1 Yesu akati aketa ichigulu cha bandu, akakwera ku chighamba. Akati ikala pasi, abamanyili bakisa ku kwake. 2 Akighula umolomo wake nu kwanda ukubamanyiska ukuti 3 ''Basayiwa bobapina mwambepo chifukwa ubunyafyale bwa kumwanya bwabo. 4 Basayiwa bosibo bakulira, pakuti tise babasumbisye. 5 Basayiwa bobakwiyiska, pakuti tise bapyane ichisu. 6 Basayiwa bosibo bakupulika isala sona inyota iya bugholofu, pakuti tise bikute. 7 Basayiwa bachisa, pakuti tise bapokere ichisa. 8 Basayiwa abaswepu mumoyo, pakuti tise bamukete Uchala 9 Basayiwa bobakubika umutende, pakuti tise bitisiwe bana ba Chala. 10 Basayiwa bosi bobafwimiwanga chifukwa cha bugholofu, pakuti ichitangala chakumwanya chabo. 11 ''Mulibasayiwa nandi abandu bakubatuka sona mukufwimiwa nukubayughira ifindu fyosi ifibibi ukususaniya numwe mubumyasi chifukwa cha une. 12 Sekelagha nukuhoboka, pakuti chabupe ichikulu tise mupokere kumwanya. Pakuti msila yiyiyi abandu bakafwimagha amalaghuli bobakabako bomukali umwe. 13 ''Mwembeya ya muchisu. Lori para imbeya yasupa, kapo ungaipera bulibuli ukuti yiwe mbeya sona? Yitakuba yisa sona pa chindu chosi, potukuyitagha ukuti abandu abayikanyangilaghe. 14 Mwe bweru bwa chisu, Akaya kokabikiwe pamwanaya pighamba katangimama. 15 Nayumonayumo yuyo akukosya inyale nukuyikupikira nichipombo, lori pachakwikasikisyapo inyale, sona yikubala kuwesi munyumba. 16 Muleke inyale syinyu sibalaghe pa bandu musira yakuti baketaghe imbombo syinyu inyisa sona nukuti bapalaghe Utata winyu wa kumwanya. 17 Manye mwinong`onaghe ukuti nisa pa kukomaniya indaghilo pamu abalaghusi. Ndisa pakukomaniya hagha lori pakukwanilisya. 18 Pakuti inguyugha ubwanalori mupaka imwanya ni chisu fikamale, nalimo isimbo napo linandi ukuti musila yosi yila lifumemo mundaghilo, mpaka ifindu fyosi fikakwanilisyiwe 19 Po lelo wesi yuyo akukana ululaghilo lumo mundaghilo isi sona nukumanyiska abangi ukuti babomba sisisi tise itisiwe ukuba munandi muchitangala cha Chala. Lori yuyo akusisungilira nukumanyiska mosibelire akwisa ukwitisiwa ukuba wesongo muchitangala cha Chala. 20 Pene po ubugholofu bwinyu bwakira ubwa bamanyandaghilo sona nabafalisayi, tamukingile muchitangala cha kumwanya. 21 ''Mukapulika ukuti kukayughiwa kukwabo mutubaliro twakunyuma, 'Manye mughoghe,' sona, 'Wesi yuyo aghogha akwisa ukuba munthamyo ya kulongiwa.' 22 Lori inguyugha kukwinyu nguti ukuti wesi yuyo akumukalalira umunine tise abe mundamyo yakulongiwa; nawesi yuyo akumubusya umunine akuti, 'uteneleriwe!' akwisa ukuba munthamyo kubalongi; sona wesi yuyo akuti, 'upunganite!' tise ataghiwe mumuliro wa gehena. 23 Po pala kupereka ichabupe chako pachikemo sona papapo wakumbuka umunyako yuyo wambanite nawe, 24 Uchileke ichabupe pandasi pachikemo, unyokere. Ichabwandiro muhobokele umunyako, papapo wise nukuti upereke ichabupi chako. 