¹ Apano Jekapu aya uwulendo swinya ayiza munsi yawantu yakuwufumililo wilanzi. ² Pano walolechesyanga, alola ichifula mumpanga, swinya lola, amawufyo yatatu ayang'onzi yalazile mumbali nacholicho. Amuno ukufuma muchifulanyechoo amuno wasembanga aminzi ayakug'wensya ing'onzi, swinya aliwa lino wakupichilanga pachifula lyalinji alikulu. ³ Pano ing'onzi zyonzi zyawungine papo, awachemi wasyembusyanga ichiliwe pamulomo uwachifula apano awang'wensya ing'onzi swinya awakupika ichiliwe pamulomo wachifula, ukunyochezya mumasyo yakwe ⁴ Jekapu wavwanzile kwewoliwo ati," Wanawitu nga mufumile kwinye? awamwasuka awati," Twafuma ku Harani. ⁵ Walanzile kwewoliwo ati," Wuzye mwamumanya Labani umwana Nahor?" Nawo awati," Twamumanya. ⁶ Nga avwanga ati kwewoliwo," Wuzye alichete?" Awawti, Alichete swinya awawti lolani papo Rakelo umwanakwe umwanachi akwiza ning' onzi." ⁷ Jekapu watili," Lola, apakasi pawanda sampindi yakumuwunganichila ing'onzi apaliponga. Muzipe amanzi ing'onzi. Swinya apano mupite mukuchema . " ⁸ Wavwanzile ati," Tutanga tuleke ivikwato zisuke ing'onzi zyonsi ziwungane apaliponga. Awonsi wandi wasunchilizye iliwe ukufuma pamulomo wachifula, ngapano tulizing'wesya ing'onzi. ⁹ Pano Jekapu wachilinji ukuvwanga nawoliwo, Rakelo ayiza ning'onzi zyakwe yisi, zino wachemanga. ¹⁰ Pano Jekapu wamuweni Rakelo, umwanakwe umwanachi wakwe Labani, indume yakwe yangu wakwe, Jekapu ayiza, asunka ichiliwe ukufuma pamulomo wachifula, apano ang'wensya uwufyo lyakwe Labani, indume yakwe yangu wakwe. ¹¹ Jekapu afyompa Rakelo swinya alila akolomoka. ¹² Jekapu anena Rakelo ukuti ne luko lwakwe tata winu, nukuti walinji amwana chonsi wakwe Rabeka. Ngapano wasamazile swinya ayamunena yisi ¹³ Pano Labani wivwile ilandwe lyakwe Jekapu umwana inkazi yakwe asamala ukuya ukumusunkania nukumukukutila, nukumufyompa weliwe, swinya amusenda amutwala mung'anda yakwe. Jekapu amuwuzya Labani ivntu vyonsinyevyoo. ¹⁴ Labani ati kweliwe," Nakawuzyenye welifupa lyane swinya wemuwili wane." Apano Jekapu ayikala nawe ukuyana numwezi wonga. ¹⁵ Ngapano Labani avwanga kwe Jekapu ati," Wuzye umbombele nene ukwawula chimwi pakuti we kamu wane? Mbuzya, ichilipwa chako chiliwa chani?" ¹⁶ Lelo Labani walinji nawana awanachi wawili. Izina lyakwe songo walinji we Leya, ni zina lyamuzuna walinji we Rakelo. ¹⁷ Aminso yakwe Leya yalinji amafwawalale, kweni Rakelo wazifile mumiwele swinya namukalolechele. ¹⁸ Jekapu wakunzile Rakelo, avyo wavwanzile ati," Nandi mbombele Rakelo imyaka munenulambali, umwana wako umutichi umukazyana." ¹⁹ Labani ati," chingazipa impe weyo kwakwe wewe, ukulusya ukuti impe wee umuntu winji. Yikala nane. ²⁰ Ngapano Jekapu wawombezile imyaka munenulambali; swinya weni waweni ngati wawombela amanda amatichi umulandu nulukundo luno walinji nalo peweliwe. ²¹ Ngapano Jekapu ati," kwe Labani," Mpa umuchi wane, amuno amanda yasila _imutwale!" ²² Apano Labani awunganika awantu wonsi awamasyo ukuti pawe kuzewela. ²³ Ku kamanguzi, Labani asenda Leya umwanakwe umwanachi amutwala kwe Jekapu. ²⁴ Labani wapile umukazyana umuwonvi Ezilpa apa umwanakwe umwanachi Leya ukuwa amuwonvi wakwe. ²⁵ Kumutondotondo, Lola, walinji we Leya! Jekapu avwanga kwe Labani ati," Nga achani chino wawomba kwe nene? Wuzye ntapyunjilanga kwakwe wewe umulandu ne Rakelo? Nga mulanduchi wankopeka nene?" ²⁶ Labani avwanga ati," asamyiko yitu ukutwazya umutichi pano songo atani atwalwe. ²⁷ Umale esabata wenga numwanane umwanachi uwusiwinga, swinya twandi twize tukupe winji wewe nanti wambombela nene imyaka yinji munenulambali." ²⁸ Jekapu awomba wonye, amalizya sabata wenga nu Leya. ²⁹ Apano Labani wapile Rakelo, umwanachi umuwonvi ukuwa amuchi swinya. ³⁰ Apano Jekapu aya kwe Rakelo, swinya akundisya Rakelo ukulusya Leya. Nomba Jekapu wawombezile imyaka yinji papela munenulambali eLabani. ³¹ Yahweh wizile lola kuno Leya wapatikwa, apano amwiyula uwula, kweni Rakelo walinji we chumba. ³² Nga Leya awa swinya nichifuwa apapa umwana umonsi, nga amwita izina ati we Reuben. Amuno wavwanzile ati," pamulandu Yahweh aweni ukuchulika kwane; nakawuzyenye umulume wane andi ankunde." ³³ Apano anyoka ayimilila swinya apap umwana umonsi. Avwanga ati," Pamulandu Yahweh ayivwile kuno napatwa, achaleka wampa swinya umwanumonsi," nga amwita umwana Simeon. ³⁴ Awa nuwula swinya apapa umwana umonsi. Avwanga ati," Pampindi yoo kanonzi umulume wane andi alematile kwakwe nene, namupapila awana wonsi watatu." Achaleka izina wisilwe we Levi. ³⁵ Awa nuwula apapa swinya umwana umonsi. Avwanga ati," Pampindi yoo nandi mutunvye Yahweh." Achaleka amwita izina we Yudah; apano aleka ukupapa awana.