezyo, kuwuyo vutalamalandu.