¹ ''Mwemwe mufwile mutize mwapanga amakolania, swinya mwemwe mufwile mutize mwayinusya ichinthu ichiwinze pamwi iviwunga vya mawe ivya wuleza, swinya mwemwe mufwile mutize mwa wika nanthi a chikolania cha mawe ichiwinze munsi yinu kwakwe chino muliwafukamila pansi, amuno Nene ne Yawe e Leza winu. ² Mwemwe mufwile muwasunga awa Sabata wane nu kuchindika ing'anda yane. Nene ne Yawe. ³ Ndi mukupita mu masundo yane nu kusunga ama lamulo yane nu kutonthela yoliyo, ⁴ apano Nene indipa mwemwe imvula mu mphindi yakwe; insi yinu yilivuna imbeyu zyakwe, nga nimiti ya muvyalo yilivuna ivikomwa vyawo. ⁵ Ukuvuna kwinu kulitwalilila ukufika mu mphindi yakuvuna ama grepu, nga ukuvuna kwa ma grepu kulifika mphaa mu mphindi ya kukomela. Mwemwe muliwalya imikae yinu umwakukwana swinya muliwayikala mu nanthi kutina kuno mulipanga akukaya kwinu munsi. ⁶ Nene indipa umutende munsi; muliwa lala pansi kutaliwa nanthi chimwi icha kuwatinia. Nene indifumya ivinyamana ivikali ukuma minsi, swinya inkhondo yitalitela yipite munsi yinu. ⁷ Mwemwe muliwasamazya awalwani winu, swinya awalipona pa nkholelo zyinu na wapanga. ⁸ Awasano mwekwe mwemwe waliwasamazya 100, nga 100 mwekwe mwemwe waliwasamazya 10,000; awalwani winu awaliwapona pa nkholelo zyinu na wa panga. ⁹ Nene ndilola pakwe mwemwe nu kutemwela nu kupanga mwemwe muwe nivikomwa swinya muwavula; Nene indiyikazya ilayano lyane na mwemwe. ¹⁰ Mwemwe muliwalya ichakulya chino musunzile imphindi iyitali. Mwemwe muliwaleta kunzi ichakulya ichisunje umulandu mwemwe muliwalonda umwakusunjila ivyakuvuna ivipya. ¹¹ Nene indiwika ing'anda yane pakwe mwemwe, swinya Nene inthaliwapata mwemwe. ¹² Nene indiwapita pakasi pinu ngati ne Leza winu, swinya mwemwe muliwa awanthu wane. ¹³ Nene ne Yawe e Leza winu, wino afumizye mwemwe ukufuma munsi ya Ijiputi, alyakuti mutize muwe mwe wazya wawo. Nene imontholinie iving'wame vyinu nga napanga mwemwe muwapita mwe wayololoke. ¹⁴ Ukuwa ndi mwemwe mutaliyivwila kwe Nene, swinya nanthi kutonthela amalamulo yonsi yaa, ¹⁵ swinya ndi mwakana imivyanjile yane nu kupata amasundo yane, alyakuti mwemwe mutize mutonthele amalamulo yane yonsi, kweni monone ilayano lyane ¹⁶ ndi mwemwe mukuchita ivinthunye vyoo, apano Nene indichita choo kwe mwemwe: Nene indileta inthete pakwe mwemwe, izyandwala ni vizegema vino viliyonona aminso yinu swinya vilifumya uwulanzi winu. Mwemwe muliwakomela imbeyu zyinu pavye, umulandu awalwani winu walilya ivikomwa vyawo. ¹⁷ Nene indiwifyizila mwemwe paminso pane nga awalwani winu wali chimvya mwemwe. Awanthu wano wapata mwemwe awaliwatungulula mwemwe, nga muliwasamala pano nanthi wonga akusamazya mwemwe. ¹⁸ Ndi pa vyonsi vyoo mwemwe mwapotwa ukwivwila kuli Nene, apano Nene indisunda mwemwe ka 7 muno amawembuko yinu. ¹⁹ Nene indimonthola ukuyikwezya kwinu mu maka yinu. Indipanga mupela mwinu ngati a chela ninsi yinu ngati a mu kuwa. ²⁰ Amaka yinu yalimala pavyee, umulandu insi yinu yitalileta nanthi chimwi icha kuvuna, swinya ni miti yinu ya munsi yitalileta ivikomwa vyawo. ²¹ Ndi mwemwe ukupita umwa kususyania na Nene nu kusita kwivwila kwe Nene, Nene indileta amatamyo ka 7 pakwe mwemwe, ukuyana na mawembuko yinu. ²² Nene indituma ivinyamana vya mumphanga ukuchuzya mwemwe, vino vilipoka awana winu, viliyonona ivitekwa vyinu, nu kupanga mwemwe muwe mwe watichi mu mphendwa umwakuti imisewo yinu yiliwa nanthi a munthu. ²³ Ndi chingawa ukuti ni vinthu vyoo mwemwe mwakana ukuzumilizya amasundo yane swinya mwatwalilila ukupita umwa kususya Nene, ²⁴ apano naninye indiwapita ukususya mwemwe, swinya Nene nenganye indisunda mwemwe ka 7 umulandu wa mawembuko yinu. ²⁵ Nene indileta e panga