¹ Josefu wizile wichilila nawe ku Ijiputi. Potifala amuwonvi wakwe Falawo wino walionji wesongo wakwe wakalindilila umu Ijiputi, wamukazile kuwina Ishumaeli, wano watwazile kweneko. ² Yahweh walinji nu Josefu swinya wizile wawa amukankala. Wikalanga mung'anda yenankolelo wakwe umu Ijiputi. ³ Enankolelo alola kuno Yahweh walinji nawe nukuti swinya Yahweh walesile achiwa achizima vyonsinye vino wachisile. ⁴ Josefu azanwa uwuzima paminso yakwe. Wawombelanga Potifala apa Josefu uwunankolelo mung'anda yakwe, swinya nachonsinye chino walinji nacho, achiwika muwusamalilo wakwe. ⁵ Ngapano kwizile kwiza ukufumilila kumpindi pano wizile amupa umulimo wakulolela mung'anda yakwe swinya napa kwechonsiye chino walinji nacho, nukuti Yahweh walosile ing'anda yamwina Ijiputi muno we Josefu. Uwulote wakwe Yahweh walinji pakwe chonsinye chino Potifala walinji nacho mung'anda yakwe ngaswinya na kuchalo. ⁶ Potifala awika ichilichonsi chino walinji pansi pakwe Josefu ukuti awachilolelela. Atelenganianga chimwi suka ichakulya chitupu walyanga. Nomba Josefu walinji amuzima swinya uwakukopa. ⁷ Ngapanzi pakwe choo umuchi wakwe yisikulu wizile lola aminso pakwe Josefu swinya ati, " lala nani." ⁸ Ukuwa wakanile swinya ati kumuchi wakwe yisikulu, " Lola, Etatakulu asiwikako amano kuvintu vino nkachita mung'anda swinya wawika chonsinye chino achakwe pansi pakwe nene . ⁹ Pasi esongo mjung'anda yoo wino walusya nene. Atayisunjila inchintu chimwi kwe nene suka wewe, amuno we muchi. Ngamuno chani chino ingachita inchintu chikulu choo swinya mbembuke kwe Leza?" ¹⁰ Wavwanga kwe Josefu uwanda nuwanda, ukuwa wakananga ukulala nawe nanti akuwa nawe. ¹¹ Uwanda wumwi wonga mung'anda kukuwomba umulimo wakwe. Mutalinji umonsi nanti wenga mung'anda. ¹² Alema umwinjilo wakwe ngaswinya ati, " lala nani." Asya umwinjilo wakwe mumakasa yakwe, asamala, ayakunzi. ¹³ Chalinji, lyo walola kuno wasya ichizwalo mumakasa yakwe wasamalila kunzi, ¹⁴ Ayita awawonvi awonsi awamung'anda yakwe nga awanena, " lolani, Potifala watuletela moo umuheberi kukutusenteka sweswe. Kwe sweswe kwenene ukuti alale nani, mpunda nizwi kulu. ¹⁵ Achaleka lyo wivwa kuno napundisya, achaleka asya umwenda wakwe kwenene, asamala, ayakunzi." ¹⁶ Asunga ichizwalo papipi naweliwe asuka yisikulu ayiza kukaya. ¹⁷ Amunena woo uwulondolozi, " Umuwonvi umuhebeli wino wamuleta kwe sweswe, wizile nukusenteka. ¹⁸ Ngapano lyo napunda, asya ichizwalo chakwe kwenene nga samalila kunzi." ¹⁹ Ngapano, lyo yisikulu wivwa uwulondolozi wuno umuchi wamunenile, " Choo achino umuwonvi wako wachisile kwenene, " wafuzilwe nkaninye. ²⁰ Yisikulu wakwe Josefu amusenda amuwika muvingololo, kumasyo kuno awanyepwe wa mfumu wasungwanga. Walinji kulyanye muvichingololo. ²¹ Ukuwa Yahweh walinji nu Josefu swinya alanjizya ilayilizyo ilisuwilwa kwe weliwe. Amulanjizya ulukundo lukulu paminso yawa muvingololo. ²² Esongo wawa kalindilila wamuvingololo wapile amaka e Josefu ukulolechesya wensi muvingololo. Chonsinye chino wachitanga momo, eJosefu awino walolechesyanga. ²³ Enankolelo wamuvingololo atasakamine nachimwi chino chalinji mumkasa yakwe, amuno Yahweh walinji nawe. Chonsinye chino wachitanga, Yahweh watwalililanga.