¹ Pauli, uSilivano, nu Timoti kuvala ku shivanza sha ku Tesalonika mwa Mulungu uTata havili uMwene uYesu Chilisiti. Uvwila nu mutende wuve kulimwe. F20 ² Iswe tukumusalifya shima uMulungu mulandu wimwe mwenti lye iswe tukuvatambula imwe shima mumputo zyitu.

³ Iswe tukukumbuha pantanzi pa Mulungu witu nu Tata imbombo yinyu iya lwitiho, ukuvomba ukwashikunzi, nukujimbilila kwinyu ukwa lusuvilo mwa Mwene witu uYesu Chilisiti. ⁴ Vamwitu mwemuganiwe nu Mulungu, iswe tumanyile ukuti uwene avasevile imwe,

⁵ mulandu ipangwi lyitu ilyinza lihinza kwimwe temwemumazwi mweka, loli na mumaha vulo, muMupepo uMufinjile, nulusimishizyo ulupiti. Mwidala linili, imwe havili mwatumanyile ukuti twamile twe vantu vamusango vuli lye tuli pakasi palimwe pamulandu winyu ⁶ Mwinzile mwava mwe valandatizi vitu havili va Mulungu lwe muhaposhelaga izwi mumayimba amapiti poka nuluseshelo kufuma ku Mupepo uMufinjile.

⁷ Zye zyali, imwe mwayipezile ukuva vakwenyezya papo vonti ava ku Makedoniya na ku Akaya ve vahitiha. ⁸ She kufuma kukwinyu izwi lya Mwene lihivwiha, havili te kwekwa ku Makedoniya na ku Akaya, loli ulwitiho lwinyu mwa Mulungu lufisile mwonti. Pelelo iswe tutakwanza ukuyanga nashimo ukuyana na lulwo.

⁹ She avene avenesho vakuyanga ukuyana niswe muhavele hahaposhelele he tuhaposheleliwa pakasi pinyu, havili mwe mwapindushiye kwa Mulungu kufuma kuvifwani ukwanda kuvombela umwumi havili uMulungu uwa vwanalyoli,

¹⁰ nu kumulindilila umwana wakwe kufuma kumwanya, we ahamuzyusya kufuma kuvufwe-uYesu, we ahatupoha iswe kufuma kuvuhalazu vwe vukwinza.