¹ walile pano Iyizeki wakota naminso yaponi mfinzi yasya pakulola, wapunzile Esau, umwanakwe songo ati, kwe weliwe ," mwanane ." Esau ati kwe weliwe newawo," ² Nga Iyizeki ," lola kanonzi nakota. Ntamanyile uwanda wamfwa yane. ³ Achaleka senda ivyanzo vyako, umuvi wako ne wuta, nga uye mumpanga unvwimile inyama. ⁴ Umpanjile ichakulya ichizima, ichiyane chino nakunda, nga ulete kwe nene nga indye nukukupepa pano ntani imfwe." ⁵ Nomba Rabeka wivwile pano Iyizeki wavwanganga ne Esau umwanakwe. Esau wayile ku mpanga pakuvwima nukuti anyoke ni nyama. ⁶ Rabeka avwanga kwe Jekapu umwanakwe ati," Lola koo, njivwile eso akuvwanga kumukulu wako. ⁷ Esau atili Ndetela inyama nga unjanizye ichakulya ichizima, ukuti nchilye nga inkupepe muminso yakwe Yahweh pano imfwa yitani.' ⁸ Achaleka kanonzi, mwanane, tontela amazwi yane ndivino nkukupingula. ⁹ Yanga kuwuchemo, nga undetele wana wawili awambuzi awazima; nga nandi njanie ichakulya ichizima icheso ukufuma kwe zyolizyo, ngevino wakunda. ¹⁰ Wandi uchitwale kweso, ukuti achilye alyakuti akupepe pano imfwa yakwe yitani yifike. ¹¹ Jekapu ati kwe Rabeka umuchi wakwe, " lola, Esau umukulu wane amuntu wameya, nga nemo nemuntu umutelepe. ¹² Pamwi Tatawane andi ayize akumye, nga akwizu kuloleka kwe weliwe ukuwa neka kopechezya. Nkwizu kuleta ulutipo pakwe nene asalupepo. ¹³ Mamakwe ati kwakwe weliwe," mwanane, lekani ulutipo lonsi lupone penene. Tontelavye amazwi yane, nukuya, uvilete kwakwe nene. ¹⁴ Apano Jekapu wapisile asenda awanambuzi nukuwaleta kwe mama wakwe, nga mama wakwe ayania ichakulya ichizima ndivino Tatawakwe wakundizile. ¹⁵ Rabeka asenda ivizwalo vizima vyakwe Esau, umwanakwe songo, yano yalinji nawe mung'anda, nga ayawika pe Jekapu, umwakwe umutichi. ¹⁶ Awika ichikowa chawanambuzi awika pamakasa yakwe napa chawi ichitelepe pansingo. ¹⁷ Awika ichakulya chizima nichibama chino ati apekania mumakasa yamwana wakwe eJekapu. ¹⁸ Jekapu aya kweyisi wakwe ati, " Tatawane."Yisi ati," newawo; weweni mwanane?" ¹⁹ Jekapu ati kweyisi," nemwanako esau ekatote. Nawomba ndivino wati uvwanga kwanene. Kanonzi yikala nukulya inyama, yimwi ukuti umupepe. ²⁰ Ayizeki ati ku mwanakwe," nga wazana wuli wanguwangu, mwanane? " Ati, Umulandu Yahweh Leza wako andetezile." ²¹ Ayizeki ati kwe Jekapu ,"palamila kwakwe nene, kunkumye, mwanane, nga imanye kuno we mwanane wachisinka pamwi sawowo." ²² Jekapu aya palamila kwe Ayizeki eyisi; nga Ayizeki amukumya ati, " amazwi aye Jekapu, kweni amakasa amakasa yakwe Esau." ²³ Esau atamumanyichisizye weni, pamulandu pamakasa yakwe yalinji ayameya, ngati amakasa yamukulu wakwe Esau, achino Ayizeki wamupefile. ²⁴ Watili," Nakawuzyenye we mwanane Esau? Atolelela." Anene." ²⁵ Ayizeki ati, " leta ichakulya kwakwe nene, nga nkwizu kulya inyama yako yamumpanga, ukuti nkupepe. " Jekapu aleta ichakulya kwakwe weliwe. Ayizeki alya, Nga Jekapu amuletela ipala, nga ag'wa. ²⁶ Ngapano Yisi wakwe Ayizeki ati kwakwe weliwe," palamila nomba umfyompe, mwanane." ²⁷ Jekapu apalamila amumfyompa, nga anunchizya ifungo lya vizwalo