¹ Chizile chawa lyo awantu ukuvula pansi yapansi nga nawana wachanachi wakwasilwe kwakwe woliwo, ² ukuti awana wakwe Leza waweni awana wawantu kuno walinji awayembe. Wayitwalizile wonga awanachi, wensi uwawoliwo wino wamusolanga. ³ Yahweh ati, " Umuzimu wane wutaliwa mu wantu penyee, amuno amutande. Waliyikala imyaka umwanda na makumi yawili." ⁴ Wa masayi walinji munsi yapansi mu manda yalianye, nga swinya nukuya inkolelo. Chawovnilwe pano awana we Leza watwazile awana wawantu, nga awakwata awana nawoliwo. Waa walinji awantu wamaka awakalii, awantu awamanyikwe. ⁵ Yahweh waweni kuno uwuwipe wa muntu wakulisya munsi yapansi, nga nukuti nakelenganizye ka wuntu ya myenzo yawo walivye awuwipe wakutwalilila. ⁶ Yahweh wayilizanizye ukuti wapanzile awantu pansi yapansi, nga cha lwilwi nsizye weni ku mwenzo wakwe. ⁷ Achino Yahweh watili, "Nandi mpyele awantu wano nati mbelewula ukufuma kunsi yapansi ---awantu ni vinyama, nivintu vyonsi ivya kuzenzela ni vinyunyi vya mwilewelewe, amuno nkuyilizania ukuti navipanzile. " ⁸ Kweni Noah wazanile ukutemelwa mu minso yakwe Yahweh. ⁹ Vyo vyalinji avyakuwombwa ukulingana ne Noah. Noah walinji amuntu umulungamane, atalinji nanti ampifya mwakwe wantu wampindi yakwe. Noah wapitanga ne Leza. ¹⁰ Noah wizile wawa we yisi wawana watatu: Shemu , Hamu, ne Yafeti. ¹¹ Insi yapansi yawozile paminso yakwe Leza, nga yizwile ni vyongo. ¹² Leza waweni insi yapansi; lola, yavunzile amuno umutande wonsi wati wuwozya inzila zyakwe pansi yapansi. ¹³ Leza ati kwakwe Noah, "Nalola kuno ampindi yakumalizya imitande yonsi, amuno insi yapansi yizula ni vyongo ukupitila yoliyo. Nakawuzyenye, nkwizu kuzyonona ninsi. ¹⁴ Yipanjilani mwenga uwato wesapule. Pangani amakasi muwato, nukusyema mukasi nakunzi. ¹⁵ Avyo mwandi muye muwupanjile: Uwutali wawato wandi wuwe ichisunsa imyanda yitatu; muwutali wakwe wandi wuwe amakumi yawili yamamita nukutalimpa kwakwe kwandi kuwe amamita ikumi lyonga na yani. ¹⁶ Pangani umusonje wawato, nga mumalizye pa chisunsa ukufuma papela pa mbali. Muwike umulyango pa mbali pawato nga mupange na pansi, uwe chitiwili, nga ni chipitu che chititatu. ¹⁷ Teyelezyani, ndi pakuleta intalala ya minzi pansi yapansi, pakonona imitande yonsinye yino yili numufuto wawumi ukufuma pansi piyulu. Chonsi chino chili pansi yapansi chilifwa. ¹⁸ Kweni ndiyikazya ipangano na mwemwe. Muliyinjila muwato, mwemwe, awana winu ne waku wako, nawachi wawana wako ponga nawewe. ¹⁹ Ichelewulwa chonsi icha wumi icha mutande chonsi, uluko lwe viwili vili vyonsi muzipizile muviwike muwato, ukuvisunga nuwumi namwemwe, ivyonsi ni vyanachi. ²⁰ Ni vinyunyi ni myata nimiwele yawo, ni vinyamana ni miwele yawo, ni vyakusela nga ni chakusela chonsi ichansi ni miwele yawo, viwili vyonsi viliyiza kwakwe mwemwe muvisunge nuwumi. ²¹ Ukolonganike kwakwe wewe wenga ichakulya cha mwata wonsi ichakulyekwa nukuchisunga, kuti chize chiwe achakulya chakwe mwemwe navyolivyo." ²² Achaleka Noah wawonvile choo. ukulingana kwakwe vyonsi vino Leza wamupinguzile, achaleka awomba.