¹ Pauli, uSilivano, nu Timoti, kuvala kuvivanza vya ku Tesalonika mwa Mulungu witu uTata havili uMwene uYesu Chilisiti.

² Uvwila kwimwe nu mutende kufuma kwa Mulungu witu uTata havili uMewene uYesu Chilisiti. ³ Kwe tusalifyaje shima kwa Mulungu mulandu winyu, vamwitu, inza she zihondeye, mulandu ulwitiho lwinyu lukukula shima shima, havili nishikunzi ku aliwonti uwimwe shikuvula pa woka nuwamwavo.

⁴ Pe niswe tukuyibadila imwe muvivanza vya Mulungu pakujimbilila kwinyu nu lwitiho mwonti mu ntamyo zyinyu, havili na mumayimba ge imwe mukujimbilila.

⁵ Izi zikulanjizya uvugolosu vwa halonjele ha Mulungu, ukuti imwe mulolehaje muhondeye mushinamwene sha Mulungu, she nimwe vulo mukushiyimbila. ⁶ She mwemumwo, vugolosu kwa Mulungu ukugalushizya amayimba kuvala ve vakuvayivya imwe,

⁷ nuvutuzyo kwimwe mwe mwayivilwa na kuliswe vulo, lwe uMwene uYesu avumbusile kufuma kumwanya poka na vahavizya vakwe avamaha

⁸ mumwoto we wukwaha, ukuvalanduzya vala ve vatamumanyile uMulungu havili na kuvala ve vatahivwila ipangwi ilyinza ilya Mwene witu uYesu. ⁹ Avene valiyimba mwisundo lya lunanjiho lwa shima nashima nu kuvapagula kuminso ga Mwene havili nukufuma ku vushindamu vwa maha gakwe.

¹⁰ Uwene alivomba ishi lwe uwene ayinzile pisiku lila ukuti ashindikwe na vantu vakwe avafinjile havili nukuti ahatimwe navonti vala ve vahamwitiha, mulandu ulusimishizyo lwitu kukwinyu lwitishiziwe. ¹¹ Mulandu wishi iswe tukujendelela ukuvaputila imwe, ukuti uMulungu witu avenye imwe ukuti muhondeye kulwitiho lwinyu havili poka namaha gakwe uwene akwanilisye imbombo yonti inyinza ni mbombo yonti iya lwitiho.

¹² Iswe tukuputa vunuvu ukuti izina lya Mwene witu uYesu lishindikwe palimwe, havili nimwe muwuyo, ukuyanana nu vwila vwa Mulungu witu havili uMwene uYesu Chilisiti.