vyakwe nga amupepa. Watili, " lola, umununsi wamwanane wuli ngati amununsi wamuchalo che Yahweh chino ati apepa. ²⁸ Leka akupe ichipya cha lumi lwiyulu, ichipya chaweninsi, nga nimpumba invule ni pala ipya. ²⁹ Leka wantu wakupyunjile ninsi zikufukamile. Uwe wetatakulu pawanyonko, nawanachonsi awe nyoko walikufukamila. Leka wensi wino akukutipa atipwe; Leka wensi wino wakupepa wewe apepwe." ³⁰ Watili pano Ayizeki akumalizyavye ukumupepa Jekapu, nga Jekapu ayiza sowa mukafumile paminso yeyisi wakwe Ayizeki, Esau umukulu wakwe winjizile ukufuma pakuwinga. ³¹ Wayanizye swinya ichakulya nukuchileta kweyisi wakwe. Ati kweyisi wakwe," Tata,katuka nukulya vimwi ivya mwanako ivya mumpanga, ukuti umupepe." ³² Eyisi Ayizeki ati kwe weliwe, " weweni wewe? " watili, nemwanako ekatote, Esau." ³³ Ayizeki wazakazile nkaninye nga ati, " Te ali weweni wino avwimile inyama ya mumpanga nukuyileta kwakwe nene? tendile yonsinye lyo utani wize, nga imupefile. Molimonye alipepwa. ³⁴ Walile Esau wivwa amazwi yeyisi, walizile nukupongomoka nukulila kwawulumilwa, nga ati umpepe, swinya nani Tata." ³⁵ Ayizeki ati," umunyinko ayizile koo umwakunkopeka nga ati asenda uwupepwe wako." ³⁶ Esau ati," Wuzye ntakulandisya ukuti we Jekapu? amuno wambipa ndivyo wonye ka akechitiwili. Wasenzile wasenzile uwanangwa wi kwatwa lyane, nga, lola, nomba lola wasenda uwupepwe wane." Apano watili," wuzye utati usunga uwupepwe wakwenene? ³⁷ Ayizeki atolelela ati kwe Esau ," lola, namupanga ukuwa we Tatakulu wako, nga napa kwe weliwe awanyina wonsi ukuwa awawonvi, nga namupa impumba ni pala ipya. Avyani swinya vino ningawomba kwakwe wewe mwanane?" ³⁸ Esau ati kweyisi ," usi nanti awupepwe wonga pakwenene, Tatawane? mpepa nanenenye, Tatawane." Esau alila umwakukwezya. ³⁹ Ayizeki yisi wakwe atolelela ati kwe weliwe, " lola, amasyo kuno uliyikala yaliwa uktali ukufuma kuwuwotoke wansi, ukutali ukufuma ku lumi lwi lewelewe kupela. ⁴⁰ Uliwakwikala nulupanga lwako, nga ulipyunjila umunyonko. Kweni pano wakatuchila ulivuna ikoli lyakwe munsingo yako." ⁴¹ Esau wapasile Jekapu pamulandu nuwupepwe wakwe wuno yisi wapile kwakwe weliwe. Esau ati mwenzo wakwe," Amanda yakulosezya Tatawane yapalamila; ndila pano nakoma Jekapu ewunji." ⁴² Amazwi yakwe Esau umwakwe songo yalanzilwe kwe Rabeka. Achino watumile nukumwita Jekapu umwanakwe umutichi nga ati kwe weliwe," lola, umunyonko Esau ukuyimyalalika wenga kuvye wewe pakwelengania pakukukoma. ^{43 44} Achaleka kanonzi, mwanane, njivwila nga usamalile kwe Labani indume yane, mu Harani. Uyikale nawe liwe pampindi intichi, ukufichila umukulu wako watonsya uwukali wakwe, ⁴⁵ Ukufichila uwukalale wamukulu wako wafuma kwakwe wewe nukwiwilila chino wati uwomba kwakwe weliwe. Apalipano ndituma nukukunyosya koko. Nga mulanduchi insovye mwemwe mwensi muwanda wonga? ⁴⁶ Rabeka ati kwe Ayizeki," natonta muwumi umulandu wawakazyana we Heti. Ndi Jekapu angatwala umukazyana wenga uwe Heti ukuwa amuchi, vino awanachi waa, awakazyana wamwi awamunsi, wuzye uwumi wane wuliwa awuzimachi kwakwe nene?