¹ Yakobo, umuvomvi wa Mulungu havili wa Mwene u Yesu Chilisiti, ku nduho 12 zye zisasite: Nkuvalamuha!

² Mulusende lwenelo lwonti luseshelo, mwe vamwitu , lwe imwe mukuhomana ninthamyo zyakulehanalehana.

³ Imwe mumanyile ukuti ukulingwa kwa lwitiko lwinyu kukuleta uvujimvu. ⁴ Leha uvujimvu vumalizye imbombo yake ukuti imwe mukule hinza havili mwevalunjisu, mutasovelwaje nashimo.

⁵ Nkandi inga wumo mulimwe akwanza injele pe uwene alave zyenezyo kufuma kwa Mulungu, uwene we akupa kuvwinji havili shisita kuvasusya vonti ve vakulava, pe uwene alimupa zyenezyo. ⁶ Nkandi muleshe uwene alave mulwitiho, atapasyaje nashimo. She wula we akupasya alingati mavilingwa aga mwa Sumbi ge impepo yikugajezya habili gakulivilila.

⁷ She umuntu wewula atasivaje ukuti uwene aliposhela shimo kufuma kwa Mwene; ⁸ Uwene muntu uwansivo zivili, atatengine mumadala gakwe gonti. ⁹ Leha uwamwitu uwapansi nkani ayibadile ishitengo shakwe ishapamwanya,

¹⁰ nkandi umuntu udumbwe wope atutumushile itengo lyakwe ilya pansi nkani, mulandu uwene alifwa ngati vwezya vwamunzi mwisole.

¹¹ She izuba likufumaga nilungula ilya kosha pe likumiha isole. Uvwezya vukulagala, nuvwinza vwake vukulova. Mwidala linili, umuntu udumbwe alifwoha mukasi mwidala lyakwe. ¹² Alositwe umuntu we akujimbilila mundingo. She inga azishila indingo, uwene aliposhela impuphu ya vulanzi, ye ahafinga kuvala ve vakumukunda uMulungu. ¹³ Patahave nawumo uwakuyanga lwe akulingwa, "Ine nkulingwa nu Mulungu ", mulandu uMulungu atakulingwa ni mbivi, na wuyo umwenesho atakumulinga nawumo. ¹⁴ Nkandi umuntu wonti akulingwa ni shinyonywa shakwe, zye zikuvakwesa venevo nukuvadeba.

¹⁵ Ilelo pisinda ishinyonywa inga shakula, pe shikupapa uvutalamalandu, pe pisinda lye uvutalamalandu vwakula, vukupapa uvufwe.

¹⁶ Mutahahopekwe vamwitu avankundwa. ¹⁷ Shonti ishavwila ishinza ni shavwila ishinza nkhani shikufuma mumwanya. Shikwishila pansi kufuma kwa Tata uwavuzelu. Poka nawuyo kutaliko ukusintha pamu ishizyungani mulandu wa kugalunkana. ¹⁸ UMulungu ahaseva ukutupapa iswe mwizwi lya vwanalyoli, ukuti iswe tuve muhavele ha shihomwa ishakwanda ishavipeliwa vyakwe vyonti. ¹⁹ Imwe mumanyile ishi, vamwitu avankundwa: Leha umuntu wonti ave wakwivwa luvilo, atahayangaje luvilo, havili atahahalaje luvilo. ²⁰ She uvuhalazu vwa munthu vutakuleta uvugolosu vwa Mulungu. ²¹ Pelelo mwefye vwonti uvunyazu vwa vutalamalandu nu vwinji vwa mbivi. Umwakuyisya mposhele amazwi amavyalwa, ge gahondeye ukupoha amoyo ginyu. ²² Muve mwe vakugavombela amazwi havili mutahave mwevakwivwa vulo, mukuyihopeha mwemwe mweka.

²³ She inga wumo wakwivwa vulo amazwi loli atakugavombela, uwene ali ngati munthu we akuyenyelezya isheni shakwe pigalasi. ²⁴ Akuyenyelezya wuyo weka pe akwepa penepo havili mwaluvilo akuluvya she uwene ali.

²⁵ Nkandi umunthu we akwenyelezya ahinza pa ndajilo inyinza izya vwavushe, havili ukujendelela kuvomba vunuvwo, utahave we wakwivwa vulo we ukuluvya, umunthu wununo alilotwa muhavombele hakwe. ²⁶ Inga wumo akusiva ukuti akuputa pe atakulusunjilila ululimi lwakwe, akuwuhopeha umwoyo wakwe havili ukuputa kwakwe kwa vulo.

²⁷ Ukupata ukwinza havili kwe kutananjisile panthanzi pa Mulungu witu nu Tata vwa kuvavwa avalanda na vafwilwe muntamyo zyavo, havili nukuyisunjilila wewe weka ishisita kuyinyazya nivyamunsi.