pakwe mwemwe wino alipanga ukuwanyosezya muno ukumonthola ilayano. Mwemwe muliwunganikwa apaliponga mukasi mu misumba yinu, nga Nene indituma indwala pakasi pinu kulyanye, nga mulipewa u makasa ya walwani winu. ²⁶ Pano Nene naputula kuno kukufuma ivyakulya vinu, awanachi 10 walikwanisya ukocha imikate yinu mu muvuno wonga, nga awaligawa imikate yinu mu wung'wame. Mwemwe muliwalya kweni nanthi a kwikuta. ²⁷ Ndi mwemwe mutakwivwila kwe Nene napano ivinthu vyoo, kweni mwatwalilila ukuti muwapita ukususya Nene, ²⁸ apano Nene indiwapita ukususya mwemwe mu wufulwe, swinya Nene indisunda mwemwe ka 7 ukuyana na mawembuko yinu. ²⁹ Mwemwe muliwalya imiwili ya wana winu awalumendo; mwemwe muliwalya imiwili ya wana winu awakazyana. ³⁰ Nene indiyonona amasyo yinu ayakupepela amakolania, indiputulania utuzuwo twinu utwa vya kununtchizya, nga indisumba imivimba yinu ni ya makolania yinu, nga Nene nenganye ndiwapata mwemwe. ³¹ Nene indipiliwula imisumba yinu ukuwa ayivongoke swinya indiyonona amasyo yinu yakupepela. Nene inthalitemwa nu kununtchila kwa vyawupe vyinu. ³² Nene indiyonona insi. Awalwani winu wano waliwayikala mulyanye awalizunguka ni myonenelo. ³³ Nene indisasya mwemwe ukuya mu zyansi, nga indifumya e panga wane nu kukonkha mwemwe. Insi yinu yilisyala yenga, ni misumba yinu yiliwa a yivongoke. ³⁴ Ngapano insi yizewela awa Sabata wakwe mumphindi yonsi yiliwa yenga nga muliwa munsi ya walwani winu. Mu mphindi yoyo, insi yilipuza nu kuzewela awa Sabata wakwe. ³⁵ Lyonsi lino yiliwa yenga, yiliwa nu kupuza, kuno kuliwa a kupuza kuno kutalinji penepo na wa Sabata winu, pano mwemwe mwikalanga mwenemo. ³⁶ Lelo kwe mwemwe wano mulisyala mu zyansi zya walwani winu, Nene indituma inthete mu myenzo yinu alyakuti ichongo cha kuputa kwa mphepo kuliwatinia mwemwe, nga mulisamala ngati wakuwasamazya nu panga. Mwemwe mulipona, napano kusi nanthi wumwi wino akuwasamazya. ³⁷ Mwemwe muliwapunuzyana wonga nu muwuye ngat mwemwe mukusamala ukufuma kwe panga, napano nanthi wonga akuwasamazya mwemwe. Mwemwe mutaliwa na maka ukuti mwimilile paminso ya walwani winu. ³⁸ Mwemwe mulifwila mu zyansi, swinya izyansi zya walwani winu zililya mwemwe. ³⁹ Wawo wano walisyala mwakwe mwemwe waliyononeka mu mawembuko yawo, mulyanye mu zyansi zya walwani wawo, swinya umulandu wa mawembuko ya wakwasi wawo awaliyononeka nawonye. ⁴⁰ Lelo ndi wazumilizya amawembuko yawo na ya wakwasi wawo, nga ukuphiliwuchila kwawo mwakwe kuno watasuwizilwe kwe Nene, na swinya ukupita kwawo ukususya Nene-- ⁴¹ kuno kwalenzile Nene ukuti imphiliwuke ukususya woliwo nga Nene nalesile woliwo ukwinjila mu zyansi zya walwani wawo--Ndi imyenzo yawo iyisita kuputulwa yiza yayichefya, swinya ndi awazumilizyania nu kufundwa muno amawembuko yawo, ⁴² apano Nene indiyizuka ilayano lyane nu Yakobe, ilayano lyane nu Ayizeki, ni layano lyane nu Abrahamu; na swinya, Nene indiyizuka insi. ⁴³ Insi yilisyiwa na woliwo, achaleka yiliwa ni chimwemwe na wa Sabata wakwe pano yichilinji ayisyale nanthi woliwo. Awalilipa kwi sundo lya mawembuko yawo umulandu woliwo awenecho wakana imivwanjile yane nu kupata amasundo yane. ⁴⁴ Lelo pa vyonsi ivinthu vyoo, pano awaliwa munsi ya walwani wawo, Nene inthaliwakana woliwo, nanthi Nene a kupata woliwo alyakuti imbamalizye woliwo nu kunona nga inthaye ilayano lyane na woliwo, amuno Nene ne Yawe e Leza wawo. ⁴⁵ Ukuwa umulandu woliwo Nene indiyizuka ilayano na wa nyenya wawo, wano Nene nafumizye munsi ya Ijiputi mu kulola kwa zyansi, alyakuti Nene imbe ne Leza wawo. Nene ne Yawe.'' ⁴⁶ Yaa a malamulo, imivyanjile, na masundo yano YAwe apanzile pakasi pe weliwe na wanthu wa Izirayeli pa Lupili lwa