2 kwa Timoti, umwana unkundwa: Uvwila, ishisa, numutende kufuna kwa Mulungu uTata nu Chilisiti uYesu uMwene witu 3 Nkumusalifya uMulungu, we ine nkumuvombela kufuma kuva tata vane avatanzi, poka ninyenyezyo inzelu, inza she ine shima nkuvakumbuha imwe muphuto zyane uvusiku nu musanya.
4 Pe ine nkukumbuha amasozi gaho, ine nkusamba ukukwenya iwe, ukuti ine nizule nuluseshelo.
5 Vankumbusizye ulwitiho lwaho ulwinza, lwe lwatalisile lwatendama mwa maamaa waho u Loyisi nu mama waho uYunisi, pe zinkozile ukuti ulwene lukutendama na mwiwe vulo. 6 Ishi sheshifukwa ine nkukumbusya iwe ukushandizya isha vwila sha Mulungu she shili muliwe kujendela pe nakuvisile inyove zyane.
7 Pakuti uMulungu atatupiye iswe umupepo wilyoga, loli uwa maha nu lugano nu mushinzi. 8 Pe mutapeziwaje insoni kulusimishizyo ulwa Mwene witu, pamu nine vulo, ne Pauli, ne mupinyiwa wakwe. Mumalo mwakwe, tugavane intamyo shifukwa shipangwi ilyinza ukuyanana na maha ga Mulungu,
9 we ahatupoha iswe havili ahatwita iswe nulwito ulufinjile. Uwene avomvile ishi tekuyanana nimbombo zyitu, loli ukuyanana na mapulani gakwe nu vwila, lwe uwene atupiye iswe mwa Chilisiti uYesu lye ahavalilo hashili hatanzite.
10 Nkandi ishi uvuposhi vwa Mulungu vuvumbusile kujendela mukuvoneshela kwa Muposhi witu uChilisiti uYesu, we akumazya nifwa nukuleta uvulanzi nuvuzelu vwa shima kujendela mwi pangwi ilyinza.
11 Mulandu wishi, ine nkasalwa ukuva wantumi, umupositili, havili umanyisi. F27 12 She ishi shikuleha nine vulo nkujimba muvintu vinivi. Loli ine ntakwivwa insoni, pakuti ine imumanyile wenewo we ine nkumusuvila. Ine zinkozile ukuti uwene ahondeye ukushisengula shila she ine nchisuviye muwuyo ukufiha pisiku lila.
13 Mushisunjilile ishifwanishizyo sha vwa nalyoli vwa mazwi ge imwe muhivwa kukwane, poka nulwitiho nishikunzi she shili mwa Chilisiti uYesu.
14 Ishintu ishinza she uMulungu ahalanjizya kukwaho, ushizijilile shenesho kujendela muMupepo uMufinjile, we akutendama muliwe. 15 Iwe ushimanyile ishi, ukuti vonti ve vakutendama mu Asiya vahangalavushila ine. Kuphuga ino kuli uFigeli nu Helemogeni.
16 Umwene atwale uvwila munyumba ya Onesifolasi, she uwene ahansansamusyaga ine shima havili amanyololo gane gatahamupezyaga insoni.
17 Mumalo mwakwe, pe umwene amile ku Roma uwene ahandondola ine umwakuyipa, pe ahanaga ine.
18 UMwene amupe uwene ukuti avwaje uvwila kufuma kuwuyo pisiku lila. Mumadala gonti uwene ahambombela ine mu Efeso, iwe umanyile nkani.