¹ ELeza welenganizizye Nowa, ivinyamana vyonsi mumpanga, nga nivitekwa vyonsi vino vyalinji naweliwe muwato. Eleza alenjesya inkungu ukuputa papela pansi, nga aminzi ayatalika ukupwela. ² Imbwiwi zyawu zike wampongolo wiyulu zyiyusile nga ayileka, nga ayileka ukutonya. ³ Intalala ya minzi yatalisile ukwika katichi katichi munsi yapansi, nga pakupelelechezya kwa manda umwanda nakumi yasano yizile yasila. ⁴ Uwato wizile wupuza mu mwezi wamunenulambali, pawanda wikumi munenulambali wamwezi, pamyamba ye Ararati. ⁵ Aminzi ayatwalilila ukwika ukufichila umwezi wikumi. Pawanda wakutalichila wamwezi, insonga zyamyamba zyalolesile. ⁶ Yalile pano amanda amakumi yani yapita Nowa ayiyula impongolo yawato wuno wapanzile. ⁷ Watumile chigowe nga apapuka ukunyochela nyochela ukufichila yakala munsi yapansi. ⁸ Nngapano wizile tuma inkunda pakulola ndi aminzi yasizile papela yansi yapansi, ⁹ kweni inkunda yitazanile amsyo yakuwika ichinama chakwe, nga ayinyochela kwakwe weliwe muwato, amuno yachilinji yakukwanisya insi yonsi yapansi. Wafumizye ikasa lyakwe ayisenda nukuyileta muwato naweliwe ¹⁰ Walindilizile amanda yanji munenulambali nga atuma swinya inkunda ukufuma muwato. ¹¹ Inkunda yanyochezile kwakwe weliwe akamanguzi. Lola! Mu mulomo mwakwe mwalinji ifwa iyawe lyakwe alivi iliteta. Apano Nowa wamanyile kuno amanzi yapwela munsi yapansi. ¹² Walindilizile swinya amanda yanji munenulambali, nga atuma swinya inkunda. Yitanyochezile swinya kwakwe weliwe. ¹³ Chalinji pano mu myaka umutanda nu mwaka wakutalichila, mu mwezi wakutalika, muwanda wakutalika uwa mwezi, kuno aminzi yakazile munsi yapansi. Nowa afumya ichikupichizyo cha wato, alolechesya kunzi, alola kuno, lola, papela wamusili pakala. ¹⁴ Mumwezi wachitiwili, pawanda wamakumi yawili munenulambali, insi yakazile. ¹⁵ E leza ati kwe Nowa, ¹⁶ Fumani muwato, mwemwe, ewaku wako, awana wako wachonsi, nawachi awawana wako nawewe. ¹⁷ Fuma ponga nawewe ichelewulwa chonsi ichamuwili chonsi chino chili nawewe _ ivinyunyi, ivinyamana, nachonsi ichakusela chino chikusela pansi_ ukuti vizipizile vinyamane pansi yapansi, ukuti vikome ivikomwa nukonjelezwa pansi yapansi.'' ¹⁸ Apano Nowa wafumile nawana wakwe wa chonsi, ewaku wakwe, nawachi wawana wakwe naweliwe. ¹⁹ Ichelewulwa chonsi ichawumi, ichakusela chonsi, nichinyunyi chonsi, ichilichonsi ichakupita pansi, ukulingana nimbumba zyawo, wasile uwato. ²⁰ Nowa azenga akavuwa kwe Yahweh. asenda ivinyama vimwi ivintakandamikwa nga nivinyunyi vimwi ivintakandamikwa, nga apa ivyawupi vyakocha pakavuwa. ²¹ Yahweh anunchizya umunsi uwuzima nga ati umwenzo wakwe, '' ntalitela ntipe swinya umusili umulandu nawantu, chingatenga amelenganio ya myenzo yawo ayiwipe ukufuma ku wunya wawo. Ntalitela nanti akonona swinya ichintu chonsi ichawumi, ndivino nawomba. ²² Pano insi yapansi yichili, impindi ya mbewu nukusinza, ukutalala nukulungula, ichisanya ni chisiku, umusanya nuwusiku vitaliyimilila.''