25 Mwitikane numulwani wako mwalubilo bomulinawe mukwenda mukuya kumalo ghakulongelapo inongwa pamu umulwani wako angakubika munyobe sya balongi, sona abalongi bangakubika munyobe sya basilikali, nukutaghiwa mujere. 26 Nalori inguyugha kwinyu inguti, utangise ufumemo mula mupaka ulipile ingongole yiyo yisyalite. 27 ''Mukapulika ukuti bakati, 'manye mupange ubwamalaya.' 28 Lori inguti kukwinyu wesi yuyo amuketa umukolo nukumunyenywa bo apanga kale ubwamalaya nawe mumoyo wake. 29 Para ilyiso lyako ilyandiro likukupufya, ulikolopore nukulitaghila kubutali nuwe. Pakuti chisapo kukwako ukuti imbali yoka ya mubili yifwe nukumbana ukuti umubili wako wosi kutaghiwe mu gehena. 30 Para akakono kako kandyero kakukupufya, kaputule nukatagha kubutali nuwe. Pakuti chisapo ukuti imbali yoka yamubili wako yifwe nukupambana ukuti umubili wosi ghutaghiwe mu gehena. 31 Kukayughiwa ukuti, ' Yuyo akumukisya umukasi wake, amupeghe ukalata wakumusokera.' 32 Lori inguyugha kukwinyinu inguti wesi yuyo akusosya umukolo, ukusita ukughona nabalisya abangi, koti akumupangisya ukuba we malaya. Wesi yo amwegha bo asoka koti akupanga nawe ubwamalaya. 33 ''Sona mupulikite ukuti bakatingi abandu bakale, ' Manye mulapilaghe nulufingo lwabumyasi, lori munyamulaghe ukulapila kwinyu kwa Chala. 34 Lori inguti kukwinyu, manye mulapilaghe,kali kumwanya, pakuti koko kuli ichitengo cha Chala; 35 Kali popa chisu, kali mo muyelusalemu, pakuti kokaya ka Malafyale umukulu. 36 Kali kokupunya umutu, pakuti utangapangiska iching`wiri ukuti chiwe chiswepu pamu chititu. 37 Lori ikuyugha kwinyu kube kwakuti 'Inga, inga,' pamu 'Hagha, hagha.' Chosi chicho chikilite pa ifi kokuti chifumile kwa Satana. 38 ''Mukapulika ukuti bakatingi, ilyiso kwi lyiso,' 'ilyino kwi lyino.' 39 Lori inguti kukwinyinu, manye munyosyekesye ububibi ku yuyo akunangira. Mumalo mwake, yuyo akupata nipi kulusaya lwa ndyero, umupe sona ulungi 40 Pala yumo akulonda ukuti akusitake sona nukwegha ilaya lyako, muleke umundu uyo eghe nikotibu. 41 Nandi umundu akukufyenya ukuti wende nawe amatambo 1000, ubuke nawe amatambo 2000. 42 Mupe wesi yula yo akusuma kukwako, sona manye umukanire yuyo akulonda ukwasima chimo kukwako 43 ''Mupulikite kukayughiwa ukuti, 'Umughane umupalamani wako lori umubenge umulwani wako.' 44 Lori inguti kukwinyu, mughane umulwani wako nukwiputira wesi yuyo akubafwima umwe, Basaye bosi bobakubaghuna, babombere inyisa bosi bobababengite, 45 umwakuti mube bana ba Tata winyu yuyo ali kumwanya. Pakuti akupangiska ukubala kwa isuba pababibi nabisa, sona akutuma ifula kubagholofu nakubanyongane. 46 Para mubaghanite bosi bobabaghanite, mukulyaghapo pindu liki? Abasongesyasongo batakubomba ngati isa fififi? 47 Para ukulamuka umunyako mwene, ngapo chochoni cho ukubomba ukupota abangi? Ngimba abapanja batakubomba ngati isa fififi? 48 Polero mubaghire mube bagholofu, ngati mumo abelire ubugholofu Utata winyu wakumwanya.