¹ Apano Josefu ayinjila mwenemo swinya amunena Falawo, " tata wane swinya wanyina wane, ivikwato vyawo, ivintu vyawo, swinya navyonsi vino walinavyo, wafika ukufuma munsi yakenani. Lola wali munsi ye Goshen." ² Wasenzile wanyina wakwe nukuwalanjizya kwe Falawo. ³ Falawo avwavnga ati, kuwanyina wakwe, " Wuzye ukawomba chani? awavwanga wati kwe Falawo, awawonvi wako awachemi, watatakulu witu." ⁴ Apano awavwanga kwe Falawo awati," twiza ngati saswe wakwikalisya munsi. Kusi umulenvwe wamawufyo yawawonvi wako, amuno ichipowe chakulisya munsi ye Kanani. Achino kanonzi, nazina leka awawonvi wako wikale munsi ye Goshen.'' ⁵ Ngapano Falawo avwanga kwe Josefu, ati, '' Eso nawanyonko wiza kwakwe wewe. ⁶ Insi ye Ijiputi yili pankolelo pakwe wewe. Wika Eso nawanyonko muchipya ichizima, insi ye Goshen. Ndi umanyile awamaka mwakwe woliwo, muwawike wawe awakalola wavitekwa vyane.'' ⁷ Apano Josefu aleta Jekapu yisi amulolesya kwe Falawo. Jekapu amipepa Falawo. ⁸ Falawo ati kwe Jekapu," nga wikala imyaka yinga?" ⁹ Jekapu ati kwe Falawo, " Imyaka yamipitile yane amwanda namakumi yatatu(130). Imyaka yawumi wane ayatichi nayalume. Yata talimpa vino yayo aya watatakulu." ¹⁰ Apano Jekapu amupepa Falawo nga afuma pachinsyo chakwe. ¹¹ Apano Josefu ayikazya yisi nawanyina. Awapa ichipya munsi ye Ijiputi, insi inzima, munsiye Rameses, ndi vino Falawo wapinguzile. ¹² Josefu apa ichakulya kweyisi, awanyina, ni mbumba yonsi iya kweyisi, ukulingana ni pendwa muno wawezile. ¹³ Nomba kutalinji ichakulya munsi; amuno ichipowe chakuzile. Insi ye Ijiputi ni ye Kanani zya tombolosile umulandu ni chipowe. ¹⁴ Josefu wakolonganisile indalama zyonsi zino zyalinji mu Ijiputi namunsi ye Kanani, pakukazya impumba kuweni nsi. Apano Josefu aleta indalama kwi sano lye Falawo. ¹⁵ Alapano indalama zyonsi izyansi zye Ijiputi ne Kanani zyawombelwa, Wa Ijiputi wonsi awiza kwe Josefu awati, " Tupe ichakukya! Nga mulanduchi tufwile paminso yinu umulandu indalama zyitu zyasila?" ¹⁶ Josefu ati, " Ndi indalama zyinu zyasila, letani ivitekwa vyinu imbape ichakulya pakukawulania ni vitekwa. " ¹⁷ Achino awaleta ivitekwa vyawo kwe Josefu. Josefu awapa ichakulya pakukawulania ni mpunda, pamawufyo, pa ng'ombe, nga napa ndokwe. Awalyesya ne buledi pakukawulania ni vitekwa vyawo vyonsi umwaka wowonye. ¹⁸ Alapano umwaka wowo wasila, awiza kwakwe weliwe umwaka wakukonkapo nukuti kwe weliwe, " Tutandi fisame kwe tatakulu witu ukuti indalama zyitu zyonsi zisizile, nga ninchemo zya ng'ombe azye tatakulu. Pasi chino chisyazile muminso ye tatakulu, ukufumyako imiwili yitu ninsi yitu. ¹⁹ mulanduchi tufwile ukufwa pankolelo yaminso yinu, sweswe swensi ninsi yitu? Utukale ninsi yitu pakukawulania ni chakulya, sweswe ninsi yitu tuliwa swewawonvi kwe Falawo. Tupani impumba ukuti tuwe nuwumi nanti kufwa, nga nukuti insi yitawa ankolwa." ²⁰ Achaleka Josefu akala insi yonsi ye Ijiputi pakuwa aye Falawo. Amono umu Ijiputi wensi wakaziye ichalo chakwe, umulandu ichipowe chakuzile. Munzila yoo, insi yalinji aye Falawo. ²¹ Lelo awantu, wawapanzile ukuwa awazya ukufuma kuwutalichilo wampaka ye Ijiputi na kunsilo yinji. ²² Yalinji vye ansi yawasimapepo yino Josefu atakazile, pumulandu wasimapepo waposile ichipya chawo. Walyanga ku chipya chino Falawo wawapile. Achaleka watakazizye ichalo chawo. ²³ Apano Josefu avwanga kuwantu, " Lola, Nakala mwemwe nichalo ilelo ukuwa avye Falawo. Kaonzi impumba yoo eye mwemwe, nga mwandi mukomele ichalo. ²⁴ Pakugowola, mfwile mwawapa iche chitisano kwe Falawo, nga iyawi vini viliwa avyinu, pa mpumba ya chalo ni chakulya cha mbumba zyinu nawana winu." ²⁵ Watili, " Mwapususya amawumi yitu. Leka tuzane ukutemwela muminso yinu. Tuliwa awawonvi we Falawo. " ²⁶ Achino Josefu wapanzile isundo lino lyatalisile munsi mpaka nakuwanda wilelo, ukuti iche chitisano achakwe Falawo. Ichalo chawa simapepo watupu chitizile chawa ache Falawo. ²⁷ Achino Israyeli ayikala munsi ye Ijiputi, munsi ye Goshen. Nga awawa ni vyawo kulyanye. Awapapana nukunyama nkaninye. ²⁸ Jekapu ayikala munsi ye Ijiputi imyaka ikumi na munenulambali(17), achino imyaka yawumi we Jekapu yalinji umwanda namakumi yani _namunenulambali(147). ²⁹ Alapano impindi ye Israyeli yapalamila ukufwa, ayita umwana wakwe e Josefu nga ati kwakwe weliwe, " Ndi kanonzi nazana ukutemwelwa muminso yinu, wika ikasa mwisika mulupamba lwane, nga undanjizye uwusuwalikwa nuwusuwizi. Nazina utanzika mu Ijiputi. ³⁰ Ndi nalala nawatata, mulimfumya mu Ijiputi nga mukanzike mumasyo yawa tatakulu." Josefu ati, " Ndiwomba ndivino wavwanga. " ³¹ Israyeli ati, " Lapa kwakwe nene, " nga Josefu alapa kwakwe weliwe. Apano Israyeli apunamila pa mutwe wa chitala chakwe.