¹ Apano Josefu apotwa ukuyilema pankolelo pawawonvi wano wimilile pe weliwe. Wavwanzile umwakupunda," Wensi afume pakwe nene. Achaleka patimilizile nanti wumwi pano wayimanyisyanga kuwanyina. ² Walizile umwakupunda," Awina Iguputo awivwa, nawang'anda ye Farawo awivwa. ³ Josefu Avwanga ati ku wanyina, Nene ne Josefu. Wuzye etata wane achili amumi?" Awanyina watamwasusile, amuno wazungusile imilolechele yakwe. ⁴ Apano Josefu anena awanyina ati," Palamilani kwe nene, nazina." Awapalamila papipi. Avwanga ati," Ne Josefu umunyonko, wino nmwakaziye kuwina Iguputo. ⁵ Mutize mwafwilimana nanti kufulilwa namuno mwankazizye konye koo, muno wantumile pankolelo pakwe mwemwe ukusunga uwumi. ⁶ Pamyakanye yiwili kwaponile ichipowe munsi swinya kwasyala imyaka yisano yino kutaliwa ukulima nanti akusinza. ⁷ Leza watuma pankolelo pakwe mwemwe ukuti mbikazye musyale munsi yapansi, nukuwasunga nuwumi ukuti mutulwe nkani. ⁸ Kanonzi asamwemwe mwantumile koo kweni we Leza, wino wampanga ukuwane yisi we Farawo, nukuwa ne songo wang'anda yonsi, nukupyujila insi yonsi iya Iguputo. ⁹ Pitisyanji muye kwe tata nukumunena muti kwe weliwe," achilichino umwana wako Josefu alanzile," Leza ambisile nene ukwa ne songo we Iguputo yonsi. Zanga kwe nene nanti kuyimba. ¹⁰ Muliyikala munsi ye Gosheni, swinya muliwa mupipi nanene, mwemwe nawana winu nawana wawana winu nitekwa vyinu ning'ombe zyinu, navyonsi vyo mulinavyo. ¹¹ Ndiwakwavwilizya kulyanye, mo kuchili kuli yinji imyaka yisano iyanzala, alyakuti mutize muwe muchipowe, mwemwe nawa mung' nda zyinu, swinya navyonsi vino mulinavyo."' ¹² Lola, aminso yinu, naminso ye wunji Benjamin, ukuti amulomo wane wuno wukuvwanga kwakwe mwemwe. ¹³ Mulimunena tata ivyamuchinzi wane mu Iguputo navyonsi vino mwavilola. Mwandi mupitisye nukumuleta etata koo." ¹⁴ Wamukumbatizile umuzuna wakqe Benjamin munsingo swinya alila, Benjamin alosya pansingo pakwe. ¹⁵ Awafyompa awnyina swinya atalika nukulila paminso yawo. Ukufuma papo wanyina watalilsile kulandana nawe. ¹⁶ Apo ilyasi lyakwe lyivwisilwe mung'anda ye Farawo: " Awanyina we Josefu wizile." Vyamusechelezizye nkaninye Farawo nawawonvi wakwe. ¹⁷ Farawo alanda ati kwe Josefu," Landa kuwanyonko, ' chitani choo: Longani ivitekwa vyako uye mukaya ka Kenani. ¹⁸ Sendani eso nimbumba yako mwize kwe nene. Ndiwapa insi nzima mu Iguputo, swinya muliwawalya ivyamafuta ya munsi.' ¹⁹ Kanonzi wapingulwa, ' Chita choo, senda amagaleta ufumye munsdi ya Iguputo ayawana winu na wachi winu. Sendani eso ayize. ²⁰ Mutakasakamale izyavyuma vyinu, pakuti ivizima vyonsi ivya Iguputo avyinu. ²¹ Awana wa Israeli wawonvile wonye. Josefu awapa amagaleta ukuyana nuwupinguzi we Farawo, awapa nivyakulondwa munzila. ²² Pakwe wonsi walyane wawapile ivizwalo ivyakupusana, kweni Benjamin wamupile indalama imyanda yitatu iye siliva( 300)swinya nimyenda yisano nimyenda iyakupusana yisano. ²³ Kwe yisi watumile vyoo: indokwe ikumi zyizuzizye ivintu ivizima ivya mu Iguputo; indokwe zyozizuzizye imbeyu, buledi, navinji ivyakumwavwilizya e yisi pawulendo. ²⁴ Apo awatuma awanyina awapita. Avwanga kwewoliwo ati," Lolechesyani kuno mutakupokota pawulendo. " ²⁵ Wakatusile mu Iguputo nukwiza munsi ye Kenani, kwe Jekapu eyisi wawo. ²⁶ Wamunenile awati" Josefu achili amumi, swinya we kapanzya wansi yonsi iya Iguputo." Umwenzo wakwe awulwilinta, mo atasuwilanga vino wamunenanga. ²⁷ Wamunenile amazwi yonsi yano Josefu walanzile kwewoliwo. Alapano Jekapu walola amagaleta yano Josefu watumile ukuya mukumusenda, umuzimu wakwe Jekapu eyisi wawo awukatuka. ²⁸ Nga Israeli ati," Chakwana. Umwanane Josefu achili amumi. Nandi inje mulole pano ntani imfwe."