1 ¹ Ine nesongo wachipanga kuwakutemweka Gayo, womutemwizwe nkhani. ² Wakutemweka, nkhwiputa ukuti vyonsi vjkujendelaje ichete, eso ngati moumoyo wako wuwereye ichete. ³ Pakuti nkhakondwa sana po awakamu wamo winza nukundingannya ukujenda muwunenensyo, nukujenda kwako kwawunenensyo. ⁴ Nthali nichimwemwe ichikulu chochingachira ichi, ukwivwa ukuti awana wane wakujenda muwunenensyo. ⁵ Wakutemweka, ukulanjizga ukugomezgeka kwako pavyonsi vyo ukuwawombera awakamu wako nawalendo ⁶ wowakachita uwukaboni pachitemwa chako napaminso ga chiwanza. Uwavwaje wunuwo ukuti wapitilire nuwulendo bwawo munjira yo uChiwuta angakondwa nayo, ⁷ chifukwa chizina ili wakafuma kunzi, nokupochela chimo ukufuma kuwamitundu. ⁸ Po iswe tukwenela ukupochela awanthu ngati wanawa ukuti tuwanje wateweti wamwitu muwunenensyo. ⁹ Nkhalemba ukulata kuchichiwanza, ukwene uDiyoterefe, wakutemwa ukuwa wabwambilo kuwamwawo, atakutupochera iswe. ¹⁰ Popala ninza, nkhwinza ukuvumbula vyo akuwomba, pakunenela amazwi agawiwi. Nokwikutisika nivi, umwene akukana ukuwapochera awaKilisitu awamwawo, ukwene akuwakanizga wowakwanza ukuwapochera nukuwachimbizga muchiwanza. ¹¹ Wakutemweka, uleche ukulandata akikaliro akawiwi ukwene akikaliro akinza. Wonsi wo akuwomba ichinza mwana wa Chiwuta. ¹² Demetiriyo akawachila awanthu ulusimichizgo ulwinza nuwunenensyo wonsi. Niswe tukusimichizga kumwakwe, eso ukumanya ukuti ulusimichizgo lwitu lwawunenensyo. ¹³ Nkhawa navyo ivyinji ivyakulemba kwimwe, ukwene nthakwanza ukuti imbalembele ivi kwimwe nichakulembela ni inkhi. ¹⁴ Ukwene nkhugomezga ukuwennya imwe nomba, eso tukwinza ukunena paminso napaminso. ¹⁵ Umutende wuwe nimwe. Awamwitu wakuwalamuka. Mulamuche awamwitu uko nukutambula amazina.