¹ Paulo, umunyepwe wakwe Kilisitu Yesu, na wunji Timoti, kuli Filimoni, uwunji umukundwe nupya umuwomvi munji, ² na kuli Afiya nkhazi yitu, na kuli Akipasi umusilika wunji, nakumapepo yano yakazanana pang'anda yako. ³ Uwila wuye kuli wewe numutende ukufuma kuli Leza Tata witu na Mwene Yesu Kilisitu. ⁴ Lyonsi nkhasalifya Leza ndinawatambula mumapepo yane, ⁵ pamula nuvwa ivyisuwilo lino mwaya nalyo pali Mwene Yesu nu lukundo luno mwaya nalo kuyanthu yakwe wonsi ayatiswe. ⁶ Nkhupepa ukuti ukwankhana kwi suwilo lyinu kufwile kuye ukwamaka, nomba uluvwichisya pa chinthu chonsi ichizima chino tuli nacho muli Kilisitu. ⁷ Pakuti indi ni nsansa izivule na maka pamulandu nulukundo lwinu, pamulandu imyezyo yayanthu ayatiswe yakwe Leza wayitekanywa na mwemwe, yanji. ⁸ Achino, nanthi wuli indi namaka wonsi muli Kilisitu pa kuwalamula ukuti mwawomba vino mulingine ukuwomba, ⁹ kweni pamulandu nulukundo, mumalo mwakwe nkhuyilizyanya kuli mwemwe-Nene, Paulo, umukote, nupya nomba umunyepwe wakwe Kilisitu Yesu. ¹⁰ Nkuwakolowozya ivyakuyana nu mwanane Onesimasi, wino namupapila muwunyepwe. ¹¹ Pakuti insita yimwi wali uwawula inchito kuli mwemwe, kweni nomba ali nintchito kuli swensi mwemwe na nene. ¹² Namutuma nupya kuli mwemwe, weni wino umwenzo wane. ¹³ Nenkhulonda ngati angasungwa na nene ukuti angize amphususye kuli mwemwe pano nemunyepwe pamulandu ni landwe ilisuma. ¹⁴ Kweni nthalondanga ukuwomba chilichonsi ukwawula amano yinu. Nthalondanga ukuti imilimo yinu iyizima yiye iyakupatichizya kweni iyakufuma mukulonda ukuzima. ¹⁵ Nanthi wuli pali chii wapawike ukufuma kuli mwemwe pansita, ukuti ayize awelwe muyayaya. ¹⁶ Atalitela ayepo nupya umuzya, kweni uwakuchila umuzya, uwunji umukundwe. Umukundwe nkhani nkhani kuli nene, nupya sana kuli mwemwe, muli vyonsi kumwili na muli Mwene. ¹⁷ Nomba ndi muli na nene ngati ne muzo, mupochelelini ngati anene. ¹⁸ Nanthi wawononile penepo pamwi ukuya namwe ningongole, mumphingule nene. ¹⁹ Nene, Paulo nkhuwalika chii namakasa yane. Nene ne mwenecho ndiwezya-mutatambula ukuti muli ninkhongole na nene mwemwe mwenga! ²⁰ Nkhuzumila, wunji, nguvwila uwila muli Mwene; yisya umwenzo wane muli Kilisitu. ²¹ Ichikanga chakuvwila kwinu, nkhuwalika kuli mwemwe. nkhumanya ukuti mulawomba ukuchila vino ndilenga. ²² Pansita yiyo kwene, mphekanyizya amalo ayazima, pakuti nkhusuwila ukuti ukupitila mumapepo yako ndiwelela nupya kuli mwemwe. ²³ Apafulasi, umunyepwe wunji muli Kilisitu Yesu, akuwalamuka. ²⁴ Ichilichimwi na Maliko, Alisitilachasi, Demasi, na Luka ayawomvi yanji. ²⁵ Uwila wakwe mwene witu Yesu Kilisitu wuye nimipasi yinu. Ameni.