¹ Awukwi kuno ukupokota pali mwemwe kukufumila? Uzye kutakufumila muvyakulonda vinu vino vikulwana muviwumbwa vinu? ² Mukukumbwa, kweni mutakuyanavyo. Mukukoma nukukwina, nukuti mutakupochelela. Mukulwa nukupokota. Mutakuyanavyo pamulandu wakuti mutakulenga. ³ Mukulenga nukuti mutakupochela pamulandu mukulenga uwuyi, ukuti limwi mungaviwomvya mukulonda kwinu. ⁴ Mweyachende mwe! Mutamanya ukuti uwukamu ninsi yapansi uwulwani na Leza? Achino wensi wino akulonda ukuya umukamu ninsi akuyipanga wenga ukuya umulwani wakwe Leza. ⁵ Pamwi mukwelenganya ukuti amawaliko yakavwanga ivyasile, ''Umupasi wuno wapanjilwe ukwikala muli sweswe uwawuzuwa sana''? ⁶ Kweni Leza akapa uwila uwuvule, achino amawaliko yakati, ''Leza akasusya ayakuyikwezya, kweni akapa uwila kuyakuyisya.'' ⁷ Achino muipe kuli Leza.Mukanyini chiwa, nukuti alifuma kuli mwemwe. ⁸ Mwize kupipi kuli Leza, nukuti aliza kupipi na mwemwe. Swefyini amakasa yinu, mweyayembu mwe, nukuti muswefye imyenzo yinu, mweyanthu yamelenganyo payili mwe. ⁹ Ichitima, ukulosya, nu kulila! lekini ukuseka kwinu kupiluke uwulanda ninsansa zinu ziye ichitima. ¹⁰ Muyichefye mwenga pamanso pali mwene, nukuti aliwakwezya. ¹¹ Mutavwanjilana uwuyipe pali wenga numuze, yakundwe.Umunthu wino akuvwanga uwuyipe kumuze pamwi ukumupingula umuze akavwanga ukwiminkhana nisunde nukupingula isunde. Ndi ukupingula isunde, nsiwekawomba wisunde, kweni kapingula. ¹² Kapa wisunde na kapingula awenga sile. ali wino alingine ukupususya nu konona. Weweni, wemuno ukupingula umupalamani wako? ¹³ Nomba wuvini, mweyano mukuti,''ilelo pamwi mutondo tuliya kumusumba wuwo, umwaka, ukukazya nukuzanilapo papela.'' ¹⁴ Aweni wino akamanya chino chilichitika mutondo, nukuti uwumi wako ichani? Pano mwechunsi chino chikaloleka pansita inono nukupita. ¹⁵ Mumalo mwakwe, mwati, ''Ndichakuti mwene angalonda,tulikala nukuwomba chii nachilya. ¹⁶ Kwene nomba mukuitutumula ukuyana ninzila zyakuikwezya. Konsi ukuitutumula kuno ukuipe. ¹⁷ Achino kuli wensi wino wamanya ukuwomba kweni asiwomba, kuli weliwe uluyembu.